Read cisena AROMA 11 Bible Online

AROMA 11 - cisena bible

AROMA 11

¹Apo ndivunze, ayi Mulungu adakhonda anthu ache? Nkhabe tayu! Ine ene pano ndine Muisraele, chidzukulu cha Abrahamu wa dzinza ya Benjemani.

²Mulungu hadakhonde anthu ache tayu, adasankhula iye pakutoma ale. Mukudziwa pinalonga Malemba m'ndima idadungunya mprofeti Elia kuna Mulungu kupokanyisana na Israele ile mbati,

³“Mbuya, iwo apha maprofeti anu mbagwisa maguwanu a nsembe. Ndasala ndine ene basi, tenepo iwo akuyesa-yesa kuti andiphe.”

⁴Mulungu adamtawira tani? Adamtawira mbati, “Ndapikoyera amuna pikwi pinomwe ale akhonda kupembedza Baala, milungu yakunama ile.”

⁵Tenepo mwaka uno pili sasawa; asala ngakuchepa pakati pa anthu asankhulwa na Mulungu ale, thangwi ya kukoma kwache mtima.

⁶Kusankhula kwache kwagona pa kukoma kwache mtima, nee papinthu pyachita iwo tayu, thangwi ngakhala kusankhula kwa Mulungu kudagona papinthu pimbachita anthu, penepo kukoma kwache mtima nee mbukudakhala kwa chadi-chadi tayu.

⁷Ninji pontho? Anthu a ku Israele hadachigumane chinthu chikhasaka iwo chile tayu. Mbwenye anthu akuchepa adasankhula Mulungu ale adachigumana; akusala ale adasanduka madodo kuna kuchemera kwa Mulungu.

⁸Ninga munalongera Malemba kuti, “Mulungu adachitisa nzeru zawo kukhala zakufa, mwakuti na lero ene iwo nkhabe kwanisa kuva penu kuona tayu.”

⁹Pontho Davite akupilonga kuti, “Maphwando awo mbakhale ninga misampha kuna iwo; iwo mbagwe pontho atchunyuswe!

¹⁰Maso awo mbafungike towera aleke kwanisa kuona, pontho ndzidzi onsene achitiseni kuva kupha, thangwi ya nyatwa zina iwozo.”

¹¹Apo ndivunze kuti pidagwegweduka Ayuda, ayi iwo adagwa mwakuvungikiratu? Nkhabe tayu! Podi iwo adadawa, chipulumuso chidadza pyacho kuna anthu okhonda khala Ayuda, towera Ayudawo achite nawo bivu.

¹²Kudawa kwa Ayuda kudadzesa kutsanzaya kukulu padziko yapansi, kutcherenga kwawo mumzimu kudadzesa kutsanzaya kukulu kuna anthu okhonda khala Ayuda. Mphapo Ayuda onsene anafuna dzapulumuka angathimizirwa kuna anyakupulumuka, kutsanzaya kwache kunakhala kukulu tani!

¹³Chinchino ndikulonga na imwe anthu okhonda khala Ayuda. Podi ine ndine nyakutumwa kuna anthu okhonda khala Ayuda, ndinati ndinyadire basanga inaphata ineyi.

¹⁴Mwinango ndinakwanisa kusandusa anthu a dzinzanga kukhala na bivu, towera ndikwanise kuchitisa anango pakati pawo kupulumuka.

¹⁵Ndzidzi udaakhonda Mulungu ule, anthu a padziko yapansi adasanduka pontho ashamwali a Mulungu. Apo pinakhala tani Mulungu angaatawira? Kuna anthu akufa unakhala moyo!

¹⁶Ngakhala nyetswa yakutoma kumenywa pamkate inaperekwa kuna Mulungu, tenepo mkate onsene wamumphuwo ngwache pontho; ngakhala mitsitsi ya muti inaperekwa kuna Mulungu, na nthambi zenezo nsache pontho.

¹⁷Nthambi zinango za muti wakubzalwa waolivi zasadzwa, tenepo nthambi za muti wam'tsanga waolivi zafekiwa kumutiwo. Imwe anthu okhonda khala Ayuda mwakhala ninga muti waolivi wam'tsanga, tenepo chinchino imwe mukutambirambo madzi a mitsitsi ambapasa moyo muti wakubzalwa waolivi ule sasawa na Ayuda.

¹⁸Tenepo lekani kutikana anthu adasadzulwa ninga nthambi ale. Ninji chinafuna imwe nyadira? Podi ndimwe nthambi zene pyanu, imwe nkhabe phatisa mitsitsi, mbwenye mitsitsi imbaphatisa imwepo.

