Read cisena MABASA 2 Bible Online

MABASA 2 - cisena bible

MABASA 2

¹Pidafika Nsiku ya Pentekosti anyakukhulupira onsene adagumanyikana pabodzi m'nyumba.

²Vumbu-vumbu kudaveka dungu ninga ya mphepo ikulu kubulukira kudzulu mbidzala nyumba yonsene mukhali iwo mule.

³Tenepo adaona pinango pyakuoneka ninga malulume a moto ule udabalalika mbuphamira anthu onsene mwenemo kada munthu.

⁴Iwo onsene adadzazwa na Mzimu Wakuchena mbatoma kulonga pilongero pyachilendo ninga mudaalongesera Mzimuyo.

⁵Penepo pakhali Ayuda akukhala mu Yerusalemu, anthu akugopa Mulungu ale akhadabwera kubulukira kumadziko onsene a pansi pano.

⁶Pidaveka dungu ile, anthu azinji pyakwanga adagumanyikana. Onsene adadodoma, thangwi onsene a iwo adava chilongero chache chene chikulongwa na anyakukhulupirawo.

⁷Iwo adadodoma mbamalwa nzeru, tenepo adalonga mbati, “Ayi anthu onsene analongawa si Agalilea enewa tayu?

⁸Mphapo pyakhala tani kuti tonsene tikuava akulonga na pilongero pya mtundu wathu ene?

⁹Ife tabulukira kumadziko a: Paritia, Media na Elamu; Mesopotamia, Yudea na Kapadokia; ku Ponto na Asia,

¹⁰ku Frigia na Pamfilia, ku Iguputo na nthemba za Libia chifupi na ku Kirene. Anango a ife abulukira ku Roma,

¹¹Ayuda na anango ale ambateweza pya Chiyuda. Anango a ife ngaku Krete na ku Arabia; mbwenye tonsene tikuava akulonga m'pilongero pyathu pya pinthu pikulu pyachita Mulungu!”

¹²Onsene adadodoma mbamalwa nzeru, tenepo adavunzana unango na mwanzache mbati, “Penepi pikulonganji?”

¹³Mbwenye anthu anango adaadzeda mbati, “Anthu enewa aledzera!”

¹⁴Tenepo Peturo adaimira pabodzi na anyakutumwa anango khumi na mbodzi ale. Iye adalonga kuna mwinji wa anthu onsene ule mwakugaluza fala mbati, “Imwe Ayuda na imwe monsene mumbakhala mu Yerusalemu muno, veserani kuno, ndikupangeni kuti penepi pikulonganji:

¹⁵Anthu enewa hadaledzere ninga munanyerezera imwe tayu, ano ndi machibese ene ora yachifemba.

¹⁶Mbwenye penepi mphile pikhadalongwa kale ene na mprofeti Yowele kuti,

¹⁷‘Mulungu adalonga kuti: Ipi mphile pinafuna ine dzachita nsiku zakumalisa. Ndinakhuthulira Mzimu wanga pana anthu onsene. Ananu achimuna na achikazi analonga mphangwa zakubulukira kuna ine; aphale anu anaona masomphenya, pontho nkhalamba zanu zinalota ndoto.

¹⁸Ande, nsiku zenezo, ndinakhuthulira Mzimu wanga pana anyabasanga, amuna na akazi ene, tenepo analalika mphangwa zanga.

¹⁹Ndinachita pyakudodomesa kuthambo ya kudzulu pontho na pidzindikiro pansi pano. Panakhala chiropa, moto na utsi ukulu;

²⁰dzuwa inaswipiswa na mdima, pontho mwezi unasanduka wakufira ninga chiropa, mbidzati fika nsiku ikulu yademelero, Nsiku yakudza pontho kwa Mbuya ile.

²¹Penepo anthu onsene ale anachemera Mbuya kuti aaphedze, anapulumuswa.’

²²“Imwe, Aisraele anzanga, ngavani mafalawa! Yesu wa ku Nazareti akhali munthu ule adatsikimizirwadi na Mulungu kuna imwe na pyakudodomesa pontho pidzindikiro pyonsene pidachita Mulungu kudzera muna iye. Imwe mukupidziwa kale, thangwi pidachitika pakati panu.

²³Na kufuna kwa Mulungu pontho na kudziwiratu kwache, Yesu adaperekwa m'manja mwanu. Imwe mudampha pakumpereka kuna anthu akuipa towera amkhomere pamtanda.

²⁴Mbwenye Mulungu adamulamusa kuimfa, mbamsudzula panyatwa zikulu za imfa, thangwi pikhali pyakuchimwanika kuti imfa imkhazike paunyaperezo.

