Read cisena MABASA 21 Bible Online

MABASA 21 - cisena bible

MABASA 21

¹Pikhadagonekana ife nawo, tidenderatu na m'mwadiya kuntchuwa ya Kosi. Mangwana mwache tidafika kuntchuwa ya Rodesi. Kubuluka kweneko tidenda kuluwani ya Patara.

²Kweneko tidagumana mwadiya wakwenda kudziko ya Fonike, natenepo tidenda kapakira mwadiya mbatienda.

³Tidafika panango pakuti tidakwanisa kuona ntchuwa ya Kipro, tenepo tidenda chakumwera kwa ntchuwayo mpakana kudziko ya Siria. Tidenda na gombe-gombe kuluwani ya Turo, thangwi mwadiya ukhafuna katchithisako mitolo.

⁴Kweneko tidagumana anyakukhulupira anango mbatikhala nawo dimingu ibodzi. Na mphamvu za Mzimu Wakuchena iwo adapanga Paulo kuti aleke kwenda ku Yerusalemu.

⁵Mbwenye pidamala ndzidzi wathu wakuti tikhale nawo, tidaasiya mbatienda na njirathu. Anyakukhulupira onsenewa, pabodzi na akazawo na anawo, adenda nafe pabodzi kunja kwa mzinda kugombe. Kweneko tidagodama pansi mbatipemphera.

⁶Tidagonekana unango na mwanzache mbatipakira m'mwadiya, tenepo iwo adabwerera m'misa mwawo.

⁷Tidathimiza ulendo wathu na m'mwadiya, kubulukira ku Turo kwenda kuluwani ya Pitoloma. Kweneko tidachedza na anyakukhulupira mbatikhala nawo nsiku ibodzi.

⁸Mangwana mwache tidenda mbatifika kuluwani ya Kesarea. Kweneko tidakhala kumsuwo kwa Filipi, nyakulalika Mphangwa Zadidi pontho mbodzi wa amuna anomwe, akhadasankhulwa kukhala anyakuphedzera mu Yerusalemu ale.

⁹Iye akhali na ana achikazi anayi okhonda sembwa, ale akhalonga mphangwa zakubulukira kuna Mulungu.

¹⁰Pidakhala ife kweneko nsiku zizinji, mprofeti unango, dzinache Agabo, adafika kubulukira kunthemba ya Yudea.

¹¹Iye adadza kuna ife mbakwata bande ya Paulo mbapimanga nayo yekha ene miyendo na mikono yache mbalonga mbati, “Penepi ndiye pyalonga Mzimu Wakuchena kuti: Mwenechiro bandeyu anamangwa na Ayuda mu Yerusalemu sasawa ninga tenepa, mbampereka m'manja mwa anthu okhonda khala Ayuda.”

¹²Pidava ife penepi, ife na anango penepo tidampempha Paulo kuti aleke kwenda ku Yerusalemu.

¹³Mbwenye iye adatawira mbati, “Pinachita imwe ninji kulira na kunditsukwalisa pikulu tenepa? Ine ndasasanyika nee kumangwa kokha tayu, mbwenye na kufa kwene mu Yerusalemu, thangwi ya Mbuya Yesu.”

¹⁴Tidachimwana kumnyengerera, natenepo tidamleka mbatilonga mbati, “Mbuya mbachite kufuna kwache.”

¹⁵Pidamala ife nsiku pang'ono kweneko, tidasasanyika mbatienda ku Yerusalemu.

¹⁶Anyakufunza anango a ku Kesarea adenda nafe pabodzi mbatiendesa kumusa kwa munthu unango, dzinache Mnasoni, kule kudenda ife kakhala.[32] Iye akhali wakubulukira ku Kipro pontho akhali nyakukhulupira wakale na kale.

¹⁷Pidafika ife mu Yerusalemu, anyakukhulupira adatitambira na kukomerwa.

¹⁸Mangwana mwache Paulo pabodzi na ife tidenda kaona Yakobo pontho akulu onsene a mpingo akhali penepo.

¹⁹Paulo adaapasa mwenyikiro mbaapanga pyonsene pikhadachita Mulungu pakati pa anthu okhonda khala Ayuda, thangwi ya basa idaphata iye.

²⁰Pidava iwo penepi, onsene adakuza Mulungu. Tenepo iwo adalonga kuna Paulo mbati, “Mbale Paulo, mukuona mwekha kuti pikwi pizinji pya Ayuda asanduka anyakukhulupira, pontho mule munawanga-wanga iwo onsene kuvera mwambo wa Mose.

²¹Iwo apangwa kuti imwe mumbafunzisa Ayuda onsene ale ambakhala pakati pa anthu okhonda khala Ayuda kuti akhonde vera mwambo wa Mose pakuapanga kuti aleke gwanda nsonga yachimuna ya anawo penu kuteweza mitemo ya Chiyuda.

²²Mphapo tinachita tani? Iwo anati apive kuti mwabwera.

