Read cisena AROMA 1 Bible Online

AROMA 1 - cisena bible

AROMA 1

¹Kubulukira kuna ine Paulo, nyabasa wa Khristu Yesu, wakuchemerwa na Mulungu kukhala nyakutumwa, pontho wakusankhulwa kalalika Mphangwa zache Zadidi.

²Mulungu adadumbira kale ene kudzapereka Mphangwa Zadidizi kudzera muna maprofeti ache, ninga mwalemberwa ipyo m'Malemba akuchena.

³Mphangwazi zikulonga pya Mbuya Yesu Khristu, Mwanache. Kulonga pya umunthu wache iye akhali chidzukulu cha Mfumu Davite.

⁴Mbwenye kulonga pya moyo wache wauzimu, Mzimu Wakuchena adatsikimiza mwamphamvu kuti ndiye Mwana Mulungu pakumulamusa kuimfa.

⁵Kudzera muna iye Mulungu adandipasa mwayi wakukhala nyakutumwa thangwi ya Khristu, towera ndichitise anthu a madzinza onsene kukhulupira pontho kuvera.

⁶Penepi pikulonga pontho imwe anthu a kudziko ya Roma, ale Mulungu akuchemerani kuti mukhale anthu a Yesu Khristu.

⁷Kwenda kuna anthu onsene a mu Roma, ale ambafunwa na Mulungu mbachemerwa kukhala anthu ache. Kukoma mtima na mtendere pyakubulukira kuna Babathu Mulungu pontho Mbuya Yesu Khristu pikhale namwe.

⁸Chakutoma ndinapereka takhuta kuna Mulungu wanga kudzera muna Yesu Khristu thangwi ya monsenene, thangwi anthu a padziko yonsene yapansi akuva pya chikhulupiro chanu.

⁹Mulungu, ambatumikira ine na mtimanga onsene pakulalika Mphangwa Zadidi zakulonga pya Mwanache ule, ndi mboni yanga yakuti pinalonga inepi mphyakuonadi. Mulungu ambapidziwa kuti ine ndimbakukumbukani,

¹⁰ndzidzi onsene unapemphera ine. Ndimbapempha Mulungu na kufuna kwache atawirise kuti pakumalisira pikhale pyakukwanisika kukufambirani kwanuko.

¹¹Thangwi ndikupifuna pyakwanga kukuonani kuti ndigawane namwe mtsanzayiso wakubulukira kuna Mzimu Wakuchena, towera ndikuwangiseni mtima.

¹²Penepa ndikufuna kulonga kuti tonsene, imwe na ine, tinawangiswa mtima na chikhulupiro cha unango na mwanzache.

¹³Abale anga, ndapifuna mudziwe kuti ndzidzi onsene ine ndasasanyika kukufambirani, mbwenye na lero pana chinthu chinango chikundikhondesa kuchita tenepo. Pinafuna ine mphyakuti ndisanduse anthu azinji pakati panupo kukhala anyakukhulupira ningambo mwachitira ine kuna anthu okhonda khala Ayuda.

¹⁴Ine ndina mangawa akulalika kuna anthu onsene, anyakutsogola papinthu na anyakusalira papinthu ene, anyakufunza na anyakukhonda funza ene.

¹⁵Natenepo ndina chipapu chakulalika Mphangwa Zadidi kuna imwembo anthu a mu Roma.

¹⁶Ine ndimbanyindira pyakwanga Mphangwa Zadidi, thangwi yeneyi ndi mphamvu za Mulungu yakupulumusira onsene ambakhulupira ale, chakutoma Ayuda kubuluka penepo anthu okhonda khala Ayuda.

¹⁷Mphangwa Zadidi zimbaonesa mule mumbachitisira Mulungu anthu kukhala akulungama pamaso pache kudzera muna chikhulupiro basi, kutomera pakutoma mpakana kumamalisiro. Ninga munalongera Malemba kuti, “Munthu analungamiswa pamaso pa Mulungu kudzera muna chikhulupiro anati akhale na moyo.”[1]

¹⁸Ukali wa Mulungu ukuoneka kubulukira kudzulu pana pyakudawa na pyakuipa pyonsene pya anthu, ale makhaliro awo akudawika ambachitisa kuti pyakuonadi pya Mulungu pileke oneka.

