Read cisena MABASA 16 Bible Online

MABASA 16 - cisena bible

MABASA 16

¹Paulo adenda mpakana kumizinda ya Deribe na Listara. Mu Listara mukhali mkhristu unango dzinache Timoti. Mache akhali Myuda, ule akhalimbo mkhristu, mbwenye babache akhali Mgriki.

²Anyakukhulupira onsene a mu Listara na Ikonio adalonga udidi wa Timoti.

³Paulo adafuna kumkwata kuti aende naye pabodzi paulendo pawo, natenepo adamgwanda nsonga yachimuna. Paulo adachita tenepo thangwi Ayuda onsene akhakhala pambuto zenezo ale akhapidziwa kuti babache akhali Mgriki.

⁴Pikhagwanda iwo na m'maluwani, akhaenda mbadziwisa anyakukhulupira matongero, ale akhadaverana anyakutumwa na akulu a mpingo mu Yerusalemu kuti anthu aavere.

⁵Natenepo mipingo idawanga m'chikhulupiro, tenepo nsiku na nsiku gulu ikhainjipira-injipira.

⁶Paulo na anzache adagwanda na m'nthemba za Frigia na Galatia thangwi Mzimu Wakuchena hadaatawirise tayu kuti alalike mafala a Mulungu kunthemba ya Asia.

⁷Pidafika iwo m'madire a Misia, adayesa-yesa kuti apite m'nthemba ya Bitinia, mbwenye Mzimu wa Yesu hadaatawirise tayu kuchita tenepo.

⁸Natenepo iwo adagwanda na m'nthemba[21] ya Misia mbafika kumzinda wa Troa.

⁹Na mosiku mwache Paulo adaona kumasomphenya munthu wa kunthemba ya Makedonia aimira mbampempha mbati, “Bwerani kuno ku Makedonia, mutiphedzembo.”

¹⁰Sindzidzi pikhadaona Paulo masomphenya enewa, ife tidasasanyika kwenda ku Makedonia, thangwi tidapidziwa kuti Mulungu akhadatichemera kuti tikalalike Mphangwa Zadidi kuna anthu kweneko.

¹¹Tidapakira mwadiya kubuluka ku Troa mbatienderatu kumzinda wa Samotrake. Tenepo mangwana mwache tidenda na mtunda kumzinda wa Neapoli.

¹²Kubulukira kweneko tidenda ku Filipi, mzinda wakuveka m'nthemba ya Makedonia,[22] pontho anthu a mumzindamo akhali mzika za Chiroma. Kweneko tidamalako nsiku zizinji zene.

¹³Pa Nsiku Yakupuma tidenda kunja kwa mzinda m'khundu-khundu mwa mkulo. Tidanyerezera kuti kweneko kukhali mbuto yakupemphererako. Tenepo tidakhala pansi mbatilonga kuna akazi akhadagumanyikana penepo ale.

¹⁴Lidia wa kumzinda wa Tiatira akhali mbodzi wa akazi akhativesera ale. Iye akhali nyakugulisa nguwo zamsuzi wanyemba, pontho akhali wakupembedza Mulungu. Mbuya adafungula mtimache towera apivesedi pile pikhalonga Paulo.

¹⁵Pidamala batizwa iye pabodzi na a pabanjache, iye adatichemera mbati, “Ngakhala mwapidziwa kuti ine ndinedi nyakukhulupira wa Mbuya, tendenitu mphapo mukakhale kumusa kwanga.” Tenepo iye adatikhakhamiza basi kuti tiende.

¹⁶Nsiku inango pikhaenda ife kumbuto yakupemphererako, tidagumanikana na mtsikana. Iye akhali bitchu pontho akhadaphatwa na mzimu wakuipa, ule ukhamchitisa kuti alotere pya m'tsogolo. Iye akhadzesera ambuyache kobiri pyakwanga na kulotera kwacheko.

¹⁷Iye akhatewera m'nduli mwa Paulo na ife mbakhuwa mbati, “Amunawa mbanyabasa a Mulungu Wakudzulu-dzulu! Iwo akukupangani njira zakupulumukira.”

¹⁸Mtsikanayo adachita penepi nsiku zizinji zene, kufikirana Paulo adazhangali pyakwanga mwakuti adazungunuka mbalonga kuna mzimuwo mbati, “Na dzina ya Yesu Khristu ndinakutonga kuti ubuluke muna iye!” Ndzidzi onthowo Mzimu udabulukiratu muna iye.

