Read cisena AROMA 10 Bible Online

AROMA 10 - cisena bible

AROMA 10

¹Abale anga, ndikupifuna na mtimanga onsene kuti Aisraele anzanga apulumuke. Ine ndimbaapempherera pikulu kuna Mulungu.

²Ndinakwanisa kuchitira umboni kuti iwo ngaphinga na pinthu pya Mulungu, kwache phingawoyo si yanzeru nayo chadi-chadi tayu.

³Iwo hakudziwa tayu mule mumbalungamisira Mulungu anthu pamaso pache, mbwenye m'mbuto mwache iwo apiyesera okha kupiikhira njirawo, nee kupipereka tayu kuna njira ya Mulungu yakulungamisira nayo.

⁴Khristu amalisa mwambo, towera onsene ambamkhulupira ale akhale akulungama pamaso pa Mulungu.

⁵Mose adalemba tenepa pya kulungamiswa kwa anthu pamaso pa Mulungu kudzera muna mwambo: “Munthu anavera mwambo, anakhala na moyo kudzera muna mwambowo.”

⁶Mbwenye pidalonga Malemba pya kulungamiswa kwa anthu pamaso pa Mulungu kudzera muna chikhulupiro mphipi: “Lekani kupivunza mwekha ene kuti, ‘Mbani anafuna dzaenda kudzulu?’ ” (Kweneku ndiye kutchithisa Khristu kubulukira kudzulu.)

⁷“Pontho lekani kupivunza kuti, ‘Mbani anafuna dzatchitha pansi ku Chiphompho chikulu?’ ” (Kweneku ndiye kubulusa Khristu kumbuto ya anyakufa.)

⁸Penepi pikulonga kuti, “Mphangwa za Mulungu zili chifupi namwe, m'kanwa mwanu na mumtima mwanu mwene.” Zenezi ndi mphangwa za chikhulupiro zimbalalika ife zile.

⁹Imwe mungatawira na mulomo wanu kuti Yesu ndi Mbuya mbamukhulupira mumtima mwanu kuti Mulungu adamulamusa kuimfa, munati mupulumuke.

¹⁰Thangwi Mulungu ambatilungamisa pamaso pache kudzera muna chikhulupiro mumtima mwathu, pontho timbapulumuka kudzera muna kutawira kwathu na mulomo wathu.

¹¹Malemba akulonga kuti, “Munthu onsene anamkhulupirayo nkhabe dzachita manyadzo tayu.”

¹²Penepi pikulonga kuna munthu onsene, thangwi nkhabe kusiyana tayu pakati pa Ayuda na anthu okhonda khala Ayuda. Mulungu ndi Mbuya mbodzi wa anthu onsene, tenepo iye ambatsanzayisa pikulu pene anthu onsene ambamchemera kuti aaphedze ale.

¹³Ninga munalongera Malemba kuti, “Munthu onsene anachemera Mbuya kuti amphedzeyo, anapulumuka.”

¹⁴Apo pinakwanisika tani kuchemera Mbuya kuti aaphedze ngakhala iwo nkhabe khulupira tayu? Pinakwanisika tani kuti iwo akhulupire ngakhala hadave mphangwa tayu? Pinakwanisika tani kuti iwo ave mphangwa ngakhala mphangwazo zikulalikwa kuna iwo tayu?

¹⁵Apo mphangwazo zinalalikwa tani, ngakhala anthu akuzilalika nkhabe tumwa kazilalika tayu? Ninga munalongera Malemba kuti, “Mphyakukoma pyakwanga kudza kwa anyakulalika mphangwa zadidi.”

¹⁶Kwache si anthu onsene atambira mphangwa zadidi tayu. Mprofeti Yesaya ene adapilonga mbati, “Mbuya, mbani adakhulupira mphangwa zathu?”

¹⁷Tenepo chikhulupiro chimbadza munthu angava mphangwa; angava mphangwa zakulonga pya Khristu zikulalikwa.

¹⁸Apo ndivunze, ayi mphyakuonadi kuti anthu a ku Israele hadave mphangwa zadidi tayu? Ndimomwene iwo adava, thangwi Malemba akulonga kuti, “Falawo idaveka padziko yonsene yapansi, mafalawo adafika kumadolomero a dziko.”

¹⁹Ndivunze pontho: Ayi anthu a ku Israele hadapivese tayu? Mose ene ndiye nyakutoma kutawira kuti: “Ndinakuchitisani kukhala abivu pakuphatisa basa dzinza yokhonda khala dzinza chadi-chadi. Ndinakuchitisani kuzhangali pakuphatisa basa dzinza ya anthu akupupwa.”

²⁰Yesaya awanga mtima pyakwanga pinalonga iye mbati, “Anthu adakhonda kundisaka-saka, ndiye adandigumana. Ndidaonekera kuna anthu akhakhonda kuvunza pya ine.”

²¹Mbwenye pya anthu a ku Israele iye adalonga mbati, “Nsiku yonsene ndidafuthula dzanjanga kutambira anthu okhonda vera na akupandukira.”