¹⁹Mulungu ambaatchunyusa, thangwi pinthu pinakwanisa iwo kudziwa pya Mulungu mphyakuoneka mwadidi mwene kuna iwo. Mulungu mwenechiroache ndiye apichitisa kuti pikhale pyakuonadi kuna iwo.

²⁰Kutomera ndzidzi udalenga Mulungu dziko yapansi kufikirana lero, anthu aonadi pinthu pyokhonda oneka pya Mulungu, mphamvu zache zokhonda mala na umulungu wache ene. Anthu ambadzindikira penepi angaona pinthu pidalenga Mulungu, natenepo iwo nkhabe chinthu chakuti alonge tayu!

²¹Iwo ambamdziwa Mulungu, kwache iwo nkhabe kumulemedza ninga Mulungu, penu na kupereka kwene takhuta kuna iye tayu. M'mbuto mwache pyakunyerezera pyawo pyasanduka pyapezi, pontho mumtima mwawo muna mdima pyakwanga.

²²Iwo ambapilonga kuti mbanthu anzeru, mwenemo iwo mbali mapupwe.

²³M'mbuto mwa kupembedza Mulungu okhonda kufa ule, iwo ambapembedza mifanikizo yakuoneka ninga anthu ambafa ale, penu ninga mbalame, penu ninga nyama za miyendo minayi penu zakukambadza.

²⁴Natenepo Mulungu adaaleka anthu kuti achite pyawo pinthu pyakuipa pimbakhumba mtimawo, tenepo iwo ambachitirana pinthu pyakuchitisa manyadzo.

²⁵Iwo ambasandusa pyakuonadi pya Mulungu kukhala pyakunama; iwo ambapembedza na kutumukira pinthu pidalenga Mulungu kusiya kupembedza Mulungu nyakupilengayo, nyakuthema kupembedzwa ndzidzi onsene! Ameni.

²⁶Na thangwi yakuti iwo ambachita penepi, Mulungu aaleka kuti achite pyawo pikhumbo pyakuchitisa manyadzo. Na akazi enembo aleka makhaliro awo akubalwa nawo a pya kugonana na amuna, mbateweza makhaliro okhonda balwa nawo.

²⁷Amunambo ntchibodzi-bodzi, aleka makhaliro awo akubalwa nawo kuna akazi mbasirirana pyawo amuna okhokha. Amuna akuchita pinthu pyakuchitisa manyadzo kuna unango na mwanzache, natenepo iwo akupichemerera okha ene kutchunyuswa kwathema kudza thangwi ya kuchita pyakudawika.

²⁸Na thangwi yakuti anthu enewo akhonda kukoya mumtima mwawo pinthu pyakuonadi pinadziwa iwo pya Mulungu, iye aaleka kuteweza pyawo manyerezero akuipa a mumtima mwawo, towera achite pyawo pinthu pyokhonda thema kupichita.

²⁹Iwo adzala na pyakudawika pya mtundu onsene, pyakuipa, mtima na kuchitirana pyakuipa unango na mwanzache; iwo adzala na bivu, kupha, nthonga, kunama na kuipirwa. Iwo ambalongana tsweda

³⁰mbalongerana pyakuipa; mbanyamalwa a Mulungu, akutikana,[2] akunyada, pontho akugaya; pimbanyerezera iwo nkhusasanya njira zinango zakudawika basi; iwo nkhabe vera makolo awo tayu;

³¹iwo ngakupupwa, ngokhonda khulupirika, pontho iwo nkhabe komera mtima penu kuvera nsisi anthu anango tayu.

³²Iwo ambadziwadi kuti mwambo wa Mulungu umbalonga kuti anthu akuchita pinthu ninga penepi athema kufa, kwache iwo ambathimiza kuchita basi pyonthopyo mbakomerwa na anthu anango ambachita penepi ale.