Read cisena MABASA 27 Bible Online

MABASA 27 - cisena bible

MABASA 27

¹Pidapinyerezera iwo kuti tiende na m'mwadiya kudziko ya Italia, iwo adampereka Paulo na anyaperezo anango m'manja mwa Juliasi, mkadamu wa anyankhondo dzana, wa gulu ya anyankhondo yakuchemerwa “Gulu ya Mfumu wa Roma.”

²Tidapakira m'mwadiya, ule ukhabulukira kuluwani ya Adramitio, pontho udasasanyika kale kwenda kumagombe a nthemba ya Asia, mbatienda pyathu. Munthu unango, dzinache Aristariko, wa mumzinda wa Tesalonika m'nthemba ya Makedonia akhali nafe pabodzi.

³Mangwana mwache tidafika mumzinda wa Sidoni. Juliasi adakomera mtima Paulo mbamtawirisa kuti aende kaona ashamwali ache towera akapaswe pikhasowa iye.

⁴Kubuluka kweneko, tidapakira m'mwadiya mbatienda kukhundu kwakusowa mphepo kwa ntchuwa ya Kipro, thangwi tikhayang'anisana na mphepo.

⁵Tidenda na gombe-gombe kukhundu ya kunthemba ya Kilikia na Pamfilia na m'mwadiya mbatifika muluwani ya Mira, m'nthemba ya Likia.

⁶Kweneko mkadamu wa anyankhondo dzana ule adagumanako mwadiya ule ukhadabulukira ku Alekezandria kwenda ku Italia. Tenepo iye adatipakiza m'mwadiyamo.

⁷Tidenda pang'ono-pang'ono nsiku zizinji zene, pakumalisira tidafika chifupi na luwani ya Kinido na nyatwa zikulu. Mphepo hidatitawirisa kwenda kutali kwene na njira yeneyi tayu, natenepo tidenda kukhundu kwakusowa mphepo kwa ntchuwa ya Krete kugwanda na ku Salimone, phiri ya m'khundu mwa bara.

⁸Tidendadi mwanyatwa na m'khundu-khundu mwa ntchuwayo mbatifika pambuto panango pakuchemerwa Magombe Adidi, chifupi na luwani ya Lasea.

⁹Tidatayako ndzidzi ukulu ene, pontho kunja kudagoswa pyakwanga kuthimiza ulendo wathu thangwi pandzidzi wenewu wa chaka kunja kukhali kwakuipa pyakwanga.[38] Natenepo Paulo adaapanga tenepa:

¹⁰“Amunamwe, ndikuona kuti ulendo wathu unakhala wakunensa. Mitolo na mwadiyawu pinavungika pikulu pontho na moyo wathu ene unatayika.”

¹¹Mbwenye mkadamu wa anyankhondo dzana adavera pidalonga nyakutekenya na mwenechiro mwadiya ule; nee phatisa basa pidalonga Paulo pilebi.

¹²Gombeyo hikhali yadidi tayu kukhalapo pandzidzi wa mainja, natenepo anthu azinji akhafuna tibuluke penepo na mwadiya mbatiyesa-yesa kuti pingakhala pyakukwanisika tikafike kumzinda wa Fonikisi kuti mainja akatimalire kweneko. Fonikisi ndi gombe ya mu Krete yakuyang'anisana na kumwera kumadokero dzuwa pontho kumpoto kumadokero dzuwa.

¹³Mphepo ing'ono idagundika kubulukira kumwera, tenepo amuna ale adanyerezera kuti akhadagumana chidafuna iwo. Natenepo adabulusa ngoloweko zakuphatisa mwadiya pansi mbaenda na gombe-gombe ya Krete.

¹⁴Sindzidzi mphepo ikulu yakuchemerwa “Mbalu,” idagundika kubulukira pa ntchuwapo.

¹⁵Mphepoyo idamenya mwadiyawo mwakuti udachimwana kwenda kutsogolo mwakuyang'anisana na mphepoyo. Natenepo tidausiya pyathu mwadiyawo kuti tiende pyathu na mphepo.

¹⁶Tidafika kukhundu kwakusowa mphepo ya ntchuwa ing'ono ya Kauda. Kweneko na nyatwa tidakwanisa kupulumusa mwadiya ung'ono, udamangirirwa m'nduli mwa mwadiya wathu ukulu ule.

¹⁷Iwo adakweya mwadiya ung'ono mbaukwizika m'mwadiya ukulu ule. Tenepo adamanga mwadiya ukuluwo na nkhambala. Iwo akhagopa kuti anatcherera patchetcha pansi pa madzi chifupi na gombe ya dziko ya Libia, natenepo iwo adatchithisa mathanga,[39] mbasiya mwadiya kwenda pyawo na mphepo.

¹⁸Chonzi chakugoswa chile chidathimiza kudza, natenepo mangwana mwache adatoma kutaya m'madzi mitolo inango ikhali m'mwadiya ile.

¹⁹Mkuchono mwache adataya mapindi anango a mwadiyawo m'madzi.

²⁰Nsiku zizinji zene hatidakwanisa kuona dzuwa penu nyenyezi tayu, pontho chonzi chidathimiza kudza mwaukali. Pakumalisa tidataya mtima kuti tinapulumuka.

