Read cisena MABASA 9 Bible Online

MABASA 9 - cisena bible

MABASA 9

¹Mbwenye Saulo adathimiza kugoswa anyakufunza a Mbuya mbafuna kuapha. Iye adenda kuna Nyansembe Wamkulu

²mbakapempha makalata akumtawirisa kuti aende nawo kunyumba zakupemphereramo mu Damasiko, towera angagumanako anyakutewera Njira ya Mbuya, amuna na akazi ene, iye akaaphate mbadza nawo dzaaikha m'perezo ku Yerusalemu.

³Pikhadza Saulo chifupi na mzinda wa Damasiko, vumbu-vumbu cheza chakubulukira kudzulu chidammwinikira.

⁴Tenepo adagwa pansi mbava fala ikulonga kuna iye kuti, “Saulo! Saulo! Watani unandiboneresa tenepa?”

⁵Iye adavunza mbati, “Ndimwe ani, Mbuya?” Tenepo fala idatawira kuti, “Ndine pano Yesu anaboneresa iwe ule.

⁶Mbwenye lamuka, uende mumzindamo, kweneko unakapangwa pyathema iwe kuchita.”

⁷Amuna akhaenda na Saulo pabodzi ale adaimira mbasowa chakulonga; iwo adava kwene fala, mbwenye munthu wache nee kumuonabi.

⁸Saulo adalamuka mbafungula maso ache, mbwenye hadakwanise kuona na chinthu chene tayu. Tenepo amuna ale adamphata nsenji mbaenda naye mu Damasiko.

⁹Iye adakhala boli-boli nsiku zitatu, pontho pandzidzi wenewu hadadye penu kumwa na chinthu chene tayu.

¹⁰Mumzinda wa Damasiko mukhali nyakukhulupira unango, dzinache Hanania. Tenepo Mulungu adamchemera kumasomphenya mbati, “Hanania!” Iye adatawira mbati, “Ndili pano, Mbuya!”

¹¹Mbuya adalonga kuna iye mbati, “Lamuka uende kumusa kwa Yudasi kunjira yakuchemerwa Njira Yakuwongoka. Kweneko ukavunzeko munthu wa kuluwani ya Tariso, dzinache Saulo. Iye akupemphera,

¹²pontho kumasomphenya aona munthu unango, dzinache Hanania, adza mbaikha manja pana iye towera atambire pontho kuona kwache.”

¹³Mbwenye Hanania adatawira mbati, “Mbuya, ndava anthu azinji akulonga pya munthu weneyu, pontho na pinthu pyakugoswa pyonsene pyachita iye kuna anthu anu a ku Yerusalemu.

¹⁴Tenepo iye adza kuno ku Damasiko na utongi wa anyansembe akulu kuti amange onsene ambakupembedzani ale.”

¹⁵Mbwenye Mbuya adalonga kuna Hanania mbati, “Ndoko, thangwi ndamsankhula kuti anditumikire, towera avekese dzinanga kuna anthu okhonda khala Ayuda na kuna mafumu awo ene, pontho na kuna anthu a ku Israele.

¹⁶Ine ndinamuonesa nyatwa zonsene zinafuna iye dzaona thangwi ya dzinanga.”

¹⁷Tenepo Hanania adendadi mbakapita m'nyumba mukhali Saulo mule, mbamsanjika manja mbalonga mbati, “Mbaleanga Saulo, Mbuya Yesu, adakuonekera panjira pikhadza iwe kuno ule, andituma kuti utambire pontho kuona kwako nakuti udzazwe na Mzimu Wakuchena.”

¹⁸Kabodzi na kabodzi pinango pyakuoneka ninga mabade a nsomba pidabuluka m'maso mwa Saulo mbakwanisa kuona pontho. Tenepo iye adalamuka mbabatizwa.

¹⁹Pidamala iye kudya, mphamvu zache zidabwerera. Saulo adakhala nsiku pang'ono ku Damasiko pabodzi na anyakukhulupira.

²⁰Sindzidzi iye adatoma kufunzisa m'nyumba zakupemphereramo kuti Yesu ndi Mwana Mulungu.

²¹Onsene adadodoma pidava iwo penepi. Natenepo adavunza mbati, “Weneyu si ule akhapha anthu ambapembedza Yesu ku Yerusalemu ale tayu? Kadi iye hadabwerere dzamanga anthu kwenda nawo kuna anyansembe akulu kakhala anyaperezo tayu?”

