Read cisena MABASA 4 Bible Online

MABASA 4 - cisena bible

MABASA 4

¹Pikhalonga Peturo na Yohani kuna anthu ale, anyansembe anango,[4] mkadamu wa anyakulondali a ku Nyumba ya Mulungu na Asaduki anango adafika penepo.

²Iwo adazhangali thangwi anyakutumwa awiri ale akhafunzisa anthu kuti Yesu akhadalamuka kuimfa, kuonesa kuti anyakufa analamukambo.

³Tenepo adaaphata mbaaikha m'perezo kufikirana mangwana mwache, nakuti kukhadadoka kale.

⁴Mbwenye anthu azinji ene adakhulupira pidava iwo mphangwazo. Tenepo gulu idakula, kulengesa amuna okha adakwana ninga pikwi pishanu.

⁵Mangwana mwache akadamu a Chiyuda, akulu-akulu na afunzisi a mwambo adagumanyikana mu Yerusalemu.

⁶Penepo pakhali pontho Nyansembe Wamkulu Anasi, pabodzi na Kayafa, Yohani, Alekezanda pontho na anango a m'banja ya Nyansembe Wamkulu.

⁷Iwo adaimirisa anyakutumwa ale pamaso pawo mbaavunza mbati, “Mphamvu inachita na imwe penepi njanji, pontho ndi dzina ya ani inachita na imwe penepi?”

⁸Na kudzazwa na Mzimu Wakuchena, Peturo adaatawira mbati, “Imwe akulu-akulu na akadamu a anthu,

⁹mukutivunza lero pya udidi wachitirwa nyakulamalayu pontho nakuti awangiswa tani?

¹⁰Natenepo imwe pabodzi pene na anthu onsene a ku Israele mupidziwe kuti munthu aimira pamaso panuyu awangiswa na Yesu Khristu wa ku Nazareti adakhomera imwe pamtanda ule, mbwenye Mulungu adamulamusa kuimfa.

¹¹Malemba akulonga pya Yesu kuti, ‘Mwala udakhondwa na imwe, anyakumanga nyumba lero wasanduka wakufunika kupiringana inango yonsene.’

¹²Chipulumuso chimbagumanwa muna Yesu yekha ene basi, thangwi padziko yonsene yapansi nkhabe munthu unango Mulungu adampereka kuti anakwanisa kutipulumusa tayu.”

¹³Anyathando ya miseru ya Chiyuda ale adadodoma kuona kuwanga mtima kwa Peturo na Yohani maka-maka pidadziwa iwo kuti akhali anthu ene pyawo pontho okhonda funza. Penepo adadzindikira kuti akhadali pabodzi na Yesu.

¹⁴Iwo adasowa mafala akuti alonge, thangwi adamuona munthu akhadawangiswa ule aimira pabodzi na Peturo na Yohani.

¹⁵Tenepo Peturo na Yohani adapangwa kuti atome buluka panja pang'ono towera Thandoyo itome verana.

¹⁶Iwo adavunzana mbati, “Tinachita nawo tani amuna enewa? Anthu onsene mu Yerusalemu akupidziwa kuti chakudodomesa chikuluchi chachitwa kudzera muna iwo, tenepo ife nkhabe kupikhonda tayu.

¹⁷Mbwenye kugopa kuti mbiri inafala konsene kuna anthu, tendeni tiagoswe kuti aleke longave kuna munthu na mbodzi ene na dzina ya Yesu.”

¹⁸Tenepo adaachemera pontho mbaatonga kuti aleke longave penu kufunzisa na dzina ya Yesu.

¹⁹Mbwenye Peturo na Yohani adaatawira mbati, “Pitongeni mwekha ene chadidi ntchipi pamaso pa Mulungu, kuvera imwe anthu penu kuvera Mulungu.

²⁰Thangwi ife nkhabe kwanisa tayu kuleka longa pyonsene pyaona ife na kupiva.”

²¹Tenepo Thando ya miseru ya Chiyuda idaacheuza pikulu pene mbaasudzula, thangwi adaona kuti nkhabe kwanisika kuatchunyusa nakuti anthu onsene akhakuza Mulungu na pidachitikapyo.

²²Munthu adawangiswa mwakudodomesa ule, pyaka pyache pidapiringana pyaka makumanayi.

²³Sindzidzi Peturo na Yohani nkhusudzulwa, adabwerera kugulu kwawo mbalonga kuna iwo pyonsene pidaapanga anyansembe akulu na akulu-akulu pile.

²⁴Pidapiva anyakukhulupira, onsene adapemphera pabodzi kuna Mulungu mwakugaluza fala mbati, “Mbuya, ndimwe mudalenga kudzulu, dziko yapansi, bara na pyonsene pili mwenemo.

²⁵Na Mzimu Wakuchena mudalonga kudzera muna kholo wathu Davite, nyabasanu, kuti, ‘Thangwi ninji anthu okhonda khala Ayuda akuzhangali; pontho ninji anthu akuverana pyapezi-pezi?

²⁶Mafumu a dziko adapisasanya okha ene, pontho akadamu adagumanyikana pabodzi kupandukira Mbuya na Khristu wache.’

²⁷“Ndimomwene, Herodi na Pontio Pilato adagumanyikana pabodzi mumzinda na anthu okhonda khala Ayuda pontho na anthu a ku Israele kupandukira Yesu, Nyabasanu wakukhulupirika, Nyankhombo adasankhula imwe kukhala Mfumu ule.

²⁸Iwo adachita pikhadanyerezera imwe kale na mphamvu zanu pontho na kufuna kwanu kuti pinachitika pile.

²⁹Mbuya, yang'anani munatigoswera iwomu, mphapo tiphedzenimbo ife, anyabasanu, kulalika mphangwa zanu mwakuwanga mtima.

³⁰Futhulani dzanjanu kuwangisa anthu, pontho mutawirise kuti pidzindikiro na pyakudodomesa pichitwe na dzina ya Yesu, Nyabasanu wakukhulupirika.”

³¹Pidamala iwo pemphera pambuto pakhakhala iwo pale padatekenyeka. Tenepo onsene adadzazwa na Mzimu Wakuchena mbatoma kulalika mphangwa za Mulungu mwakuwanga mtima.

³²Gulu yonsene ya anyakukhulupira ikhali na mtima ubodzi pontho na manyerezero abodzi. Nkhabe munthu na mbodzi ene akhalonga kuti mfuma ikhali na iye njache yekha ene tayu, mbwenye akhagawana unango na mwanzache pinthu pyonsene pikhali na iwo.

³³Na mphamvu zikulu anyakutumwa adachitiradi umboni pya kulamuka kwa Mbuya Yesu kuimfa. Tenepo Mulungu akhaatsanzayisa pikulu onsene.

³⁴M'gulu mwawomo nee mbodzi akhatcherenga tayu, thangwi anango ale akhali na nyumba pontho minda akhagulisa mbadza na kobiri zidatambira iwo zile kubulukira kupyakugulisa pyawo

³⁵kuna anyakutumwa. Tenepo kobiri zile zikhagawizwa kuna anyakukhulupira malingana na utcherengi wa munthu.

³⁶Ninga pidachita Yosefe wa dzinza ya Levi wakubulukira kuntchuwa ya Kipro, anyakutumwa akhamthula na dzina ya Barnaba ule (kweneku nkhulonga kuti “Nyakuwangisa mtima”).

³⁷Iyembo adagulisa mundache mbapereka kobirizo kuna anyakutumwa.