Read cisena MABASA 19 Bible Online

MABASA 19 - cisena bible

MABASA 19

¹Pikhali Apolo mu Korinto, Paulo adafamba na pamtunda m'nthemba za Asia mbafika ku Efeso. Kweneko adagumanako anyakukhulupira anango

²mbaavunza mbati, “Ayi mudatambira Mzimu Wakuchena pandzidzi udakhulupira imwe?” Iwo adatawira mbati, “Ife na kuva kwene nkhabe kuti kunja kuno kuna Mzimu Wakuchena.”

³Tenepo Paulo adavunza mbati, “Mphapo ubatizo udatambira imwe ngupi?” Iwo adatawira mbati, “Ubatizo wa Yohani.”

⁴Paulo adalonga mbati, “Yohani akhabatiza anthu adaleka pyakudawa pyawo ale. Iye adapanga anthu a m'dziko ya Israele kuti akhulupire ule akhabwera m'nduli mwache. Weneyu ndi Yesu.”

⁵Pidava anyakukhulupirawo penepi, adabatizwa na dzina ya Mbuya Yesu.

⁶Paulo adaasanjika manja, tenepo Mzimu Wakuchena adadza pana iwo; iwombo adatoma kulonga pilongero pyachilendo mbalonga mphangwa zakubulukira kuna Mulungu.

⁷Iwo onsene pabodzi akhali ninga amuna khumi na awiri.

⁸Paulo akhaenda kapita m'nyumba yakupemphereramo mbalonga na anthu mwakuwanga mtima miyezi mitatu. Iye adapokanyana nawo kuyesa kuanyengerera na pya Ufumu wa Mulungu.

⁹Mbwenye anango adaumisa mtima mbakhonda kukhulupira mbatoma kulongera pyakuipa Njira ya Mbuya pamaso pamwinji onsene. Natenepo Paulo adaasiya pyache mbaenda pabodzi na anyakukhulupira. Nsiku zonsene[26] iye akhalonga nawo m'nyumba yakufunzisira ya Tirano.

¹⁰Penepi pidachitika pyaka piwiri mwakuti anthu onsene a nthemba ya Asia, Ayuda pabodzi na anthu okhonda khala Ayuda, adava mafala a Mbuya.

¹¹Mulungu akhachita pyakudodomesa pyachilendo kudzera muna Paulo

¹²mwakuti na pitambaya pontho na nguwo zene zikhaphatisa iye basa zikhaendeswa kuna atenda. Tenepo atendawo akhawanga pontho mizimu yakuipa ikhabuluka muna iwo.

¹³Ayuda anango, akhafamba-famba kubulusa mizimu yakuipa ale, adayesambo kuphatisa basa dzina ya Mbuya Yesu kuchitira penepi. Iwo akhalonga kuna mizimu yakuipa ile mbati, “Ndikukutonga na dzina ya Yesu, ule ambalalika Paulo kuti ubuluke.”

¹⁴Ana achimuna anomwe a Skeva, Nyansembe Wamkulu wa Chiyuda, akhachita penepi.

¹⁵Mbwenye mzimu wakuipa udalonga kuna iwo kuti, “Yesu ndimbamdziwa, pontho Paulo ndimbamdziwa, apo imwe ndimwe ani?”

¹⁶Tenepo munthu akhaphatwa na mzimu wakuipa ule, adaanumphira mwamphamvu mbaakunda onsene, kuakuwaza pikulu pene mwakuti iwo adabuluka chipezi-pezi na kuthamanga m'nyumba mwachemo.

¹⁷Ayuda na anthu okhonda khala Ayuda onsene a mumzinda wa Efeso, pidava iwo penepi, adagoswerwa pyakwanga. Tenepo dzina ya Mbuya Yesu idalemedzwa pikulu.

¹⁸Anyakukhulupira azinji adadza mbatawira pakwecha na kubweka pyakuipa pyonsene pikhadachita iwo.

¹⁹Anyamatsenga azinji adagumanya mabukhu awo pabodzi mbaapisa pakwecha. Pidalengesa iwo konta ya kobiri ya mabukhu ale, idakwana masiliva pikwi makumashanu.

²⁰Tenepo na njira yeneyi mafala a Mbuya adakula mwamphamvu[27] mbavekeswa konsene kwene.

²¹Pidamala chitika penepi, Paulo adanyerezera[28] pyakwenda ku Yerusalemu kudzera na m'nthemba ya Makedonia na Akaya. Iye adalonga mbati, “Ndingabuluka kweneko, mphyakuthema kuti ndikachedzembo kumzinda wa Roma.”

