Read cisena MABASA 11 Bible Online

MABASA 11 - cisena bible

MABASA 11

¹Anyakutumwa pabodzi na anyakukhulupira anango a ku Yudea konsene adapiva kuti anthu okhonda khala Ayuda akhadatambirambo mafala a Mulungu.

²Tenepo pidenda Peturo ku Yerusalemu, anyakukhulupira akhafuna kuti anthu okhonda khala Ayuda agwandwe ale, adamsumulula

³mbalonga mbati, “Iwe udenda kapita m'nyumba ya anthu okhonda gwandwa nsonga yachimuna mbudya nawo pabodzi!”

⁴Peturo adatoma kuapanga chibodzi na chibodzi pya pyonsene pikhadachitika mbati,

⁵“Ine ndikhapemphera mumzinda wa Yopa, tenepo ndidaona masomphenya a chinthu chinango chakuoneka ninga chinguwo chikulu chakuphatwa nkhomo zache zinayi chikutchithiswa kubulukira kudzulu. Icho chidaimira chifupi na ine.

⁶Pidachiyang'anisisa ine, ndidaonamo nyama zakufuyiwa, zam'tsanga na zakukambadza pontho na mbalame.

⁷Tenepo fala idaveka kuti, ‘Peturo, lamuka; ipha, udye!’

⁸Mbwenye ine ndidalonga kuti, ‘Waa! Tayu, Mbuya! Thangwi na kale ene nkhabe pinthu pyokhonda chena na pyakunyansa pyapita m'kanwa mwanga.’

⁹Mphapo fala idaveka kachiwiri kuti, ‘Leka nyerezera pinthu pidachenesa Mulungu pile kuti mphyakunyansa.’

¹⁰Penepi pidachitika katatu. Tenepo chinguwo chile chidakwatwa kubwerera kudzulu.

¹¹Pandzidzi onthowo panyumba pakhakhala ine[14] pale padafika amuna atatu, akhadatumwa kuna ine kubulukira ku Kesarea ale.

¹²Tenepo Mzimu Wakuchena adandipanga kuti ndiende nawo okhonda chita nthontho. Anyakukhulupira atanthatu a ku Yopawa adandiperekeza ku Kesarea, tenepo tonsene tidakapita m'nyumba mwa Konelio.

¹³Iye adatipanga mule mudaonera iye mngelo m'nyumba mwache. Mngelo adalonga kuna iye mbati, ‘Tuma munthu ku Yopa akachemere munthu unango dzinache Simoni Peturo.

¹⁴Iye analonga mafala kuna iwe mwakuti iwe na banjako yonsene munapulumuka.’

¹⁵Pidatoma ine kulonga, Mzimu Wakuchena adatchitha pana iwo ninga mudatchithirambo iye pana ife pakutoma pale.

¹⁶Tenepo ndidakumbuka pidalonga Mbuya kuti, ‘Yohani adabatiza na madzi, mbwenye imwe munabatizwa na Mzimu Wakuchena.’

¹⁷Ngakhala Mulungu adapereka mtukwa kuna anthu okhonda khala Ayuda ninga onthowo udatipasa iye ule, pidakhulupira ife Mbuya Yesu Khristu, mphapo ndikhali animbo ine kuti ndiyese kupokanyisana na Mulungu!”

¹⁸Pidava iwo penepi, adaleka mphokawoyo mbakuza Mulungu mbati, “Penepa Mulungu aperekambo mwayi kuna anthu okhonda khala Ayuda wakuti aleke pyakudawa pyawo mbatambira moyo!”

¹⁹Anyakukhulupira adabalalika thangwi ya kubonereswa kwawo, kule kudatoma pandzidzi udaphiwa Setefano. Anango a iwo adenda mpakana kunthemba za Fonike, Kipro na luwani ya Antiokea, kulalika mphangwa kuna Ayuda kokha basi.

²⁰Mbwenye anyakukhulupira anango, amuna akubulukira kunthemba za Kirene na Kipro, adenda ku Antiokea kulonga na anthu okhonda khala Ayuda[15] mbalalika kuna iwo Mphangwa Zadidi za Mbuya Yesu.

²¹Mphamvu za Mbuya zikhali pana iwo, tenepo anthu azinji adakhulupira mbazungunukira kuna Mbuya.

²²Mpingo wa ku Yerusalemu udava penepi, tenepo udatumizako Barnaba ku Antiokea.

²³Pidafika iye kweneko mbaona mule mukhadatsanzayisira Mulungu anthu, iye adakomerwa mbaapempha kuti onsene akhale akhulupirika kuna Mbuya na mtima onsene.

²⁴Barnaba akhali munthu wadidi, wakudzazwa na Mzimu Wakuchena pontho chikhulupiro. Tenepo anthu azinji adakhulupira Mbuya.

²⁵Kubuluka penepo Barnaba adenda kuluwani ya Tariso kasaka-saka Saulo.

²⁶Pidamgumana iye, adadza naye ku Antiokea, tenepo chaka chamumphu Barnaba na Saulo adagumanyikana na mpingo mbafunzisa anthu azinji. Ku Antiokea anyakukhulupira adatoma kuchemerwa na dzina yakuti “Akhristu.”

²⁷Pandzidzi wenewo maprofeti anango adenda ku Antiokea kubulukira ku Yerusalemu.

²⁸Mbodzi wa iwo, dzinache Agabo adaimira, pontho Mzimu Wakuchena adamchitisa kulonga kuti njala ikulu ikhali chifupi kudza padziko yonsene yapansi. (Njala idadzadi pandzidzi wa Mfumu Klaudio.)

²⁹Natenepo anyakufunza adanyerezera kuphedza anyakukhulupira anzawo m'nthemba ya Yudea kutewezana na mudaonera munthu onsene.

³⁰Iwo adachitadi tenepo mbatuma Barnaba na Saulo kwenda na mitukwayo kuna akulu a mpingo.