¹⁹Penepo imwe munalonga kuti, “Ande, kwache nthambi zidasadzwa kundipasa mbuto.”

²⁰Ndimomwene kuti izo zidasadzwa thangwi ya kukhonda khulupira, mwenemo imwe muli m'mbuto mwanu thangwi mumbakhulupira. Kwache lekani kunyada thangwi ya penepi, mbwenye chitani mantha.

²¹Mulungu hadasiye Ayuda m'mbuto mwawo tayu, ale akhala ninga nthambi chadi-chadi za muti zakubalwa nawo; kadi imwe mukunyerezera kuti Mulungu anakusiyani m'mbuto mwanu?

²²Penepa tinakwanisa kuona nsisi, pontho kukala mtima kwa Mulungu. Iye azhangalira anthu akugwa ale, mbwenye akomera mtima imwepo ngakhala munathimiza kuchita pinthu pyakumkomera. Mbwenye mungakhonda chita tenepa, imwe ene munasadzulwambo.

²³Ngakhala Ayuda analeka kukhonda khulupira kwawo, anati abwezerwe m'mbuto zawo zakale zile, thangwi Mulungu anakwanisa kuchita tenepo.

²⁴Imwe anthu okhonda khala Ayuda mwakhala ninga nthambi ya muti waolivi wam'tsanga yakusadzulwa ile mbifekererwa kumuti wakubzalwa waolivi yakusiyana na makhaliro akubalwa nawo a muti. Ayuda akhala ninga muti wakubzalwawu; tenepo pinakhala chifupi pyakwanga kuna Mulungu kufekerera pontho nthambizi kumuti wawo.

²⁵Abale anga, penepa pana pyakubisika pyakuonadi pinafuna ine kuti mupidziwe pile, thangwi pinakuchitisani kuti muleke kupiyesa ninga ndimwe anthu anzeru. Pyakubisika penepi mphyakuti kuuma mtima kwa anthu a ku Israele si kwakukhala na kukhala tayu, mbwenye kunamala kufikirana anthu onsene okhonda khala Ayuda anafuna dzakhulupira Mulungu ale, amkhulupire.

²⁶Tenepo mwenemu ndi mule munafuna dzapulumusirwa anthu onsene a ku Israele. Ninga munalongera Malemba kuti, “Nyankhombo anabulukira ku Zioni mbabulusa pyakudawa pyonsene pya pidzukulu pya Yakobo.

²⁷Ine ndinachita nawo chiverano chenechi ndzidzi unabulusa ine pyakudawa pyawo.”

²⁸Podi iwo adakhonda Mphangwa Zadidi, Ayuda asanduka anyamalwa a Mulungu, thangwi ya anthu okhonda khala Ayuda. Podi Mulungu adaasankhula, chinchino mbashamwali ache thangwi ya makolo awo akuveka a Chiheberi.

²⁹Mulungu nkhabe sanduza manyerezero ache pa anthu ambasankhula na kutsanzayisa iye ale tayu.

³⁰Imwembo anthu okhonda khala Ayuda, kale ene mudakhonda kuvera Mulungu; mbwenye chinchino Mulungu akuverani nsisi thangwi ya kukhonda vera kwa Ayuda.

³¹Ntchibodzi-bodzi, thangwi ya kukuverani nsisi kudachita Mulungu, chinchino Ayuda akukhonda vera Mulungu, towera chinchino[15] Mulungu aaverembo nsisi.

³²Mulungu achitisa anthu onsene kukhala anyaperezo a kukhonda vera kwawo, towera iye aonese nsisi zache kuna iwo onsene.

³³Mfuma ya Mulungu njakuinjipa pyakwanga. Nzeru na udziwisi wache mphyakuzwika pyakwanga. Mbani anakwanisa kudziwa manyerezero ache? Mbani anakwanisa kuvesa pinthu pimbachita iye?

³⁴Ninga munalongera Malemba kuti, “Mbani ambadziwa manyerezero a Mbuya? Mbani anakwanisa kupangiza Mbuya pyakuchita?

³⁵Chipo mbani ampasa pinthu kuti iye adathema kukhala na mangawa?”

³⁶Podi pinthu pyonsene pidalengwa na iye, tenepo pinthu pyonsene pina moyo kudzera muna iye pontho thangwi ya iye. Demelero ikhale kuna Mulungu kwenda na kwenda! Ameni.