Read cisena MABASA 18 Bible Online

MABASA 18 - cisena bible

MABASA 18

¹Kubuluka penepo Paulo adabuluka ku Atene mbaenda ku Korinto.

²Kweneko adagumanako Myuda unango, dzinache Akila mbalwa wa dziko ya Ponto, ule akhadafika kwene chinchino kubulukira kudziko ya Italia pabodzi pene na mkazache Prisila, thangwi mfumu Klaudio akhadatonga kuti Ayuda onsene abuluke mumzinda wa Roma. Tenepo Paulo adenda kaaona

³mbakhala na kuphata basa nawo pabodzi, thangwi kobiri zache zikhabulukira pakusona nthembe zakusasanyira makumbi sasawa ninga basa ikhali na iwombo.

⁴Nsiku Zakupuma zonsene iye akhalonga na anthu m'nyumba yakupemphereramo mbayesa kunyengerera Ayuda pabodzi na Agriki.

⁵Pidafika Sila na Timoti kweneko kubulukira kunthemba ya Makedonia, Paulo akhalalika na kuchitira umboni kuna Ayuda ndzidzi onsene kuti Yesu ndi Khristu.

⁶Pidampokanya na kumtikana Ayuda, Paulo adaacheuza pakugubudza fumbi nguwo zache mbalonga kuna iwo mbati, “Ngakhala munatayika, mphyanu Penepyo. Ine basanga ndaphata. Ine nkhabeve namwe mathangwi. Kutomera chinchino ndinaenda pyanga kuna anthu okhonda khala Ayuda.”

⁷Tenepo iye adaasiya mbaenda pyache kakhala m'nyumba ya munthu unango wakukhonda khala Myuda, dzinache Tito Yusito, nyakupembedza Mulungu. Nyumbache ikhali yakuphatana na nyumba yakupemphereramo.

⁸Khrisipo, mkadamu wa nyumba yakupemphereramo ile pabodzi na banjache yonsene adakhulupira Mbuya, pontho anthu anango azinji a mu Korinto adava Mphangwa Zadidi mbakhulupira, tenepo onsene adabatizwa.

⁹Mosiku unango Paulo adaona kumasomphenya Mbuya akulonga kuna iye mbati, “Leka chita mantha, mbwenye thimiza kwenda na kulonga, pontho leka siyira panjira.

¹⁰Thangwi ndili nawe pabodzi, tenepo nkhabe munthu anakwanisa dzakukuwaza tayu, thangwi anthu azinji mumzindamu mbanga.”

¹¹Natenepo Paulo adakhala kweneko chaka na miyezi mitanthatu kufunzisa anthu mafala a Mulungu.

¹²Pidapitiswa Galio kukhala mkadamu wa Chiroma wa nthemba ya Akaya, Ayuda adagumanyikana pabodzi mbaphata Paulo mbadza naye kuthando ya miseru.

¹³Iwo adalonga mbati, “Munthu weneyu akunyengerera anthu kuti apembedze Mulungu m'njira zakupokanyisana na mwambo wathu!”

¹⁴Mbwenye pidachita Paulo kuti alongembo, Galio adalonga kuna Ayuda mbati, “Mseru wenewu mbudakhala wakuti munthu achitira mwanzache pinthu pyakuipa penu adawa pikulu, tenepo mbapidakhala pyakuveka kuna ine kuti ndive kudungunya kwanu, imwe Ayuda.

¹⁵Mbwenye podi mphokanuyi nja pya mafala na madzina pontho na mwambo wanu, penepyo mphyanu mupitonge mwekha ene. Ine nkhabe tonga mseru ninga wenewu tayu.”

¹⁶Tenepo iye adaathamangisira kunja kwa thando ya miseruyo.

¹⁷Tenepo onsene adaphata Sostene, mkadamu wa nyumba yakupemphereramo mbammenyera m'thandomo pamaso pa Galio, mbwenye Galio hadapitsalakane penepi na pang'ono pene tayu.

¹⁸Paulo adathimiza kukhala mu Korinto nsiku zizinji zene pabodzi na anyakukhulupira. Tenepo adaasiya mbapakira m'mwadiya pabodzi na Prisila na Akila kwenda ku Siria. Mbadzati kubuluka na m'mwadiya ku Kenkerea, Paulo adachingwa mpala thangwi ya kudumbira kudachita iye pamaso pa Mulungu.

¹⁹Pidafika iwo kumzinda wa Efeso, Paulo adasiyako Prisila na Akila. Iye adenda kunyumba yakupempherera mbakalonga na Ayuda.

²⁰Anthu adampempha kuti akhale kweneko ndzidzi ukulu ene, mbwenye iye hadatawire tayu.

²¹Kwache pikhabuluka iye, adaapanga mbati, “Kungakhala kufuna kwa Mulungu ndinati ndibwere pontho.” Tenepo iye adapakira m'mwadiya mbaenda buluka ku Efeso.

²²Pidafika iye mumzinda wa Kesarea, adenda ku Yerusalemu mbakachedza na mpingo. Kubuluka penepo adenda ku Antiokea.

²³Pidamala iye ndzidzi ukulu ene kweneko, iye adabuluka mbaenda kunthemba za Galatia na Frigia kuwangisa mtima anyakukhulupira onsene.

²⁴Pandzidzi wenewo Myuda unango, dzinache Apolo, akhadabalwa mu Alekezandria ule, adadza ku Efeso. Iye akhali munthu wakudziwa kulonga pontho wakudziwa Malemba pyakwanga.

²⁵Iye akhadafunziswa Njira ya Mbuya, tenepo na chipapu chikulu iye adalalika na kufunzisa chadi-chadi pya Yesu. Kwache iye akhadziwa kwene ubatizo wa Yohani basi.

²⁶Tenepo iye adatoma kulonga mwakuwanga mtima m'nyumba yakupemphereramo. Pidamva Prisila na Akila, adamchemerera kumusa kwawo mbakampanga mwadidi pizinji pya Njira ya Mulungu.

²⁷Pidanyerezera Apolo pyakwenda ku Akaya, anyakukhulupira a mu Efeso adamphedza pakulembera kalata anyakukhulupira a mu Akaya kuapempha kuti amtambire mwadidi. Mphapo pidafika iye kweneko, akhali chiphedzo chikulu kuna anthu, ale na kukoma mtima kwa Mulungu, akhadasanduka anyakukhulupira.

²⁸Na kupokanya kwache kukulu iye adakunda nako Ayuda pakwecha pakuphatisa basa Malemba kuatsikimizira kuti Yesu ndi Khristu.