²¹Pidamala amuna ale ndzidzi ukulu ene okhonda kudya chinthu, Paulo adaimira pamaso pawo mbalonga mbati, “Amunamwe mbamudandivera pidalonga ine kuti tileke kubuluka ku Krete, pyonsenepi nee mbapidavungika na kutayikabi.

²²Mbwenye chinchino ndikukupemphani muwange mtima. Nee mbodzi anafa tayu, kwache unavungika ndi mwadiya ene basi.

²³Mosiku wapitawu mngelo wa Mulungu adadza kuna ine. Ine ndine wache wa Mulungu, pontho ndimbampembedza.

²⁴Mngeloyo adalonga mbati, ‘Paulo, leka chita mantha! Mphyakuthema kuti ukaonekere pamaso pa Mfumu wa Roma. Tenepo Mulungu na kukoma kwache mtima kuna iwe, anakoya miyoyo ya anthu onsene anaenda na iwewo!’

²⁵Tenepo amunamwe, wangisani, thangwi ndikukhulupira kuti pinachitikadi ninga montho mudandipangira Mulungu.

²⁶Mbwenye tinati tikatcherere pantchuwa inango.”

²⁷Mosiku wa khumi na chinayi tikhagwinywa na chonzi kuwambuka Bara ya Mediterania. Tenepo pachiti-chiti anyakuphata basa m'mwadiya mule adanyerezera kuti tikhali chifupi kufika pamtunda.

²⁸Natenepo adabizika mwala wakumangirirwa na nkhambala kuyeza kuzwika kwa madzi mbagumana kuti kuzwika kwache kukhali mathanyo makumanayi. Pidenda iwo pang'ono adachita pontho chibodzi-bodzi mbagumana kuti padazwika na mathanyo makumatatu.

²⁹Iwo akhachita mantha thangwi akhagopa kuti penu mwadiya unaenda kumiyala. Natenepo adagwesera m'madzi ngoloweko zinayi kunduli kwa mwadiyawo kuuphatisa, mbapemphera kuti kunja kuchene.

³⁰Tenepo anyakuphata basa m'mwadiya adayesa-yesa kuthawa. Iwo adatchithisira mwadiya ung'ono m'madzi khala ninga akhafuna kugwesera ngoloweko zinango kutsogolo kwa mwadiya ukuluwo.

³¹Mbwenye Paulo adalonga kuna mkadamu wa anyankhondo dzana ule na kuna anyankhondo mbati, “Anyakuphata basawa angakhonda khala m'mwadiya muno, imwe munapulamukave tayu.”

³²Tenepo anyankhondo ale adagwanda nkhambala zidamangirirwa kumwadiya ung'ono zile, towera mwadiyawo uende pyawo na kubeluka.

³³Makalakwecha mbadzati fika, Paulo adaapempha onsene kuti adye mbati, “Mwamala nsiku khumi na zinayi kudikhira, tenepo ndzidzi onsenewo nee mudadya na chinthu chenebi.

³⁴Ndikukupemphani mphapo kuti mudye towera mukhale na moyo. Nkhabe mbodzi wa imwe anakolozeka na pang'ono pene tayu.”

³⁵Pidamala Paulo kulonga penepi, adakwata mikate inango mbapereka takhuta kuna Mulungu pamaso pawo onsene mbaimenya-menya, tenepo iye adatoma kudya.

³⁶Mitimawo idakhala pansi, tenepo onsenewo adadya.

³⁷Tonsene m'mwadiyamo tikhali anthu madzana mawiri na makumanomwe na atanthatu.[40]

³⁸Onsene pidakhuta iwo, adaponya tirigu onsene m'madzi towera mwadiya ululupirwe.

³⁹Pidachena kunja anyakuphata basa m'mwadiya hadadzindikire mtunda tayu, mbwenye adaona gombe yatchetcha mbanyerezere kuti anakwanisa kutchamisapo mwadiyawo.

⁴⁰Tenepo adagwanda nkhambala za ngoloweko zile mbazileka kuti zibile. Na ndzidzi onthowo adasudzula nkhambala zidamangirirwa kung'ombo ikulu yakuwongolera mwadiya. Tenepo adakwiza mathanga kutsogolo kwa mwadiya, towera mwadiya uende pyawo na mphepo mbatienderatu pagombeyo.

⁴¹Mbwenye mwadiya udadima nthunda yatchetcha yakubisika m'madzi mbutcherera. Kutsogolo kwa mwadiya kudatcherera mbakuchimwana kufamba, mwenemo kunduli kwache kukhapanduka thangwi ya mphamvu za mabimbi.

⁴²Anyankhondo adanyerezera pyakupha anyaperezo onsene ale, kugopesera anasambirira kumtunda mbathawa.

⁴³Mbwenye mkadamu wa anyankhondo dzana ule adafuna kupulumusa Paulo, natenepo iye adaakhondesa kuchita penepi. Chakutoma iye adaapanga anthu, ale anakwanisa kusambirira kuti anumphire m'madzi mbasambirire kwenda kumtunda.

⁴⁴Mphapo anango aphate matabwa na pimanyenyeswa pya mwadiyawu mbaenda kumtunda. Mwenemo ndiye mudapulumukira ife tonsene mbatikafika kumtunda.