Read cisena MABASA 15 Bible Online

MABASA 15 - cisena bible

MABASA 15

¹Anthu anango adabwera ku Antiokea kubulukira kunthemba ya Yudea mbatoma kufunzisa anyakukhulupira mbati, “Mungakhonda gwandwa nsonga yachimuna ninga mumbafunira mwambo wa Mose nee munakwanisa kupulumuswabi.”

²Thangwi ya penepi, Paulo na Barnaba adapokanyisana nawo pikulu. Natenepo Paulo, Barnaba na anyakukhulupira anango a ku Antiokea adasankhulwa kuti aende ku Yerusalemu, towera akaonane na anyakutumwa pontho na akulu a mpingo pa mphoka yeneyi.

³Iwo adatumwa na mpingo. Pikhagwanda iwo na m'nthemba za Fonike na Samaria, adapanga anthu mule mudasanduzikira anthu okhonda khala Ayuda kukhala anyakukhulupira. Mafala enewa adadzesa kukomerwa kukulu kuna anyakukhulupira onsene.

⁴Pidafika iwo mu Yerusalemu, adatambirwa mwadidi na mpingo, anyakutumwa pontho na akulu a mpingo. Enewa ngale akhadapanga iwo pyonsene pikhadachita Mulungu kudzera muna iwo.

⁵Mbwenye anyakukhulupira anango a m'gulu ya Afarisi adaimira mbalonga mbati, “Anthu okhonda khala Ayuda athema kugwandwa nsonga yachimuna, pontho apangwe kuti athema kuvera mwambo wa Mose.”

⁶Tenepo anyakutumwa na akulu a mpingo adagumanyikana pabodzi kuti averane pa mphoka yeneyi.

⁷Pidakhala iwo ndzidzi ukulu kuverana, Peturo adalamuka mbalonga mbati, “Abale anga, imwe mukupidziwa kuti Mulungu adandisankhula kale ene pakati panu kuti ndilalike Mphangwa Zadidi kuna anthu okhonda khala Ayuda, towera iwo akwanise kuva mbakhulupira.

⁸Tenepo Mulungu nyakudziwa manyerezero a anthu onsene, adaonesa kuti iye adatambira anthu okhonda khala Ayuda pakuapasa Mzimu Wakuchena ninga mudachitira iye kuna ife.

⁹Iye hadasiyanise tayu pakati pa iwo na ife; iye adalekerera pyakudawa pyawo, thangwi iwo adakhulupira.

¹⁰Mphapo chinchino mwatani munafuna kuyesa Mulungu pakuikha goli-goli m'khosi mwa anyakukhulupira idachimwana ife na makolo athu ene kuithukula ile.

¹¹Nkhabe! Ife timbakhulupira kuti tapulumuswa na kukoma mtima kwa Mbuya Yesu ninga iwombo.”

¹²Gulu yonsene ikhali chete kuvesera Barnaba na Paulo pikhalonga iwo pya pidzindikiro na pyakudodomesa pyonsene pikhadachita Mulungu kudzera muna iwo pakati pa anthu okhonda khala Ayuda.

¹³Pikhadamala iwo kulonga, Yakobo adalongambo mbati, “Ngavani kuno, abale anga!

¹⁴Simoni alonga mule mudaonesa Mulungu udidi wache kuna anthu okhonda khala Ayuda pakusankhula anthu pakati pawo kukhala anthu ache.

¹⁵Penepi pikutawirizana na mafala a maprofeti; ninga munalongera Malemba kuti:

¹⁶‘Mbuya alonga mbati: Pingamala penepi ndinabwera pontho mbandilamusa pontho ufumu wa Davite. Ndinamanga pontho madembe ache mbandiuchita kukhala wakuwanga pontho.

¹⁷Natenepo anthu anango onsene anabwera kuna ine, anthu okhonda khala Ayuda onsene ale achemera ine kuti akhale anthu anga.

¹⁸Alonga tenepa ndi Mbuya, ule adachitisa kuti pinthu penepi pidziwike na kale ene.’ ”

¹⁹Yakobo adathimiza kulonga mbati, “Kuona kwanga, ndaona kuti ife tileke onesa nyatwa anthu okhonda khala Ayuda adazungunukira kuna Mulungu ale.