²²Mbwenye kulalika kwa Saulo kukhathimiza kukula na mphamvu mwakuti iye adachitisa Ayuda mumzinda wa Damasiko kumalwa nzeru na kuatsikimizira kwache kuti Yesu ndi Khristu.

²³Pidagwanda nsiku zizinji, Ayuda adagumanyikana pabodzi mbasasanya njira zakuphera Saulo,

²⁴mbwenye Saulo adava pikhafuna kuchita iwopyo. Mosiku na masikati iwo akhadikhira m'misuwo ya mzinda towera aphe Saulo.

²⁵Mbwenye anyakumtewerache adamkwata na mosiku mbakamtchithisira na m'chitundu pabenga ya fufu yakuzungulira mzindawo.

²⁶Pidabwera Saulo ku Yerusalemu, adayesa-yesa kuti apitembo m'gulu ya anyakufunza, mbwenye onsenewo adamgopa thangwi nee adakhulupirabi kuti iye akhali nyakufunza chadi-chadi.

²⁷Tenepo Barnaba adamkwata mbabwera naye kuna anyakutumwa. Iye adaapanga mule mudaonera Saulo Mbuya paulendo wache na mule mukhadalongera Mbuya kuna iye, pontho na mule mukhadalalika iye mwakusowa mantha na dzina ya Yesu mu Damasiko.

²⁸Tenepo Saulo adakhala nawo pabodzi mbaenda mu Yerusalemu monsene, na kulalika mwakuwanga mtima na dzina ya Mbuya.

²⁹Iye adalonga pontho na kupokanyisana na Ayuda olonga chilongero cha Chigriki, mbwenye iwo adayesa-yesa kuti amphe.

³⁰Pidapiva anyakukhulupira, adakwata Saulo mbaenda naye kuluwani ya Kesarea mbamgwinya ku Tariso.

³¹Tenepo mpingo wa m'mizinda ya Yudea, Galilea na Samaria ukhali pandzidzi wa mtendere. Na chiphedzo cha Mzimu Wakuchena mpingo udawangiswa na kukula pyakwanga, tenepo ukhali wakugopa Mbuya.

³²Peturo adenda konsene kwene. Tenepo ndzidzi unango iye adenda kafambira anthu a Mulungu kumzinda wa Lida.

³³Kweneko adagumana munthu, dzinache Enea, nyamfutete, ule pyaka pisere hadakwanise kulamuka patalimba pache tayu.

³⁴Tenepo Peturo adalonga kuna iye mbati, “Enea, Yesu Khristu akuwangisa. Lamuka, thasika talimbako mwadidi.” Enea adalamukiratu kabodzi na kabodzi.

³⁵Tenepo anthu onsene a ku Lida na a ku Sharoni adamuona mbasanduka anyakukhulupira Mbuya.

³⁶Kumzinda wa Yopa kukhali nyakufunza wamkazi, dzinache Tabita (m'chilongero cha Chigriki ndi “Dorika” nkhulonga kuti “Nyasa”), ule ndzidzi onsene akhachita pinthu pyadidi na kuphedza anyakutcherenga.

³⁷Pandzidzi wenewo iye adadwala pyakwanga mbafa. Tenepo mtembo wache udasambiswa mbugoneswa subi yapadzulu.

³⁸Lida akhali chifupi na Yopa. Tenepo pidava anyakufunza kuti Peturo akhali ku Lida, adatuma amuna awiri kampanga kuti achimbize kudza.

³⁹Tenepo Peturo adalamuka mbaenda pabodzi na amuna ale. Pidachita iye fikeni, adendeswa kusubi yapadzulu. Kweneko amamfelwa achikazi onsene adagumanyikana mwakumzungulira, uku akulira mbaonesa Peturo mayala na nguwo zikhadasona Dorika mbali m'maso.

⁴⁰Peturo adaabulusa onsene kunja kwa subi, adagodama pansi mbapemphera. Tenepo adazungunukira kuna mtembowo mbalonga mbati, “Tabita, lamuka!” Dorika adafungula maso ache. Pidaona iye Peturo, adakhala na matako.

⁴¹Peturo adaphata dzanjache mbamphedza kuimira. Kubuluka penepo Peturo adachemera anyakukhulupira pabodzi pene na amamfelwa achikazi mbamuonesa kuna iwo wamoyo.

⁴²Mbiri yeneyi idafala mu Yopa monsene, tenepo anthu azinji adakhulupira Mbuya.

⁴³Peturo adakhala ku Yopa nsiku zizinji pabodzi na Simoni nyakufukuta nthembe.