Read cisena MABASA 14 Bible Online

MABASA 14 - cisena bible

MABASA 14

¹Pyontho-pyonthopi pidachitikambo mumzinda wa Ikonio. Paulo na Barnaba adenda kunyumba yakupempherera ya Ayuda mbakafunzisa na mphamvu mwakuti anthu azinji, Ayuda na anthu okhonda khala Ayuda ene adasanduka anyakukhulupira.

²Mbwenye Ayuda adakhonda kukhulupira ale, adazhangalisa anthu okhonda khala Ayuda, towera achitire umalwa anyakukhulupira.

³Anyakutumwa adakhala kweneko ndzidzi ukulu ene mbalonga mwakuwanga mtima pya Mbuya. Tenepo Mbuya adaatsikimizira anthu kuti mphangwa zakukoma mtima kwa Mulungu zikhalalika iwo, zikhali zakuonadi pakuapasa mphamvu zakuchitira pidzindikiro na pyakudodomesa.

⁴Anthu a mumzindamo adagawikana pawiri; anango akhali kukhundu ya Ayuda anangombo kukhundu ya anyakutumwa.

⁵Tenepo anthu anango okhonda khala Ayuda, Ayuda pabodzi na akadamu awo adanyerezera kuboneresa na kuponyera miyala anyakutumwa.

⁶Pidava anyakutumwa penepi, adathawira ku Listara na Deribe, mizinda ya ku Likaonia pontho na kunthemba zakuzungulira.

⁷Kweneko adalalika Mphangwa Zadidi.

⁸Mu Listara mukhali munthu wakulamala miyendo, ule chibalirwe chache hadafambe tayu.

⁹Iye adakhala penepo mbavesera mafala a Paulo. Paulo adamuyang'anisisa mbaona kuti iye akhali na chikhulupiro chakuti anakwanisa kuwangiswa.

¹⁰Natenepo iye adalonga mwakugaluza fala mbati, “Imira na manyalo ako!” Penepo munthuyo adanumpha mbatomeratu kufamba-famba.

¹¹Pidaona mwinji pinthu pidachita Paulo pile, udatoma kukhuwa na chilongero chawo cha Chilikaonia mbati, “Milungu yatchitha pansi kuna ife mbisanduka anthu!”

¹²Tenepo anthu adapasa Barnaba dzina yakuti Zeusi, Paulombo adampasa dzina yakuti Hereme, thangwi Paulo akhatsogolera pakulonga.

¹³Nyumba yakupembedzeramo ya milungu Zeusi[19] ikhali chifupi na kunja kwa mzinda, tenepo nyansembe wa kunyumbayo adadza na ng'ombe zimuna na maluwa kumsuwo kwa mzindawo, thangwi iye na mwinji adafuna kupereka nsembe kuna anyakutumwa.

¹⁴Pidava Barnaba na Paulo pikhafuna kuchita iwo pile, adang'amba nguwo zawo kupokanyisana nawo mbathamangira pakati pa mwinjiwo mbakhuwa mbati,

¹⁵“Mwatani munachita tenepa? Ife pano ndife anthu ene pyathu ninga imwepo! Tili kuno kukulalikirani Mphangwa Zadidi kuti muleke pinthu pyapezipi mbamutewera Mulungu wamoyo, ule adasasanya kudzulu, dziko yapansi, bara na pyonsene pili mwenemo.

¹⁶M'ndulimu Mulungu adatawirisa anthu onsene kuchita pinthu pidanyerezera iwo kuti mphyadidi.

¹⁷Mbwenye iye ambapichitira basi umboni ndzidzi onsene wakuti iye ngwamoyo na pinthu pyadidi pimbachita iye. Iye ambakupasani mvula kubulukira kudzulu pontho na kutokotesa mbewu pandzidzi unafunika ipyo: iye ambakupasani phoso na kukuchitisani kuti mukomerwe.”

¹⁸Na mafala enewa pidachimwanika basi kuti anyakutumwa alekese anthu kukhonda pereka nsembe kuna iwo.

¹⁹Ayuda anango adabwera kubulukira ku Antiokea mu Pisidia na ku Ikonio mbanyengerera anthu ale. Iwo adaponyera miyala Paulo mbammbuluthira kunja kwa mzinda, thangwi iwo akhanyerezera kuti adafa.

²⁰Mbwenye pidamzungulira anyakukhulupira, iye adalamuka mbabwerera mumzindawo. Mangwana mwache iye na Barnaba adenda kumzinda wa Deribe.

²¹Paulo na Barnaba adalalika Mphangwa Zadidi mu Deribe mwakuti anthu azinji adasanduka anyakufunza. Tenepo iwo adabwerera ku Listara, Ikonio, na ku Antiokea mu Pisidia.

²²Iwo adawangisa mtima anyakukhulupira mbaapanga kuti athimize kukhala akukhulupirika kuna Khristu. Iwo adaafunzisa mbati, “Tathema kuona nyatwa zizinji kuti tipite mu Ufumu wa Mulungu.”

²³Barnaba na Paulo adasankhula anthu pampingo onsene kuti akhale akulu a mpingo. Tenepo na kupemphera pontho na kupimana kudya iwo adaapereka m'manja mwa Mbuya, akhadanyindira iwo ule.

²⁴Pidagwanda iwo na m'nthemba ya Pisidia, adafika kunthemba ya Pamfilia.

²⁵Kweneko adalalika Mphangwa Zadidi mumzinda wa Perige, tenepo adenda kumzinda wa Atalia.

²⁶Kubuluka kweneko adabwerera na m'mwadiya ku Antiokea, kumbuto ile kukhadaperekwa iwo m'manja mwa Mulungu kuti iye aatsanzayise pabasawo, ikhadamalisa iwo chinchino ile.

²⁷Pidafika iwo ku Antiokea, adagumanyisa pabodzi mpingo mbaapanga pyonsene pikhadachita Mulungu kudzera muna iwo, pontho na mule mukhadafungulira iye njira kuna anthu okhonda khala Ayuda kuti akhulupire.

²⁸Tenepo iwo adakhala ndzidzi ukulu ene kweneko na anyakukhulupira.