Read cisena MABASA 8 Bible Online

MABASA 8 - cisena bible

MABASA 8

¹Saulo ule adatawirizana nawo pya kupha kweneku. Nsiku yontho-yonthoyo mpingo wa mu Yerusalemu udatoma kubonereswa pyakwanga. Anyakukhulupira onsene, kupambula anyakutumwa, adabalalikana konsene kunthemba za Yudea na Samaria.

²Amuna anango akupembedza Mulungu adaikha m'masiye Setefano mbamulira na chiliro chikulu.

³Saulo akhaboneresa pyakwanga mpingo mbaenda nyumba na nyumba kuphata anyakukhulupira, amuna na akazi ene, mbaenda nawo kaafungira m'perezo.

⁴Anyakukhulupira, akhadabalalika ale, adalalika Mphangwa Zadidi ponsene padenda iwo.

⁵Filipi adenda kumzinda wakuveka[8] wa ku Samaria mbakalalika pya Khristu kuna anthu.

⁶Pidava chimwinji cha anthu na kuona pidzindikiro pidachita Filipi pile, iwo adafungula makutu towera avese pikhalonga iye pile.

⁷Mizimu yakuipa idabuluka muna anthu azinji na mkhuwo ukulu, tenepo anyamfutete na anyakulamala azinji adawangiswa.

⁸Natenepo kukomerwa kukulu kukhalipo mumzindamo.

⁹Mumzindamo mukhakhala munthu unango, dzinache Simoni, ule adadodomesa anthu a mu Samariamo na matsengache. Iye akhadungudza kuti akhali munthu wamkulu.

¹⁰Anthu onsene mwenemo, akuveka na akukhonda veka ene, akhamvesera mafalache mbalonga mbati, “Munthu weneyu ndi mphamvu za Mulungu yakudziwika na dzina yakuti ‘Mphamvu Ikulu.’ ”

¹¹Iwo akhamvesera mafalachewo thangwi iye adadodomesa anthu na matsengache ndzidzi ukulu ene.

¹²Mbwenye pidakhulupira iwo mafala adalalika Filipi pya Mphangwa Zadidi zakulonga pya Ufumu wa Mulungu na pya Yesu Khristu, amuna na akazi ene adabatizwa.

¹³Na Simoni enembo adakhulupira. Pidamala iye batizwa, adakhala chifupi na Filipi mbamalwa nzeru pidaona iye pidzindikiro na pyakudodomesa pikulu pikhachitwa pile.

¹⁴Pidapiva anyakutumwa mumzinda wa Yerusalemu kuti anthu a kudziko ya Samaria akhadatambira mafala a Mulungu, iwo adatuma Peturo na Yohani kwenda kweneko.

¹⁵Pidafika anyakutumwa ale, adaapempherera anyakukhulupirawo kuti atambire Mzimu Wakuchena,

¹⁶thangwi Mzimu Wakuchena hakhadadzati fika pana munthu na mbodzi ene tayu; iwo akhadabatizwa kwene na dzina ya Mbuya Yesu.

¹⁷Tenepo Peturo na Yohani adaasanjika manja, anthumbo adatambira Mzimu Wakuchena.

¹⁸Simoni adaona kuti Mzimu akhadaperekwa kuna anyakukhulupira, pidasanjikwa iwo manja na anyakutumwa. Natenepo adayesa kupereka kobiri kuna Peturo na Yohani

¹⁹mbalonga mbati, “Pasenimbo ine mphamvu zenezi, towera munthu anasanjika ine manjayo, atambirembo Mzimu Wakuchena.”

²⁰Mbwenye Peturo adamtawira mbati, “Iwe na kobiri zako zene ndoko kugehena, thangwi ya kunyerezera kuti unakwanisa kugula mtukwa wa Mulungu na kobiri.

²¹Iwe nkhabe khundu penu mbuto pabasathuyi, thangwi mtimako nee ngwakulungamabi pamaso pa Mulungu.

²²Tenepo leka chakuipa chakochi mbupemphere kuna Mbuya kuti iye akulekerere thangwi ya kunyerezera pinthu ninga penepi.

²³Thangwi ndaona kuti iwe ndiwe wakuipirwa pyakwanga, pontho ndiwe nyaperezo wa pyakudawa.”

²⁴Simoni adalonga kuna Peturo na Yohani mbati, “Ndipemphererenimbo kuna Mbuya kuti pyalonga imwepi pileke kundichitikira.”

²⁵Pidamala iwo kupereka umboni na kulalika mafala a Mbuya, Peturo na Yohani adabwerera ku Yerusalemu. Panjira pawo adalalika Mphangwa Zadidi m'midzi izinji ya ku Samaria.

²⁶Mngelo wa Mbuya adalonga kuna Filipi mbati, “Lamuka uende kumwera[9] kunjira yakubulukira ku Yerusalemu kwenda ku Gaza.” (Njira yeneyi ndi njira ya m'thando yatchetcha.)[10]

²⁷Tenepo Filipi adalamuka mbaenda. Thubu wakukapalwi pontho wakufunika pyakwanga wa kudziko ya Etiopia, ule akhayang'anira mfuma ya mfumukazi wa ku Etiopia akhali panjira kubwerera kwawo. Iye akhadenda ku Yerusalemu kapembedza Mulungu. Tenepo akhabwerera kwawo pachingolo chache. Pikhaenda iye akhawerenga bukhu ya mprofeti Yesaya.

²⁹Mzimu Wakuchena adalonga kuna Filipi mbati, “Ndoko kafambe chifupi na chingolocho.”

³⁰Filipi adathamangira kuchingolocho mbamva akuwerenga bukhu ya mprofeti Yesaya. Tenepo Filipi adamvunza mbati, “Ayi mukuvesa pinawerenga imwepi?”

³¹Thubu ule adatawira mbati, “Ndinavesa tani okhonda munthu unango wakundifuthulira?” Tenepo iye adachemera Filipi kupakira m'chingolomo mbakhala naye pabodzi.

³²Malemba akhawerenga thubuyo mbawa: “Iye adakwatwa ninga bira kwenda kachekwa. Pontho ninga mwanabira ule ambakhala mulomo phoo angachingwa ubweyache, iyembo nee ambalonga pinthu tayu.

³³Iye adalulupiswa pontho pamseru wache pakhali nkhabe chilungamo. Nkhabe munthu anakwanisa kulonga pya pidzukulu pyache tayu, thangwi moyo wache padziko yapansi wafika kumadolomero.”

³⁴Thubu adavunza Filipi mbati, “Ngandipange, mprofeti weneyu akulonga pya ani; akulonga pya yekha ene penu pya munthu unango ene?”

³⁵Tenepo Filipi adampanga Mphangwa Zadidi za Yesu kutomera na mafala a m'Malemba enewa.

³⁶Pikhaenda iwo na njira, adafika pambuto pale pakhali madzi. Natenepo thubu ule adalonga mbati, “Ngayang'ana pano pana madzi. Ninji chinafuna kundikhondesa batizwa?”[11]

³⁸Tenepo thubu adatonga kuti chingolo chachecho chiimire. Filipi pabodzi na thubuyo adatchithira m'madzi, penepo Filipi adambatiza.

³⁹Pidabuluka iwo m'madzi mule, Mzimu wa Mbuya adambulusa Filipi. Thubu ule hadamuoneve Filipi tayu, mbwenye adathimiza ulendo wache na kukomerwa.

⁴⁰Filipi adadzindikira kwene kuti ali muluwani ya Azota. Iye adenda ku Kesarea, tenepo panjira pache adalalika Mphangwa Zadidi m'maluwani monsene.