Read cisena MABASA 3 Bible Online

MABASA 3 - cisena bible

MABASA 3

¹Nsiku inango paora yachitatu na mawulo, pandzidzi wakupemphera, Peturo na Yohani adenda ku Nyumba ya Mulungu kapemphera.

²Pamsuwo wa Nyumba ya Mulungu, wakuthulwa Msuwo Wakubalika, pakhali munthu adabalwa wakulamala miyendo. Nsiku zonsene anthu akhamthukula mbakamsiya pamsuwopo towera apemphese kuna anthu akhapita m'Nyumba ya Mulungu ale.

³Pidaona iye Peturo na Yohani akupita m'Nyumba ya Mulungu ile, adaapempha kuti iwo ampasembo pinthu.

⁴Iwo adamuyang'anisisa, tenepo Peturo adampanga mbati, “Tiyang'ane!”

⁵Natenepo iye adaayang'anadi kudikhira kuti anatambira pinthu kubulukira kuna iwo.

⁶Mbwenye Peturo adampanga mbati, “Ine nkhabe kobiri yakuti ndikupase, mbwenye ndinakupasa china ine: na dzina ya Yesu Khristu wa ku Nazareti ndinakutonga, famba!”

⁷Tenepo adamphata mkono wache wamadyo mbamphedza kumulamusa. Kabodzi na kabodzi manyalo na mphundupundu zache pidawangiratu;

⁸iye adanumpha mbaimira na manyalo ache, tenepo adatomeratu kufamba-famba. Iye adapita nawo pabodzi m'Nyumba ya Mulungu mbali kufamba, na kunumpha-numpha pontho na kukuza Mulungu.

⁹Anthu penepo adamuona akufamba na kukuza Mulungu

¹⁰mbamdziwa kuti akhali munthu ontho-ontho ule akhakhala mbapemphesa pa Msuwo Wakubalika wa Nyumba ya Mulungu ile. Anthu adadodoma pyakwanga mbamalwa nzeru na pile pidamchitikira nyakulamalayo.

¹¹Pikhakakamira munthu ule pana Peturo na Yohani pambuto yakuchemerwa Khonde ya Solomoni, anthu adadodoma pyakwanga mbathamangira kuna iwo.

¹²Pidaona Peturo anthu ale, adalonga kuna iwo mbati, “Imwe, Aisraele anzanga, mwatani munadodoma na penepi pontho munatiyan'ganiranji tenepa? Kadi mukunyerezera kuti munthuyu tamfambisa na mphamvu zathu zene penu na thangwi yakuti timbapembedza Mulungu pyakwanga?

¹³Mulungu wa Abrahamu, Isake na Yakobo, Mulungu wa makolo athu, adapasa Nyabasache Yesu demelero ikulu. Mbwenye imwe mudampereka kuti aphiwe, pontho mudamkhonda pamaso pa Pilato, pidanyerezera iye kuti Yesu asudzulwe.

¹⁴Yesu akhali wakukhulupirika pontho wakulungama pamaso pa Mulungu, mbwenye imwe mudamkhonda mbamupempha Pilato kuti akuchitireni pikhafuna imwe pakukusudzulirani phanga.

¹⁵Imwe mudapha nyakudzesa moyo, mbwenye Mulungu adamulamusa kuimfa. Tenepo ife ndife mboni za penepi.

¹⁶Munthu anaona na kudziwa imweyu awanga thangwi ya chikhulupiro muna Yesu Khristu. Iye awangiratu na mphamvu za Yesu ninga monsene munaonera imwe, pontho na chikhulupiro chakuperekwa na Yesu chile.

¹⁷“Tenepo chinchino, Abale anga, ndapidziwa kuti pidachita imwe pabodzi na akadamu anu kuna Yesu, mudachita mwakukhonda dziwa.

¹⁸Mulungu adalongeratu kale ene kudzera muna maprofeti onsene kuti Khristu wache anabonera; tenepo iye adapichitisadi kukhala ninga mudalongera iye.

¹⁹Natenepo lekani pyakudawa pyanu, mbamuzungunukire kuna Mulungu towera iye akufudzireni pyakudawa pyanu. Mungachita tenepo,

²⁰ndzidzi wakuwangiswa mtima unabwera kubulukira kuna Mbuya. Tenepo anakutumirani Yesu, akusankhulirani iye kale kuti akhale Khristu ule.

²¹Yesu athema kukhala kudzulu kufikirana ndzidzi ukwane wakuti pinthu pyonsene pisasanywe mwachinchino ninga mudadumbira Mulungu kale kudzera muna maprofeti ache akuchena.

²²Thangwi Mose adalonga mbati, ‘Mbuya Mulungu wanu anakutumirani mprofeti ninga ine,[3] pontho anakhala mbodzi wa anthu anu onthowa. Tenepo imwe muvere pyonsene pinafuna dzakupangani iye kuti muphate.

²³Mbwenye munthu anakhonda dzavera mprofetiyo anakhethwa kuna anthu a Mulungu, pontho anavungwa.’

²⁴Andedi, maprofeti onsene akhali na mphangwa zakubulukira kuna Mulungu, kutomera Samuele kufikirana onsene adadza m'nduli mwache ale, adapilonga pontho pinachitika nsiku zinopi.

²⁵Pidadumbira Mulungu kudzera muna maprofeti ache pile, mphyanu. Imwe ndimwe enechiro a chiverano chidachita Mulungu na makolo anu ninga mudalongera iye kuna Abrahamu mbati, ‘Kudzera muna pidzukulu pyako ndinatsanzayisa anthu onsene a padziko yapansi.’

²⁶Pidasankhula Mulungu nyabasache, chakutoma adamtuma kuna imwe kukutsanzayisani pakukuzungunusani kubuluka kuna makhaliro anu akudawika.”