Read cisena MABASA 23 Bible Online

MABASA 23 - cisena bible

MABASA 23

¹Paulo adayang'ana phanamana anyathando onsene ale mbalonga mbati, “Aisraele anzanga, ine ndaphata pinthu pyonsene pamaso pa Mulungu na chikumbu mtima chakusowa chinthu na chibodzi chene chakupokanyisa mpakana lero.”

²Nyansembe Wamkulu, Hanania, adapanga amuna ale akhaimira chifupi na Paulo kuti ammenye pamulomo.

³Mbwenye Paulo adalonga kuna iye mbati, “Mulungu anakumenyambo, iwe fufu yakukhwazwa mtoto.[34] Iwe wakhala penepo kunditonga pakuteweza mwambo, mphapo ninji ukuswa mwambowo pakupanga anthu kuti andigase mbama!”

⁴Anthu akhali chifupi na Paulo ale, adalonga kuna iye mbati, “Iwe ukutikana Nyansembe Wamkulu wa Mulungu!”

⁵Paulo adatawira mbati, “Aisraele anzanga, ine nee ndikhapidziwabi kuti iye ndi Nyansembe Wamkulu. Malemba akulonga kuti, ‘Lekani kulongera pinthu pyakuipa akadamu a anthu anu.’ ”

⁶Pidaona Paulo kuti anango mwa anthu ale akhali Asaduki pontho kuti anango akhali Afarisi, iye adalonga mwakugaluza fala m'Thandomo mbati, “Aisraele anzanga, ine ndine Mfarisi, pontho mwana Mfarisi. Ndikutongwa lero, thangwi ya chidikhiro changa chakuti anthu akufa analamuka mbakhala pontho na moyo.”

⁷Pidalonga iye penepi, Afarisi na Asaduki adatoma kupokanyisana, pontho guluyo idagawikana.

⁸Thangwi Asaduki akhalonga kuti anthu nkhabe dzalamuka kuimfa pontho kuti nkhabe angelo na mizimu, mbwenye Afarisi akhakhulupira pyonsene pitatupi.

⁹Kukhuwa kule kudakula pyakwanga, tenepo anango a afunzisi a mwambo a m'gulu ya Afarisi adaimira mbapokanya pikulu mbati, “Ife nee tikuona kudawa kwa munthuyubi! Mwinango mzimu penu mngelo alongadi naye!”

¹⁰Tenepo mphoka ile idakula pyakwanga mwakuti mkadamu wamkulu ule adachita mantha kuti Paulo ananyedzwa-nyedzwa. Tenepo iye adapanga anyankhondo ache kuti atchithe kambulusa Paulo m'gulumo mbaenda naye kumpanda.

¹¹Mosiku mwache Mbuya adaimira chifupi na Paulo mbalonga mbati, “Leka chita mantha! Iwe wandichitira umboni mu Yerusalemu muno, tenepo wathema kuchita chibodzi-bodzi kumzinda wa Roma.”

¹²Mangwana mwache na machibese Ayuda anango adagumanyikana pabodzi mbasasanya njira yakuphera Paulo. Iwo adadumbira kuti hanadya na kumwa pinthu tayu mpakana aphe Paulo basi.

¹³Anthu onsene pabodzi, akhasasanya njira yeneyi ale, adapiringana makumanayi.

¹⁴Tenepo iwo adenda kuna anyansembe akulu na akulu-akulu mbakalonga mbati, “Ife pabodzi tadumbira kuleka kudya na chinthu chene mpakana tapha Paulo.

¹⁵Mphapo chinchino, imwe na a m'Thando ya miseru ya Chiyuda mutumize mphangwa kuna mkadamu wamkulu kuti adze na Paulo khala ninga kuti imwe munafuna kuvunzisa pya mseru wache. Mbwenye ife tinasasanyika kuti timphe mwenemo iye mbadzati fika kuno.”

¹⁶Mbwenye mwana nyamaingache Paulo adava pikhadaverana iwo pile. Natenepo iye adenda kumpanda kule mbakampanga Paulo.

