Read cisena MABASA 13 Bible Online

MABASA 13 - cisena bible

MABASA 13

¹Mumpingo wa ku Antiokea kukhali maprofeti anango na afunzisi. Enewa mbawa: Barnaba, Simioni (wakuthulwa Wakuswipa), Lusiasi (wa ku Kirene), Manaene (akhadakulira pabodzi na Herodi mtongi ule), na Saulo.

²Pikhapembedza iwo Mbuya na kupimana kudya, Mzimu Wakuchena adalonga mbati, “Ndipambulireni Barnaba na Saulo towera aphate basa idaachemerera ine.”

³Tenepo pidamala iwo kupimana kudya na kupemphera adaasanjika manja mbaatuma.

⁴Na kutumwa na Mzimu Wakuchena, Barnaba na Saulo adenda kuluwani ya Selukia. Kubulukira kweneko adenda na m'mwadiya mbakafika kuntchuwa ya Kipro.

⁵Pidafika iwo mumzinda wa Salamisi, adalalika mafala a Mulungu m'nyumba zakupemphereramo. Iwo akhali pabodzi na Yohani Maliko towera aaphedze basa yeneyi.

⁶Iwo adenda mbawambuka ntchuwa mbakafika kumzinda wa Papo. Kweneko adagumana nyamatsenga dzinache Bara-Yesu. Iye akhali Myuda ule akhapiyesambo kuti ndi mprofeti.

⁷Iyembo akhali shamwali wa mkulu wa boma ya Kipro, Seregio Paulo, munthu wanzeru pyakwanga. Tenepo mkadamu ule adachemera Barnaba na Saulo, thangwi iye adafuna kuva mafala a Mulungu.

⁸Mbwenye nyamatsenga Elima (yeneyi ndi dzinache m'chilongero cha Chigriki) adaakhondesa gopesera kuti mkadamu ule anakhulupirambo Yesu.

⁹Tenepo Saulo wakudziwika pontho na dzina yakuti Paulo, na kudzazwa na Mzimu Wakuchena, adayang'anisisa nyamatsengayo

¹⁰mbalonga mbati, “Mwana Satana iwe! Iwe umbachitira umalwa pinthu pyadidi pyonsene, pontho una unthawatawa onsene wakulekana-lekana wakuipa. Ndzidzi onsene umbayesa-yesa kusandusa pinthu pyakuonadi pya Mbuya kukhala pyakunama.

¹¹Chinchino dzanja ya Mbuya inati ikutchunyuse mwakuti unakhala boli-boli, pontho ndzidzi ukulu hunaonabi cheza cha dzuwa.” Kabodzi na kabodzi maso a Elima adachita nkhunguwisi mbasanduka boli-boli. Tenepo iye adamphamphasa-mphamphasa kusaka munthu towera amphatembo nsenji.

¹²Pidaona mkadamu ule pikhadachitika pile, iye adakhulupira, thangwi adadodoma pyakwanga na pile pidafunziswa pya Mbuya.

¹³Kubuluka ku Papo, Paulo na anzache adenda na m'mwadiya ku Perige, mzinda wa ku Pamfilia. Kweneko Yohani Maliko adaasiya mbabwerera pyache ku Yerusalemu.

¹⁴Kubuluka ku Perige, iwo adenda kumzinda wa Antiokea mu Pisidia. Tenepo pa Nsiku Yakupuma iwo adenda kapita m'nyumba yakupemphereramo mbakhala pansi.

¹⁵Pidamala werengwa mwambo wa Mose na mabukhu a maprofeti, akadamu a nyumba yakupemphereramo adaatumira munthu kaapanga mbati, “Abale, ngakhala muna mphangwa zakuwangisa nazo mtima anthuwa, longani!”

¹⁶Tenepo Paulo adaimira mbakwiza dzanjache m'dzulu kumatamisa anthu mbatoma kulonga mbati: “Aisraele anzanga na anthu okhonda khala Ayuda monsene muli pano mumbapembedza Mulungu ale, ngandivesereni!

