Read cisena MABASA 26 Bible Online

MABASA 26 - cisena bible

MABASA 26

¹Mfumu Agripa adalonga kuna Paulo mbati, “Unakwanisa chinchino kulonga mafalako.” Paulo adakwiza dzanjache m'dzulu mbatoma kupitchinjiriza tenepa:

²“Mfumu Agripa! Ndinapiyesa wamwayi lero kuti ndipitchinjirize pamaso panu pyonsene pinandilongera Ayudapi.

³Maka-maka podi imwe mumbapidziwa mwadidi pyonsene pya mitemo ya Chiyuda, pontho na pyonsene pimbapokanyana iwo. Natenepo ndikukupemphani kuti mundivesere mwakupirira.

⁴“Ayuda onsene akudziwa makhaliro anga kutomera uwananga. Anthu a kudziko kwathu pontho mumzinda wa Yerusalemu akudziwa pya moyo wanga onsene kubulukira pakutoma.

⁵Iwo onsene ambandidziwa na kale ene kuti ndikhali mbodzi wakutewera m'gulu ya Afarisi, yakupembedza pikulu kupiringana magulu anango. Iwo anakwanisa kuchitira umboni ngakhala anafuna.

⁶Tenepo chinchino ndaimira pano kuti nditongwe mseru thangwi ya chidikhiro changa pachinthu chidadumbira Mulungu kuna makolo athu kuti anachichita.

⁷Chinthu chonthochi ntchile chinadikhira madzinza khumi na awiri a anthu athu kutambira ninga munapembedzera iwo Mulungu na mtima onsene mosiku na masikati. Mfumu! Ayudawa akundilongera thangwi ya chidikhiro chenechi.

⁸Thangwi ninji mphapo, imwe anthu muli pano, mumbanyerezera kuti mphyakuchimwanika kukhulupira kuti Mulungu ambalamusa anthu akufa?

⁹“Ine ene ndekha ndidapinyerezera kuti ndathema kuchita pinthu pyonsene pyakukwanisika kulekesa anthu kukhulupira Yesu wa ku Nazareti.

¹⁰Penepi ndiye pidachita ine mu Yerusalemu. Ndidatambira utongi kuna anyansembe akulu mbandiikha m'perezo anthu a Mulungu. Pikhatongwa iwo kuti aphiwe, ine ndikhatawirizana napyo.

¹¹Ndzidzi uzinji ndikhaatchunyusa m'nyumba zakupemphereramo mbandiyesa kuakhakhamiza kukhonda chikhulupiro chawo pana Yesu. Ndikhazhangali nawo pyakwanga mwakuti ndidenda na kumizinda yakunja ene kaaboneresa.

¹²“Na thangwi yeneyi ndidenda kumzinda wa Damasiko na mphamvu pontho na utongi kubulukira kuna anyansembe akulu.

¹³Akhali masikati, ndili panjira kwenda ku Damasiko, Mfumu, ndidaona cheza chikulu kupiringana cheza cha dzuwa kubulukira kudzulu mbachindimwinikira pabodzi na amuna akhaenda na ine.

¹⁴Tenepo tonsene tidagwa pansi, pontho ndidava fala ikulonga kuna ine na chilongero cha Chiyuda kuti, ‘Saulo, Saulo! Watani unandiboneresa tenepa? Kunachita iwe nkhupikuwaza kwene wekha ninga ng'ombe yakumenya butsu mtswamu wa mbuyache.’

¹⁵Ndidavunza kuti, ‘Ndimwe ani Mbuya?’ Tenepo Mbuya adatawira mbati, ‘Ndine Yesu anaboneresa iwe.

¹⁶Mphapo lamuka mbuimire na manyalo ako. Ndakuonekera towera ndikusankhule kuti ukhale nyabasanga. Upange anthu anango pyaona iwe lero pya ine,[37] pontho na pinafuna dzakuonesa ine m'tsogolo muno.

¹⁷Ndinakupulumusa kuna nyatwa zakubulukira kuna anthu a dzinzako na kuna anthu okhonda khala Ayuda. Ndikukutuma kuna iwo kuti

¹⁸ukafungule maso awo na kuabulusa kumdima kuti adze kucheza, pontho kuabulusa kumphamvu ya Satana kuti adze kuna Mulungu. Kudzera muna chikhulupiro chawo pana ine, pyakudawa pyawo pilekererwe, pontho atambire mbuto pakati pa anthu asankhulwa na Mulungu kuti akhale ache ene ale.’

¹⁹“Natenepo Mfumu Agripa, ine sidakhonde tayu kuvera masomphenya adaona ine kubulukira kudzulu.

²⁰Mbwenye chakutoma ndidalalika mu Damasiko na mu Yerusalemu, kubuluka kweneko, mu Yudea monsene pontho na pakati pa anthu okhonda khala Ayuda. Ndidalalika kuti aleke pyakudawa pyawo mbazungunukire kuna Mulungu, pontho achite pinthu pyakuonesa kuti alekadi pyakudawa pyawo.

²¹Ndi thangwi yache Ayuda adandiphata pikhali ine m'Nyumba ya Mulungu mbayesa kuti andiphe.

²²Mbwenye kufikirana lero Mulungu akundiphedza. Natenepo ndaimira pano kupereka umboni wanga kuna anthu onsene, mkulu penu mwana. Pinalonga inepi ndi sasawa na pile pidalonga maprofeti pontho Mose kuti pinachitika:

²³kuti Khristu athema kufa, pontho anakhala wakutoma kulamuka kuimfa kuti alonge pya cheza cha chipulumuso kuna Ayuda na kuna anthu okhonda khala Ayuda.”

²⁴Mukhapitchinjiriza Paulo yekha ene tenepo, Fesito adakhuwa mbati, “Iwe Paulo, una nsala! Kufunza kwako, kwakuyalusa!”

²⁵Paulo adatawira mbati, “Ine nkhabe nsala tayu, Mfumu! Pinalonga inepi mphyakuonadi pontho pya nzeru.

²⁶Mfumu Agripa! Ndinakwanisa kulonga namwe mwakuwanga mtima thangwi imwe mukupidziwa pinthu pyonsenepi. Ndikupidziwa kuti nkhabe chinthu na chibodzi chene chinakhonda imwe dziwa, thangwi penepi hapidachitika mwakubisika tayu.

²⁷Mfumu Agripa, kadi imwe mumbakhulupira maprofeti? Ndikupidziwa kuti mumbakhulupira!”

²⁸Agripa adalonga kuna Paulo mbati, “Ndzidzi ung'onombo ninga weneyu ukunyerezera kuti unakwanisa kundisandusa kukhala mkhristu?”

²⁹Paulo adatawira mbati, “Ngakhala ndzidzi ngwakuchepa penu ngukulu, ndikupempha kuna Mulungu kuti imwe na onsene akundivesera lero musanduke mbamukhalambo ninga ine, kupambula njema zina inezi!”

³⁰Tenepo mfumu, mkulu wa boma, Berenike, pontho na anango onsene adalamuka.

³¹Pidabuluka iwo penepo, adalonga kuna unango na mwanzache mbati, “Munthu weneyu hadachite chinthu na chibodzi chene chakuti aphiwe penu kuikhwa m'perezo tayu.”

³²Tenepo Agripa adalonga kuna Fesito mbati, “Munthuyu mbadakhonda pempha kuti mseru wache ukatongwe na Mfumu wa Roma, mbadasudzulwa.”