¹⁷Tenepo Paulo adachemera mbodzi wa akadamu wa anyankhondo dzana mbalonga kuna iye mbati, “Kwatani mphaleyu muende naye kuna mkadamu wamkulu. Iye ana mafala akuti akampange.”

¹⁸Mkadamu wa anyankhondo dzana ule adenda nayedi kuna mkadamu wamkulu ule mbakalonga mbati, “Nyaperezo Paulo adandichemera mbandipempha kuti ndidze na mphaleyu kuna imwe thangwi ana mafala akuti alonge kuna imwe.”

¹⁹Mkadamu wamkulu ule adamphata pamkono mbaenda naye pakhundu mbamvunza mbati, “Ninji pinafuna iwe kundipanga?”

²⁰Iye adalonga mbati, “Ayuda averana kukupemphani kuti mangwana mudze na Paulo ku Thando ya miseru ya Chiyuda khala ninga Thandoyo ikufuna kuvesa mwadidi mseru wache.

²¹Mbwenye lekani kuphatisa basa pinalonga iwo thangwi pana amuna akupiringana makumanayi anafuna dzabisalira Paulo, towera amphate. Iwo adumbira kuti hanadya penu kumwa tayu mpakana aphe Paulo. Tenepo iwo asasanyika, pontho akudikhira kwene kuva pinafuna imwe kulonga.”

²²Mkadamu wamkulu ule adalonga mbati, “Leka kapanga munthu na mbodzi ene kuti iwe wandipanga penepi.” Tenepo adamgwinya.

²³Tenepo mkadamu wamkulu ule adachemera awiri mwa akadamu ache a anyankhondo dzana mbalonga mbati, “Sasanyani anyankhondo madzana mawiri pabodzi na amuna makumanomwe anyakupakira akavalo pontho na amuna madzana mawiri anyakuphatirira madipa kuti aende kumzinda wa Kesarea paora yachifemba mosiku uno.

²⁴Mpaseni Paulo akavalo anango kuti apakire pakwenda, pontho mumkwate mwadidi mpakana afike kuna Felikisi, mkulu wa boma.”

²⁵Tenepo mkadamu wamkulu ule adalemba kalata ninga tenepa:

²⁶“Felikisi nyakulemedzwa, tambirani mwenyikiro kubulukira kuna ine, Klaudio Lusiasi.

²⁷Ayuda adaphata munthu weneyo, pontho akhali chifupi kumpha. Pidapidziwa ine kuti iye ndi mzika ya Roma, ine na anyankhondo anga tidenda kamvunulira.

²⁸Ine ndikhafuna kuti ndidziwe thangwi ikhamsumira Ayuda, natenepo ndidamkwata mbandienda naye ku Thando yawo ya miseru.

²⁹Ndidagumana kuti iye hana mseru wakuti iye athema kufa nawo penu kuikhwa m'perezo tayu, kwache ikhali mphoka ene ya pya miyambo yawo.

³⁰Pidapangwa ine kuti iwo akhadaverana kumpha, ndidanyerezera kuti ndimtumize kuna imwe kabodzi na kabodzi. Pontho ndapanga anyakumsumira kuti adze na mseru wache kuna imwe.”

³¹Mosiku onthowo anyankhondo ale adakwata Paulo, ninga mudatongerwa iwo, mbaenda naye kuluwani ya Antipatri.

³²Mangwana mwache anyankhondo adabwerera kumpanda mbasiya anyakupakira akavalo ale, kwenda naye.

³³Iwo adafika kuluwani ya Kesarea mbasiya kalatayo kuna mkulu wa boma mbapereka Paulo m'manja mwache.

³⁴Tenepo mkulu wa boma adawerenga kalata ile mbavunza Paulo nthemba ikhabulukira iye. Pidapidziwa iye kuti akhabulukira kunthemba ya Kilikia,

³⁵iye adalonga mbati, “Ndinavesera mseru wako, anyakukusumira angafika.” Tenepo adatonga kuti Paulo ayang'anirwe mwadidi na anyankhondo kunyumba ya mkulu wa boma.