¹⁷Mulungu wa anthu a Israele adasankhula makolo athu mbaaikha kukhala dzinza ikulu pandzidzi ukhakhala iwo ninga alendo m'dziko ya Iguputo. Mulungu adaabulusa mu Iguputo na mphamvu zache zikulu

¹⁸mbapirira[16] na makhaliro awo m'thando yatchetcha pyaka makumanayi.

¹⁹Iye adavunga madzinza anomwe a anthu m'dziko ya Kanani mbapereka dzikoyo kuna anthu a ku Israele kuti ikhale yawo ene.

²⁰Pyonsene pidachitika pyaka madzana manayi na makumashanu. “Pidamala penepi[17] iye adaapasa anyakutonga miseru kufikirana ndzidzi wa mprofeti Samuele.

²¹Tenepo pidapempha iwo mfumu, Mulungu adaapasa Saulo, mwana Kishi, wa dzinza ya Benjemani kuti akhale mfumu wawo pyaka makumanayi.

²²Tenepo Mulungu adambulusa Saulo mbaikha Davite kukhala mfumu wawo. Mulungu adalonga tenepa pya iye: ‘Ndamgumana Davite, mwana Yese, munthu wapamtima panga, ule anachita pyonsene pinafuna ine kuti iye aphate.’

²³Yesu akhali mbodzi mwa pidzukulu pya Davite, tenepo Mulungu adaikha Yesu kukhala Nyankhombo wa Aisraele ninga mukhadadumbira iye kuti anapichita.

²⁴Yesu mbadzati toma basache, Yohani adalalika kuna anthu onsene a ku Israele kuti aleke pyakudawa pyawo pontho abatizwe.

²⁵Pikhamalisa Yohani basache, adalonga kuna anthu mbati, ‘Ayi imwe mumbanyerezera kuti ine ndine ani? Si ine anadikhira imwe ule tayu. Mbwenye ngavani kuno! Iye akubwera m'nduli mwanga, tenepo ine sidakwana-kwanabi kudula nkhwaira kumanyalo kwache.’

²⁶“Aisraele anzanga, pidzukulu pya Abrahamu na anthu okhonda khala Ayuda monsene muli pano mumbapembedza Mulungu ale: mphangwa za chipulumusozi zatumizwa kuna ife.

²⁷Anthu a mu Yerusalemu na akadamu awo hadadzindikire tayu kuti Yesu mbani, pontho hadavesese tayu mafala a maprofeti ale akhawerengwa pa Nsiku Zakupuma zonsene. Mbwenye pidatonga iwo kuti Yesu aphiwe, adachitisa kuti pikwane-kwane pikhadalongwa na maprofeti.

²⁸Ndimomwene kuti iwo hadamgumane na mseru wakuti afe nawo tayu, kwache iwo adapempha basi Pilato kuti iye aphiwe.

²⁹Pikhadamala iwo kuchita pyonsene pidalonga Malemba pya iye pile, iwo adamtchithisa pamtanda mbamuikha m'masiye.

³⁰Mbwenye Mulungu adamulamusa kuimfa.

³¹Tenepo nsiku zizinji iye adaonekera kuna anthu akhadafamba na iye kubulukira ku Galilea kwenda ku Yerusalemu ale. Chinchino iwo ndi mboni zache kuna anthu a ku Israele.

³²“Ife tili kuno kukupangani Mphangwa Zadidi: pidadumbira Mulungu kuna makolo athu pile, apichita kuna ife, pidzukulu pyawo, pakulamusa Yesu kuimfa. Ninga mwalemberwa ipyo mu Salimo yachiwiri kuti: ‘Iwe ndiwe Mwananga, kutomera lero ine ndinati ndikhale Babako.’

³³

³⁴Mphapo pya kumulamusa kuimfa kuti aleke vunda m'masiye, Mulungu adalonga mbati, ‘ndinakupasani mtsanzayiso wakupambulika pontho wakukhulupirika, ule udadumbira ine kuna Davite.’

