Read cisena MABASA 6 Bible Online

MABASA 6 - cisena bible

MABASA 6

¹Nsiku zenezo, pikhathimizirika gulu ya anyakufunza, padalamuka kukhonda vana pakati pa Ayuda olonga Chigriki na Ayuda olonga Chiheberi. Ayuda olonga Chigriki akhadungunya thangwi amamfelwawo nee akhatsalakanwabi na pinthu pikhagawizwa nsiku na nsiku.

²Tenepo anyakutumwa khumi na awiri adagumanyisa pabodzi gulu yonsene ya anyakukhulupira mbalonga mbati, “Si pyadidi tayu kuti ife tisiye kulalika mafala a Mulungu towera tiyang'anire kugawa kwa pinthu.

³Natenepo abale, sankhulani mwakuonesesa pakati panu amuna anomwe ale anadziwa imwe kuti ngakudzazwa na Mzimu Wakuchena pontho anzeru, ifembo tinaapasa basa yeneyi.

⁴Tenepo ndzidzi onsene ife tinakhala tikupemphera na kuphata basa yakulalika.”

⁵Gulu yonsene idakomerwa pyakwanga na pidalonga anyakutumwa pile, natenepo iwo adasankhula Setefano, mamuna wa chikhulupiro pontho wakudzazwa na Mzimu Wakuchena, pontho na Filipi, Prokoro, Nikanoro, Timoni, Paramena, na Nikolao, wa kuluwani ya Antiokea, nyakusanduzika kukhala Myuda ule.

⁶Tenepo gulu idadza na amuna ale kuna anyakutumwa, anyakutumwambo adaapempherera mbaasanjika manja.

⁷Mafala a Mulungu adathimiza kufalikira. Tenepo gulu ya anyakufunza idathimizirika mumzinda wa Yerusalemu, mwakuti anyansembe azinji ene adatawira chikhulupirocho.

⁸Setefano, munthu wakutsanzayiswa na Mulungu, pontho wakudzazwa na mphamvu, adachita pyakudodomesa na pidzindikiro pikulu pakati pa anthu.

⁹Mbwenye amuna anango a ku Nyumba yakupemphereramo ya Atumbe[5] (ninga mukhachemererwa iwo), ale akhali Ayuda a ku Kirene na a ku Alekezandria, pabodzi pene na Ayuda anango a kunthemba ya Kilikia na Asia adatoma kupokanyisana na Setefano.

¹⁰Mbwenye Mzimu Wakuchena adampasa Setefano nzeru mwakuti pikhalonga iye, iwo adachimwana kumkunda.

¹¹Tenepo iwo adanyengerera amuna anango towera alonge kuti, “Tidamva akushola Mose pontho Mulungu!”

¹²Iwo adazhangalisa mitima ya anthu, akulu-akulu na afunzisi a mwambo. Iwo adamphata Setefano mbadza naye ku Thando ya miseru ya Chiyuda.

¹³Tenepo iwo adadza na amuna anango kuti alonge pyakupambizira Setefano. Amunawa adalonga mbati, “Munthu weneyu ndzidzi onsene ambalonga pyakupokanyisana na Nyumba ya Mulungu yakuchenayi pontho na mwambo wa Mose.

¹⁴Tidamva pontho akulonga kuti Yesu wa ku Nazaretiyu anafudza Nyumba ya Mulungu pontho na kusandusa mitemo yonsene idatipasa Mose!”

¹⁵Onsene akhali m'Thando ya miseru ya Chiyuda ale, adamuyang'anisisa Setefano mbaona kuti nkhope yache ikhali ninga nkhope ya mngelo.