Read cisena MABASA 12 Bible Online

MABASA 12 - cisena bible

MABASA 12

¹Pandzidzi wenewu Mfumu Herodi adatoma kuboneresa anthu anango a mumpingo.

²Iye adatonga kuti Yakobo, mbaleache Yohani, aphiwe na talasada.

³Pidaona iye kuti Ayuda adakomerwa na penepi, iye adenda pontho kamanga Peturo. Penepi pidachitika pandzidzi wa Phwando ya Mikate yakusowa chakufufumisira.

⁴Pidamangwa Peturo, adenda kaikhwa m'perezo. Kweneko adamuikhira magulu anayi a anyakuonera a anthu anayi-anayi towera amuonere. Herodi adafuna kuti atonge mseru wa Peturo pamaso pa anthu pakumala pa Phwando ya Paska.

⁵Natenepo Peturo akhabanga koyiwa m'perezo, mbwenye mpingo ukhampempherera pikulu kuna Mulungu.

⁶Mosiku wakuti mangwana Mfumu Herodi adze na Peturo pamaso pa anthu, Peturo akhagona pakati pa anyakuonera awiri. Iye adamangwa na njema ziwiri, pontho pamsuwo wa perezo pakhali anyakulondali.

⁷Vumbu-vumbu mngelo wa Mbuya adaimira penepo. Tenepo cheza chidaoneka m'perezomo. Mngelo adatekenya Peturo paphewa kumulamusa mbalonga mbati, “Chimbiza! Lamuka!” Kabodzi na kabodzi njema zidagwa m'mikono mwa Peturo.

⁸Tenepo mngelo adalonga mbati, “Manga bande yako, pontho vala nkhwaira zako.” Peturo adachitadi ninga monthomo. Mngelo adalonga pontho mbati, “Vala chakufinika chako mbunditewere.”

⁹Tenepo Peturo adamteweradi mbabuluka m'perezo mule. Mbwenye iye hadapidziwe tayu kuti pikhachita mngelo pile pikhali ipyodi. Iye adanyerezera kuti akhaona kwene masomphenya.

¹⁰Iwo adapiringana gulu yakutoma ya anyakuonera mbapiringana pontho gulu yachiwiri mbafika pamsuwo wa simbi wa perezo mumzindamo. Msuwo ule udafunguka okha ene. Tenepo iwo adabuluka kunja mbaenda mpakana malekezero a njira ibodzi ya mumzindamo. Vumbu-vumbu mngeloyo adamsiya Peturo yekha ene.

¹¹Tenepo Peturo adatutumuka mbalonga mbati, “Chinchino ndapidziwa kuti ndipyodi! Mbuya adatuma mngelo wache kundipulumusa kumphamvu ya Herodi pontho na kuna pinthu pyonsene pikhanyerezera Ayuda kuti pinandichitikira pile.”

¹²Pidadzindikira Peturo pikhadamchitikirapyo, adenda kumusa kwa Maria, mache Yohani Maliko. Kweneko anthu azinji akhadagumanyikana kupemphera.

¹³Peturo adadidimiza pamsuwo wakunja, tenepo nyabasa wachitsikana dzinache Roda adadza kuti amfungulire.

¹⁴Iye adadziwa kuti falayo ikhali ya Peturo. Tenepo adakomerwa pyakwanga mwakuti hadafungulevebi, mbwenye adabwerera na kuthamanga kapanga anthu kuti Peturo akhali panjapo.

¹⁵Iwo adalonga mbati, “Iwe una nsala!” Pidawanga-wanga iye kulonga kuti ndipyodi, iwo adamtawira mbati, “Weneyo ndi mngelo wache.”

¹⁶Mbwenye Peturo akhali m'kati kudidimiza pamsuwo pale. Mdembu-dembu iwo adafungula msuwo mbadodoma pidamuona iwo.

¹⁷Peturo adakwiza dzanjache m'dzulu kuamatamisa mbaapanga monsene mudambulusira mngelo wa Mbuya m'perezo mule. Iye adalonga pontho mbati, “Kapangeni Yakobo penepi, pontho na anyakukhulupira onsene.” Tenepo iye adabuluka mbaenda kumbuto inango.

¹⁸Pidachena kunja, pakhali kuzunguzika kukulu pakati pa anyakuonera ale mbalonga mbati, “Ninji pyachitikira Peturo?”

¹⁹Tenepo Herodi adatonga kuti Peturo akasakwe. Mbwenye iwo adapichimwana kumgumana. Mphapo iye adavunza anyakuonera ale, tenepo adaatonga kuti iwo aphiwe. Pidamala penepi Herodi adenda ku Kesarea kubulukira ku Yudea mbakakhala kweneko.

²⁰Mfumu Herodi adazhangali pyakwanga na anthu a kumizinda ya Turo na Sidoni. Tenepo anthu adenda m'gulu kuti akamuone, mbwenye chakutoma iwo adanyengerera Blasto, mkadamu wa kunyumba ya Herodi kuti aaphedze. Tenepo iwo adenda kapempha mtendere kuna Herodi thangwi dziko yawo ikhagumana phoso kubulukira kudziko ya mfumu weneyu.

²¹Pidafika nsiku ikhadasankhulwa ile, Herodi adavala mkhanjo wache wachifumu, mbakhala pampando wache wachifumu mbalonga kuna anthu ale.

²²Tenepo anthu adakhuwa mbati, “Si munthu tayu analongayi, mbwenye milungu!”

²³Kabodzi na kabodzi mngelo wa Mbuya adampamantha Herodi, thangwi iye hadalemedze Mulungu tayu. Tenepo iye adadyiwa na mfunye mbafa.

²⁴Mbwenye mafala a Mulungu adathimiza kufalikira na kukula.

²⁵Pidamala Barnaba na Saulo kupereka mitukwa ile mu Yerusalemu, adabwerera ku Antiokea. Pakwenda pawo adakwata Yohani Maliko pabodzi nawo.