³⁵Sasawa ninga mudalongera iye pandima inango mbati, ‘Imwe nkhabe dzaleka kwene Nyabasanu Wakukhulupirika kuti avunde m'masiye tayu.’

³⁶Thangwi Davite adatumikira mfendu wache pakuchita pinafuna Mulungu, tenepo adafa. Iye adaikhwa m'masiye pabodzi na makolo ache. Tenepo manungo ache adavunda m'masiyemo.

³⁷Mbwenye munthu adalamuswa na Mulungu ule, hadavunde m'masiye tayu.

³⁸Tenepo, Aisraele anzanga, ife tafuna kuti imwe mupidziwe kuti kudzera muna Yesu mphangwa zakulekerera pyakudawa zikulalikwa kuna imwe, pontho kuti munthu onsene anakhulupira iye ule, analungamiswa pakufudzirwa pyakudawa pyonsene, pinthu pidachimwana mwambo wa Mose kupichita pile.

³⁹

⁴⁰Mphapo chitani mphole-mphole kuti pidalonga maprofeti pile, pileke kukuchitikirani:[18]

⁴¹‘Yang'anani, imwe anthu akusingirira! Dodomani mbamufe! Thangwi pinachita ine leropi mphinthu pinango pyakuti imwe nee munapikhulupirabi, podi munthu unango akupangeni pyache tani!’ ”

⁴²Pikhabuluka Paulo na Barnaba m'nyumba yakupemphereramo mule, anthu adaachemera kubwera pontho pa Nsiku Yakupuma inangoyo towera aapange pizinji pya pinthu penepi.

⁴³Pidamala balalika anthu pamgumanopo, Ayuda azinji na anthu okhonda khala Ayuda akhadasanduka Ayuda ale, adatewera Barnaba na Paulo. Tenepo anyakutumwa adalonga kuna iwo mbaawangisa mtima kuti athimize kunyindira pinthu pyachita Mulungu kudzera muna kukoma mtima kwache.

⁴⁴Pa Nsiku Yakupuma inangoyo nenene anthu onsene muluwanimo adabwera dzavesera mafala a Mbuya.

⁴⁵Pidaona Ayuda chimwinji cha anthu chile, adachita bivu mbapokanya pikhalonga Paulo pile mbamtikana.

⁴⁶Mbwenye Paulo na Barnaba adaatawira mwakuwanga mtima mbati, “Pikhafunika kuti mafala a Mulungu alalikwe kuna imwe chakutoma. Mbwenye imwe mwaakhonda mbamupinyerezera mwekha ene kuti ndimwe anthu okhonda thema kutambira moyo okhonda mala. Natenepo ife tinakusiyani mbatienda pyathu kuna anthu okhonda khala Ayuda.

⁴⁷Thangwi Mbuya adatitonga kuti: ‘Ndakuikha iwe kukhala cheza cha anthu okhonda khala Ayuda, towera anthu a padziko yonsene yapansi apulumuswe.’ ”

⁴⁸Pidava anthu okhonda khala Ayuda penepi, adakomerwa mbalonga kuti mafala a Mbuya ngadidiletu. Tenepo onsene adasankhulwa na Mulungu kuti atambire moyo okhonda mala ale, adakhulupira.

⁴⁹Mafala a Mbuya adafalikira kunthemba yonseneyo.

⁵⁰Mbwenye Ayuda adazhangalisa akadamu a mumzindamo na akazi akuveka okhonda khala Ayuda, akupembedza Mulungu ale. Iwo adatoma kuboneresa Paulo na Barnaba mbaathamangisa kunthemba kwawoko.

⁵¹Natenepo anyakutumwa adagubudza fumbi kumanyalo kwawo kupokanyisana nawo mbaenda kumzinda wa Ikonio.

⁵²Anyakukhulupira a mu Antiokeamo adakomerwa pyakwanga pontho adadzazwa na Mzimu Wakuchena.