Read cisena MABASA 20 Bible Online

MABASA 20 - cisena bible

MABASA 20

¹Pidamala chimpiningu, Paulo adagumanyisa anyakukhulupira mbagonekana nawo na mafala akuawangisa mtima. Tenepo adaasiya mbaenda kunthemba ya Makedonia.

²Iye adenda kudzera m'nthembamo mbawangisa mtima anthu na mafala azinji. Pakumalisa iye adafika kunthemba ya Grisi.

³Kweneko adakhalako miyezi mitatu. Iye akhasasanyika kuti aende na m'mwadiya kudziko ya Siria, mbwenye pidapidziwa iye kuti Ayuda akhapangana pya kumpha, adanyerezera kubwerera kudzera ku Makedonia.

⁴Sopatro mwanache Piro, wa mumzinda wa Berea adenda naye pabodzi. Tenepo amunawa adachitambo chibodzi-bodzi: Aristariko na Sekundo a mumzinda wa Tesalonika; Gayo wa mumzinda wa Deribe; Tikiko na Trofimo a m'nthemba ya Asia; pontho na Timoti.

⁵Iwo adatsogola mbakatidikhira mumzinda wa Troa.

⁶Pidamala ife kudya Phwando ya Mikate yakusowa chakufufumisira, tidabuluka kuluwani ya Filipi mbatienda na m'mwadiya ku Troa. Pidagwanda nsiku zishanu, tidaphatana nawo ku Troako. Kweneko tidamalako dimingu yamumphu.

⁷Pa Sabudu[29] na mawulo tonsene tidagumanyikana pabodzi kumenya mkate kukumbuka Mbuya. Paulo adalonga kuna anthu ale kufikirana chiti-chiti thangwi akhaenda mangwana mwache.

⁸Nyale zizinji zikhadagaswa m'subi yapadzulu, mule mudagumanyikana ife.

⁹Pikhali Paulo m'kati kulonga, mphale unango, dzinache Yutiko, adakhala pazhanera ule, adatoma kuodzira. Tenepo adagona chitulo chikulu mbagwa pansi kubulukira m'nyumba yachitatu yapadzulu. Pidatchitha anthu pansi kamulokota, adamgumana afa kale.

¹⁰Mbwenye Paulo adatchitha pansipo, adapiponya pana iye mbamkhumbatira. Tenepo adalonga mbati, “Lekani dungunya, ali m'maso!”

¹¹Tenepo iye adakwira pontho m'dzulu mule mbamenya mkate kukumbuka Mbuya na kudyerana pabodzi. Pidamala iye kulonga nawo ndzidzi ukulu ene kufikirana kunja kuchena, iye adenda.

¹²Iwo adakwata mphaleyo mbaenda naye kumusa wamoyo pontho awangiswa pikulu pene mumtima mwawo.

¹³Tidatsogola kapakira m'mwadiya mbatienda kuluwani ya Asosi, kule kukhafuna ife kakwata Paulo kuti iye akapakire m'mwadiyawo. Iye akhadatipanga kuchita tenepo, thangwi iye akhaenda kweneko na mtunda okhokha.

¹⁴Pidatigumana iye mu Asosi, adapakira nafe m'mwadiya mbatienda kuluwani ya Mitelene.

¹⁵Mangwana mwache tidabuluka ku Mitelene mbatienda na m'mwadiya kuntchuwa ya Kiyo. Mkuchono mwache tidenda na m'mwadiya mbatikafika kuluwani ya Samo, pontho mtondo mwache tidafika kuluwani ya Mileto.

¹⁶Paulo akhadanyerezera pyakwenda na m'mwadiya kupiringana mzinda wa Efeso kuti aleke taya ndzidzi m'nthemba ya Asia. Iye akhachimbiza tenepo, towera akafike mu Yerusalemu pa Nsiku ya Pentekosti ngakhala pikhali pyakukwanisika.

¹⁷Kubulukira ku Mileto, Paulo adatumiza mphangwa ku Efeso kuchemera akulu a mpingo kuti adze kuna iye.

¹⁸Pidafika iwo, iye adalonga nawo mbati, “Imwe mukupidziwa mule mukhakhalira ine ndzidzi onsene udakhala ine namwe kubulukira pa nsiku yakutoma idafika ine m'nthemba ya Asia.