²⁰Kwache tialembere kalata yakuapanga kuti aleke kudya nsembe zakuperekwa kuna mifanikizo, thangwi mphyokhonda chena; aleke chita uputa; aleke kudya nyama zokhonda chekwa; pontho aleke kudya chiropa.

²¹Thangwi kutomera na kale ene mwambo wa Mose ukuwerengwa m'nyumba zakupemphereramo pa Nsiku Zakupuma zonsene, pontho mafalache akulalikwa m'maluwani monsene.”

²²Tenepo anyakutumwa na akulu a mpingo pabodzi na mpingo onsene adanyerezera kusankhula anthu anango m'gulu mwawomo kuatuma ku Antiokea pabodzi na Paulo na Barnaba. Natenepo iwo adasankhula amuna awiri, Yudasi, wakuthulwa Basaba, na Sila, ale akhalemedzwa pikulu na anyakukhulupira.

²³Mphapo iwo adaatuma na kalata ishi: “Ife, anyakutumwa pontho akulu a mpingo, abale anu, tikupereka mwenyikiro kuna imwe, abale athu okhonda khala Ayuda monsene, ale mumbakhala mu Antiokea, Siria na Kilikia.

²⁴Ife tava kuti amuna anango, akhadabuluka m'gulu mwathu ale akunensani pontho akuzunguzani na mafala adalonga iwo. Mbwenye si ife tidaapanga kuti achite tenepo tayu.

²⁵Tenepo tonsene tidagumanyikana pabodzi mbatitawirizana kusankhula amuna towera tiatume kuna imwe. Iwo anabwera pabodzi na ashamwali athu apamtima, Barnaba na Paulo,

²⁶ale adapereka moyo wawo thangwi ya kutumikira Mbuyathu Yesu Khristu.

²⁷Natenepo tikukutumirani mphapo Yudasi na Sila kuti akupangeni maso na maso sasawa na pinthu pyalemba ifepi.

²⁸Mzimu Wakuchena na ife taverana kuti tileke kukuthukulisani mitolo inango padzulu pa matongero akufunikawa akuti:

²⁹lekani kudya nsembe zakuperekwa kuna mifanikizo; lekani kudya chiropa; lekani kudya nyama zokhonda chekwa; pontho lekani chita uputa. Mungathunda pinthu pyonsenepi makhaliro anu anakhala adidi. Salani mwadidi.”

³⁰Tenepo anyamphangwa adatumwa ku Antiokea. Kweneko iwo adagumanyisa pabodzi gulu yonsene ya anyakukhulupira mbaapasa kalata.

³¹Pidawerenga anthu kalatayo, adakomerwa na mphangwa zakuwangisa mtimazo.

³²Yudasi na Sila, ale akhali pontho maprofeti, adalonga pizinji pyakuawangisa mtima na pyakuapasa mphamvu.

³³Pidamala iwo nsiku kweneko, adatumizwa na anyakukhulupira na mtendere mbabwerera kuna anthu akhadaatuma ale.[20]

³⁵Mbwenye Paulo na Barnaba adakhala mu Antiokea ndzidzi ene. Iwo pabodzi pene na anthu anango azinji adafunzisa na kulalika mafala a Mbuya.

³⁶Pidagwanda ndzidzi pang'ono Paulo adalonga kuna Barnaba mbati, “Tende tibwerere m'nduli tikafambire abale athu m'maluwani monsene mudalalika ife mafala a Mbuya mule, pontho tikaone kuti akukhala tani.”

³⁷Barnaba akhafuna kuti Yohani Maliko aende nawo pabodzi,

³⁸mbwenye Paulo adapinyerezera kuti nee pikhali pyadidi tayu kumkwata pontho, thangwi iye hakhadakhala nawo pabodzi tayu kuti amalise basawo ile, mbwenye akhadabwerera pyache mbaasiya mu Pamfilia.

³⁹Penepo pakhali mphoka ikulu mwakuti iwo adaphadzana. Barnaba pabodzi na Yohani Maliko adapakira m'mwadiya mbaenda ku Kipro.

⁴⁰Mbwenye Paulo adasankhula Sila. Pidaapereka anyakukhulupira m'manja mwa Mbuya kuti aakoye mwadidi, adenda.

⁴¹Paulo adagwanda na mu Siria na Kilikia kuwangisa mtima mipingo.