²²Tenepo iye adatuma anyakumphedzache awiri, Timoti na Erasito, kwenda ku Makedonia. Mbwenye iye adasala mbakhala nsiku zizinji kunthemba ya Asia.

²³Ndzidzi wenewu mukhali nyatwa zikulu mu Efeso thangwi ya Njira ya Mbuya.

²⁴Munthu unango, dzinache Demetrio, nyakufula utale wa siliva, adasasanya mifanikizo yasiliva yakuoneka ninga nyumba yakupembedzeramo milungu yawo, Aritemi. Basa yeneyi ikhaganyalisa anyabasa pyakwanga.

²⁵Natenepo iye adachemera onsene pabodzi, na anango ale basawo ikhalimbo sasawa ninga yawoyi mbalonga kuna iwo mbati, “Amunamwe, imwe mukupidziwa kuti mfumathu imbabulukira m'basa yeneyi.

²⁶Imwe mukuona na kuva mwekha ene pinachita Paulopi. Iye akulonga kuti milungu yakusasanywa na anthu si milungubi, pontho iye akunyengerera na kubausa anthu azinji a mu Efeso muno pontho na anthu onsene a m'nthemba ya Asia.

²⁷Penepa kugoswa kwache nkhwakuti malondathuwa anakwata mbiri yakuipa. Si pyokhapyo tayu, kugoswa kwinango nkhwakuti nyumba yakupembedzeramo milungu ikulu, Aritemi, inasanduka yakusowa basa, pontho kuti na ukulu wa milunguyi yakupembedzwa na anthu onsene mu Asia pontho na dziko yonsene unavungikiratu!”

²⁸Pidava mwinji mafala enewa, adazhangali mbatoma kukhuwa mbati, “Mkulu ndi Aritemi wa ku Efeso!”

²⁹Chimpiningu chidafalikira mumzinda monsene mule. Tenepo mwinji ule udaphata Gayo na Aristariko, amuna awiri a ku Makedonia, ale akhafamba pabodzi na Paulo, mbathamangira nawo kuthando yakusenzekera.

³⁰Paulo akhafuna kaimira pamaso pamwinji ule, mbwenye anyakukhulupira hadamtawirise tayu.

³¹Akadamu anango a nthemba za Asia, ashamwali ache ale, adamtumira mphangwa kumpempha kuti aleke kapionesera m'thando yakusenzekerayo.

³²Pandzidzi onthowo mwinji onsene ukhali pachimpiningu. Anango akhakhuwa pyawombo, anangombo pyawombo, thangwi azinji ene hakhadziwa tayu chikhadagumanyikirana iwo.

³³Ayuda adagwinyira Alekezanda kutsogolo kwa anthu, tenepo anthu anango m'mwinjimo akhampanga pyakuti iye alonge. Tenepo Alekezanda adakwiza manjache m'dzulu kumatamisa anthu mbayesa kulonga mafala akupitchinjiriza nawo,

³⁴mbwenye pidadzindikira mwinji ule kuti iye akhali Myuda, onsene pabodzi adakhuwa chinthu chibodzi maora mawiri mbati, “Mkulu ndi Aritemi wa ku Efeso!”

³⁵Pakumalisa nyakulemba wa mumzinda adakwanisa kumatamisa mwinjiwo mbalonga mbati, “Imwe Aefeso, monsene mukupidziwa kuti mzinda wa Efeso ngwakukoyeramo nyumba yakupembedzeramo Aritemi pontho wa mwala wakupambulika ule udagwa kudzulu.

³⁶Nkhabe munthu na mbodzi ene anakwanisa kukhonda penepi tayu. Natenepo mphyakuthema kuti mumatame, pontho lekani chita pinthu mwammangu-mangu.

³⁷Imwe mwadza na amunawa pano akuti nee adaba pinthu pya m'nyumba zakupembedzeramo tayu penu kushola milungu yathu Aritemi nkhabe.

³⁸Ngakhala Demetrio na amisiri anzache ana mseru na munthu, atongi tili nawo, ale anakwanisa kutonga miseru m'mathando a miseru pansiku zache. Tenepo miseru yawo anakwanisa katongerwa konthoko.

³⁹Mbwenye ngakhala munafuna thimiza pinthu pinango kupiringana penepi, mphyakuthema kuti pitongwe pamgumano wa mzika za mu Efeso wakutawiriswa na Boma.

⁴⁰Na pyachitika leropi pana kugoswa kwakuti ife tinatongwa thangwi ya kuchita chimpiningu. Nkhabe thangwi yakukwana kuchita chimpiningu, tenepo angativunza, tinasowa chakutawira.”

⁴¹Pidamala iye kulonga penepi, adabalalisa mwinjiwo.