¹⁹Na misozi izinji pontho na kupichepesa kukulu ndikhaphata basa ya Mbuya ninga nyakutumikirache pandzidzi wa nyatwa, ule udandidzera thangwi Ayuda akhafuna kundipha.

²⁰Mukupidziwa kuti handidakubisireni chinthu na chibodzi chene chakukuphedzani tayu, mbwenye ndikhalalika na kufunzisa pakwecha pontho na m'nyumba mwanu.

²¹Ndidacheuza pikulu Ayuda na anthu okhonda khala Ayuda kuti aleke pyakudawa pyawo mbazungunukire kuna Mulungu pontho na kukhulupira Mbuyathu Yesu.

²²Tenepo chinchino mwakuvera Mzimu Wakuchena ndinaenda ku Yerusalemu, mbwenye pinafuna kandichitikira kweneko, nkhabe kupidziwa tayu.

²³Chinadziwa ine chene ntchakuti m'mizinda yonsene Mzimu Wakuchena andicheuza kuti maperezo na nyatwa pikundidikhira.

²⁴Mbwenye, ine nkhabe tsalakana tayu pya moyo wanga kuti ngwakufunika kuna ine; pinafuna ine pyene, mphyakuti ndimalise bitcha-bitchayu pontho ndimalise basa idandipasa Mbuya Yesu yakulalika Mphangwa Zadidi za kukoma mtima kwa Mulungu.

²⁵“Ndafamba-famba pakati panu monsene kulalika Ufumu wa Mulungu. Tenepo chinchino ndikupidziwa kuti nee mbodzi wa imwe anati andione pontho tayu.

²⁶Natenepo lero ndikukupangani mwakugogomeza kuti ngakhala unango anatayika, si inevebi, mphyachembo Penepyo.

²⁷Thangwi ine handidakubisireni tayu kukupangani pyonsene pinafuna Mulungu.

²⁸Tenepo mupiyang'anire mwekha ene pontho na gulu yonsene idakupasani Mzimu Wakuchena kuti muiyang'anire. Mukhale amakabuswa a mpingo wa Mulungu,[30] ule udapikwatira iye yekha ene kudzera muna imfa ya mwanache ninga nsembe.[31]

²⁹Ndikupidziwa kuti ine ndingabulukapo panabwera mibinzi yakugoswa pakati panu, tenepo iyo hinasiya mkumbi okhonda pheka tayu.

³⁰Ndzidzi unafika wakuti anthu a m'gulu mwanu monthomu analonga pyakunama kuti anyakukhulupira abuluke mbaatewera.

³¹Natenepo khalani m'maso mbamukumbuke kuti na misozi na misozi ndidafunzisa monsenene mosiku na masikati pyaka pitatu.

³²“Tenepo chinchino ndinakuperekani m'manja mwa Mulungu na kuna mphangwa za kukoma mtima kwache, zile zina mphamvu kuwangisa chikhulupiro chanu na kukupasani kutsanzaya, kule kwakoyera Mulungu anthu ache onsene.

³³Ine handidapikhumbire ndekha ene kobiri penu nguwo za munthu na mbodzi ene tayu.

³⁴Imwe mwekha ene mukupidziwa kuti ndidaphata basa na manjangawa kuti ndigumane pinthu pyonsene pikhasowa ine pabodzi na anzanga.

³⁵Ine ndakuonesani pyonsene kuti pakuphata basa mwakuwangisa ninga tenepo, tathema kuphedza ale ana chikhulupiro chakuchepa, kukumbuka mafala adalonga Mbuya Yesu yekha ene kuti, ‘Kupasa kumbatsanzayisa pikulu kusiyana na kutambira.’ ”

³⁶Pidamala Paulo kulonga penepi, adagodama pabodzi na anthu onsene ale mbapemphera.

³⁷Onsene akhalira pikhamkhumbatira iwo na kumpsompsona kugonekana naye.

³⁸Chidaaliza pikulu ntchakuti iye adalonga kuti iwo nee anamuonavebi. Tenepo iwo adenda naye kamperekeza kumwadiya.