²⁵Davite adalonga pya iye mbati, ‘Ndidamuona Mbuya pamaso panga, iye ali chifupi na ine ndzidzi onsene, natenepo ine nkhabe dzatekenyeka tayu.

²⁶Natenepo mtimanga wakomerwa, pontho lulume yanga yasekera, na manungo anga ene anakhala m'chidikhiro,

²⁷thangwi imwe nkhabe dzandisiya kudziko ya anthu akufa, penu kuleka nyabasanu wakukhulupirika kuti avunde m'masiye tayu.

²⁸Mwandionesa njira zakundiendesa kumoyo, pontho munandidzaza na kusekera pamaso panu.’

²⁹“Abale anga, ndinakwanisa kulonga namwe pakwecha pya kholo wathu wakudziwika Davite. Iye adafa mbafikhirwa, tenepo nthumbi yache ili kuno na lero.

³⁰Iye akhali mprofeti, tenepo adadziwa pidampanga Mulungu: Mulungu adadumbira kuti mbodzi mwa pidzukulu pyache ndiye anapita ufumu wache.

³¹Davite adaona pile pikhafuna dzachitika kutsogolo, tenepo adalonga pya kulamuka kwa Khristu kuimfa mbati, ‘Iye hadasiyiwe kudziko ya anyakufa tayu; pontho manungo ache hadavunde m'masiye tayu.’

³²“Yesu ontho-onthoyu adalamuswa na Mulungu kuimfa mbakhala na moyo. Tonsenembo ndife mboni za penepi.

³³Iye adakwizwa mbakakhala kudzanja yamadyo ya Mulungu mbatambira Mzimu Wakuchena ule akhadadumbira Babache kuti anampereka. Tenepo iye adatikhuthulira mtukwa unaona imwe na kuuva chinchino.

³⁴Si Davite adakwira kwenda kudzulu tayu, mbwenye iye adalonga mbati, ‘Mbuya adalonga kuna Mbuyanga kuti: Khala pano kumadyo kwanga

³⁵kufikirana ndiikhe anyamalwako ninga chakusanjikirapo manyalo ako.’

³⁶“Natenepo Aisraele onsene apidziwedi kuti: Yesu adakhomera imwe pamtanda ule, Mulungu amuikha kukhala Mbuya pontho Khristu.”

³⁷Pidava anthu penepi, pidaalasa mtima, tenepo adavunza Peturo na anyakutumwa anango ale mbati, “Abale, tinachita tani ife?”

³⁸Penepo Peturo adaapanga mbati, “Monsene muleke pyakudawa pyanu mbamubatizwe na dzina ya Yesu Khristu. Tenepo Mulungu analekerera pyakudawa pyanu mbakupasani mtukwache, Mzimu Wakuchena.

³⁹Mulungu adumbira kuti iye anachita penepi kuna imwe na ananu na kuna anthu onsene akutali, onsene ale anachemerwa na Mbuya Mulungu wathu.”

⁴⁰Peturo adalonga kuna iwo mafala anango azinji mbaadembetera mbati, “Pipulumuseni mwekha ene kunyatwa zile zinabwera pana anthu akuipawa!”

⁴¹Tenepo anthu ale adatawira mphangwa zache adabatizwa. Nsiku yonthoyo anthu pikwi pitatu adathimizirika pagulu pawopo.

⁴²Iwo adavera chifunziso cha anyakutumwa mbakhala akuphatizana, kumenya mkate pabodzi kukumbuka Mbuya, pontho na kupemphera pabodzi na mtima onsene.

⁴³Anthu onsene adadzazwa na mantha, thangwi ya pyakudodomesa na pidzindikiro pizinji pile pikhachitwa na anyakutumwa.

⁴⁴Anyakukhulupira onsene adathimiza kukhala mukuphatizana mbagawana pinthu pyawo pyonsene unango na mwanzache.

⁴⁵Akhagulisa nyumba zawo na pinthu pikhali na iwo, towera agawize kobirizo kuna munthu onsene malingana na kusowa kwache.

⁴⁶Nsiku na nsiku adagumanyikana pabodzi m'Nyumba ya Mulungu, mbamenya mkate pabodzi m'misa mwawo kudyerana na mtima wakukomerwa na wakupichepesa,

⁴⁷mbakuza Mulungu. Tenepo anthu onsene adakomerwa nawo. Nsiku zonsene Mbuya akhathimizira gulu yawoyo na anthu akhapulumuswa ale.