Read cisena MABASA 28 Bible Online

MABASA 28 - cisena bible

MABASA 28

¹Pidapulumuka na kufika ife pamtunda, tidava kuti dzina ya ntchuwayo ikhali Melita.

²Anthu a penepo akhali adidi pyakwanga kuna ife mbatitambira mwadidi. Iwo adatigasira moto kuti tiothe thangwi tidatontholerwa podi kukhavumba mvula.

³Paulo adagumanya mtolo wa nkhuni mbasesera nawo motowo. Tenepo, na thangwi ya kupisa kwa motowo m'nkhuni mule, mudabuluka nyoka mbiluma dzanja ya Paulo mbikakamira ponthopo.

⁴Anthu a pantchuwa ale adaona nyoka ili lemberere padzanja ya Paulo mbalonga mbati, “Munthuyu ndi phangadi. Kupulumuka kudachita iye pabara pale nkhupulumuka kwene pyache, mbwenye milungu yakuchemerwa ‘Chilungamo’ yakhonda kuti iye akhale na moyo.”

⁵Mbwenye Paulo adakupusira nyoka ile pamoto okhonda kuwazika na pang'ono pene.

⁶Iwo akhanyerezera kuti manungo ache anatupa penu iye anagwa pansi kabodzi na kabodzi mbafa. Mbwenye pidaona iwo kuti ndzidzi ukulu wagwanda nee chitika pinthu kuna iye tayu, iwo adasanduza manyerezero mbalonga mbati, “Munthuyu ndi milungu!”

⁷Chifupi na mbutoyo pakhali minda ya Populio, mkulu wa boma wa pantchuwapo. Iye adatitambira mwadidi mbatikhala ninga alendo kumusa kwache nsiku zitatu.

⁸Babache Populio akhagona patalimba m'nyumba thangwi iye akhava manungo pontho kamwazi. Paulo adapita m'subimo mbampempherera, tenepo adamsanjika manja mbamuwangisa.

⁹Pidachitika penepi atenda anango onsene a pantchuwapo adadza mbawangiswambo.

¹⁰Iwo adatipasa mitukwa izinji ene, pontho pidasasanyika ife kuti tiende adatiikhira m'mwadiya pikhasowa ife paulendo wathu.

¹¹Pidagwanda miyezi mitatu tidalamuka kwenda ulendo wathu na m'mwadiya unangombo, ule ukhakhala pantchuwapo pandzidzi wa mainja. Mwadiyawo ukhachemerwa “Milungu yamapasa” pontho wakubulukira ku Alekezandria.

¹²Tidafika mumzinda wa Sirakusi mbatikhala kweneko nsiku zitatu.

¹³Kubuluka kweneko tidenda na mwadiya mbatikafika mumzinda wa Regimu. Mangwana mwache mphepo idagundika kubulukira kumwera, tenepo mkuchono mwache tidafika kuluwani ya Putioli.

¹⁴Kweneko tidagumana anyakukhulupira anango mbatipempha kuti tikhale nawo dimingu yamumphu. Kubuluka kweneko tidenda ku Roma.

¹⁵Pidava anyakukhulupira mu Roma kuti tikhadza, iwo adadza dzatichingamira, anango kumbuto yakuchemerwa Nyumba Zitatu Zakugonamo Alendo, anangombo mpakana pa Msika wa Apio. Pidaona Paulo anthu ale, iye adakuza Mulungu mbawangiswa mtima pikulu.

¹⁶Pidafika ife mu Roma, Paulo adatawiriswa kukhala yekha ene, mbwenye mwakuonerwa na nyankhondo.

¹⁷Pidagwanda nsiku zitatu, Paulo adachemeresa mgumano wa akadamu a Chiyuda a kweneko. Pikhadagumanyikana iwo, iye adalonga kuna iwo mbati, “Aisraele anzanga, ine sidachite chinthu chakudawira anthu athu, penu mitemo idatambira ife kubulukira kuna makolo athu ile tayu. Mbwenye ndidaikhwa m'perezo mumzinda wa Yerusalemu mbandiperekwa m'manja mwa Aroma.

¹⁸Pidamala iwo kundivunza, Aroma akhafuna kundisudzula, thangwi hadagumane mseru wakuti ndife nawo tayu.

¹⁹Mbwenye pidapipokanya Ayuda, ine nee mbandidachitira mwinango tayu, mbwenye kupempha kuti mseru wanga ukatongwe na Mfumu wa Roma, podi kwene kuti ine nee ndikhali na mseru na anthu anga tayu.

²⁰Ndi thangwi yache ndakuchemerani kuti ndilonge namwe. Ndimomwene ine ndamangwa na njema thangwi ya iye, anadikhira anthu a ku Israele ule.”

²¹Iwo adalonga kuna iye mbati, “Ife nee tatambira kalata na ibodzi ene kubulukira kunthemba ya Yudea yakulonga pya iwe tayu. Pontho nee munthu adza kuno na mphangwa zakulonga pya iwe, penu kulonga pyakuipa pya iwe kubulukira kweneko tayu.

²²Mbwenye pinafuna ife mphyakuti tive tekha ene manyerezero ako, thangwi tikupidziwa kuti konsene anthu ambalonga pyakupambizira gulu yakoyi.”

²³Natenepo iwo adapangana naye nsiku, tenepo mwinji udadza pansikuyo kumbuto kukhakhala Paulo kule. Kubulukira machibese kufikirana mosiku iye adalonga mwakuveka kuna iwo mphangwa za Ufumu wa Mulungu mbayesa kuanyengerera na pya Yesu pakuawerengera pya m'mwambo wa Mose na m'mabukhu a maprofeti.

²⁴Anthu anango adanyengeka nawo mafalache, mbwenye anango adakhonda kukhulupira.

²⁵Natenepo Ayudawo adabalalika akupokanyisana pakati pawo pamafala akumalisa akhadalonga Paulo akuti, “Mzimu Wakuchena adalonga pyakuonadi pidalonga iye kuna makolo anu kudzera muna mprofeti Yesaya kuti:

²⁶‘Ndoko ukalonge kuna anthuwa kuti: Kuva munava, kwache nee vesesabi; kuona munaona, kwache nee onesesabi.

²⁷Thangwi anthuwa misolo yawo yauma; aphopha makutu awo, pontho afunga maso awo. Gopesera anaona na maso awo, na kuva na makutu awo, pontho kuti misolo yawo inavesa; tenepo mbadazungunukira kuna ine, inembo mbandidaawangisa.’ ”

²⁸Pakumalisa Paulo adalonga mbati, “Imwe mupidziwe kuti mphangwa za Mulungu zakudzesa chipulumuso zatumizwa kuna anthu okhonda khala Ayuda. Iwo anakazivesera.”[41]

³⁰Pyaka piwiri Paulo adakhala yekha ene panyumba yakubwereka. Kweneko adatambira mwadidi onsene ale akhabwera dzamuona.

³¹Iye adalalika pya Ufumu wa Mulungu pontho na kufunzisa pya Mbuya Yesu Khristu na kutakasuka pontho na kuwanga mtima.