²³Natenepo muchite pinakupangani ifepi. Pano pana amuna anayi, ale adumbira pamaso pa Mulungu.

²⁴Ndokoni nawo pabodzi muchite nawo mwambo wakupichenesa mbumupagali kobiri zawo, towera iwo akwanise kuchinga tsisi yawo[33] Mungachita tenepo anthu onsene anadziwa kuti pinthu pyonsene pinalonga iwo pya imwe mphyakunama, pontho kuti imwe mwekha mumbatewezadi mwambo wa Mose.

²⁵Mbwenye kulonga pya anthu okhonda khala Ayuda adasanduka anyakukhulupira ale, taalembera kalata kuapanga kuti ife tanyerezera kuti aleke kudya nsembe zakuperekwa kuna mifanikizo, penu kudya chiropa, penu nyama zokhonda chekwa, pontho kuti aleke chita uputa.”

²⁶Natenepo mangwana mwache Paulo adakwata amuna ale mbachita nawo pabodzi mwambo wakupichenesa. Tenepo iye adenda ku Nyumba ya Mulungu mbaadziwisa anthu pya nsiku zakumala kwa mwambo wakupichenesawo pontho na ndzidzi wakupereka nsembe kada munthu.

²⁷Pidasala pang'ono kuti nsiku zinomwe za mwambo wakupichenesa zimale, Ayuda anango a kunthemba ya Asia adaona Paulo m'Nyumba ya Mulungu. Iwo adazhangalisa mwinji onsene ule, mbamphata Paulo.

²⁸Iwo adakhuwa mbati, “Imwe amuna a m'dziko ya Israele, tiphedzenimbo! Munthu weneyu ngule ambaenda konsene kwene kufunzisa anthu onsene kupokanyisana na anthu a Israele, mwambo wa Mose, pontho na pya Nyumba ya Mulunguyi. Pontho si pyokhapyo tayu, iye adza na anthu okhonda khala Ayuda m'Nyumba ya Mulungu pontho kuswipisa mbuto yakuchenayi!”

²⁹Iwo adalonga tenepo thangwi akhadaona Trofimo wa ku Efeso pabodzi na Paulo mumzindamo mbanyerezera kuti Paulo akhadampitisa m'Nyumba ya Mulungu.

³⁰Mumzinda monsene mukhali chimpiningu. Tenepo anthu onsene adathamanga pabodzi kaphata Paulo mbamkwekwetera kunja kwa Nyumba ya Mulungu. Kabodzi na kabodzi misuwo ya Nyumba ya Mulungu idafungwa.

³¹Pikhayesa mwinjiwo kupha Paulo, mphangwa zidatumizwa kuna mkadamu wa magulu onsene a anyankhondo wa Chiroma kuti anthu onsene a mu Yerusalemu ali pachimpiningu.

³²Kabodzi na kabodzi mkadamu wamkuluyo adakwata akadamu anango a nkhondo na anyankhondo mbatchithira na kuthamanga kukhali mwinji ule. Pidaona anthuwo kuti mkadamu wamkuluyo akudza pabodzi na anyankhondo, adaleka kumphiphitha Paulo.

³³Mkadamu wamkuluyo adafika kuna Paulo mbammanga. Tenepo adatonga kuti amangwe na njema ziwiri mbavunza mbati, “Munthu weneyu mbani, pontho asosanji?”

³⁴Anango m'mwinjimo adakhuwa pyawo, anangombo adakhuwa pyawombo, mwakuti mkadamu wamkulu ule adachimwana kudziwa chadi-chadi chikhadachitika, thangwi ya chimpiningucho. Natenepo iye adatonga amunache kuti amkwate Paulo kwenda naye kumpanda wa anyankhondo.

³⁵Pidafika Paulo pamanera a mpandawo, anyankhondo ale adamthukula, thangwi mwinjiwo udapenga pyakwanga.

³⁶Iwo akhamtewera m'nduli mwache uku akukhuwa mbati, “Mpheni!”

³⁷Pikhali anyankhondowo chifupi kupitisa Paulo mumpanda, iye adavunza mkadamu wamkulu ule mbati, “Munanditawirisambo kuti ndilonge namwe?” Mkadamu wamkulu ule adamvunza mbati, “Ayi umbalonga Chigriki?

³⁸Ayi iwe si iwe munthu wa kudziko ya Iguputo tayu, ule adalamusa chimpiningu chakupandukira boma pyaka pyapitapyo mbutsogolera mapanga pikwi pinayi kwenda kuthando yatchetcha?”

³⁹Paulo adatawira mbati, “Ine ndine Myuda, mbalwa ya mumzinda wa Tariso m'dziko ya Kilikia, mzika ya mumzinda wakufunika. Mphapo nganditawirisenimbo kuti ndilonge kuna anthuwa.”

⁴⁰Mkadamu wamkulu ule adamtawirisa kuti alonge. Natenepo Paulo adaimira pamanera mbakwiza manjache m'dzulu kumatamisa anthu. Pidamatama iwo, Paulo adalonga na chilongero cha Chiyuda mbati,