¹⁹Pidapidziwa ambuyache kuti mwayi wakugumana kobiri kudzera muna mtsikana ule waenda, iwo adaphata Paulo na Sila mbaakwekwetera kumsika kuti akaonane na akadamu.

²⁰Tenepo adadza nawo kuna anyakutonga miseru a Chiroma mbalonga mbati, “Anthuwa mba Ayuda, mphapo akudzesa nyatwa mumzinda mwathu muno.

²¹Iwo akufunzisa mitemo yokhonda tawiriswa na matongero athu; ife ndife mzika za Chiroma, tenepo ife nkhabe tawira mitemo yeneyi penu na kuiphata kwene tayu.”

²²Penepo mwinji wa anthu udaguduka kamenya Paulo na Sila. Tenepo anyakutonga miseru adang'amba nguwo za Paulo na Sila mbaatonga kuti akwapulwe.

²³Pidamala iwo kuakwapula pyakwanga, adenda nawo kaaponya m'perezo, tenepo nyakuonera perezoyo adapangwa kuti aafungire mwadidi.

²⁴Na kutongwaku, nyakuonera ule adaaponya m'subi ya m'bwaloletu mbaamanga matandadza.

²⁵Pachiti-chiti Paulo na Sila akhapemphera na kuimba nyimbo kuna Mulungu, tenepo anyaperezo anango akhaavesera.

²⁶Vumbu-vumbu pakhali chiteke-teke chikulu mwakuti na maziko ene a perezo ile adatekenyeka. Penepo pene misuwo yonsene idafunguka, pontho njema zidamangwa na anyaperezo zidalera.

²⁷Nyakuonera perezo ule adalamuka. Pidaona iye kuti misuwo ya perezo yafunguka, adanyerezera kuti anyaperezo akhadathawamo. Tenepo iye adasolola talasadache mbafuna kupipha yekha ene.

²⁸Mbwenye Paulo adakhuwa mwakugaluza fala mbati, “Leka kupikwaza wekha ene! Tonsene tilipo!”

²⁹Tenepo nyakuonera ule adachemeresa nyale mbathamangira m'bwalomo mbagwa pamanyalo a Paulo na Sila mwakutetemera na mantha.

³⁰Tenepo adenda nawo kunja mbaavunza mbati, “Ambuya, ndinachita tani kuti ndipulumuke?”

³¹Iwo adatawira mbati, “Khulupira Mbuya Yesu, tenepo iwe na banjako munapulumuka.”

³²Tenepo iwo adalalika mafala a Mbuya kuna iye na kuna anango onsene akhali m'nyumba mwachemo.

³³Mosiku paora yonthoyo nyakuonera ule adaakwata mbaatsuka pironda pyawo. Penepo pene iye na banjache yonsene adabatizwa.

³⁴Kubuluka penepo iye adakwata Paulo na Sila mbaenda nawo m'nyumba mwache mbaapasa kudya; iye na banjache adakomerwa pyakwanga thangwi chinchino iwo adakhulupira Mulungu.

³⁵Na machibese mwache anyakutonga miseru adatuma asirikali kuna nyakuonera perezo ule kampanga kuti, “Alekeni anthuwo aende pyawo.”

³⁶Tenepo nyakuonera perezo ule adapanga Paulo mbati, “Anyakutonga miseru atuma mphangwa kuti iwe na Sila musudzulwe. Munakwanisa kwenda pyanu, natenepo ndokoni na mtendere.”

³⁷Mbwenye Paulo adalonga kuna asirikaliwo mbati, “Iwo nee adatonga mseru wathu tayu, mbwenye iwo adatikwapula pamaso pa anthu mbatiponya m'perezo, podi kwene kuti ife ndife mzika za Chiroma. Mphapo chinchino iwo akufuna kutibulusa m'chibiso-biso. Ife nyonyo pyathu! Iwo okha ene abwere kuno dzatibulusa.”

³⁸Tenepo asirikali ale adenda kalonga mafala enewa kuna anyakutonga miseru. Pidapiva iwo kuti Paulo na Sila akhali mzika za Chiroma adachita mantha.

³⁹Natenepo adenda kaapepesa mbaabulusa m'perezomo, tenepo adaapempha kuti abuluke mumzindamo.

⁴⁰Paulo na Sila adabuluka m'perezo mule mbaenda kumusa kwa Lidia. Kweneko adagumana anyakukhulupira mbalonga nawo mafala akuwangisa mtima mbaenda pyawo.