Read cisena AROMA 14 Bible Online

AROMA 14 - cisena bible

AROMA 14

¹Tambirani mwadidi munthu wakuchepa chikhulupiro, kwache lekani kupokanyisana naye pa manyerezero ache akusiyana na anu.

²Munthu unango chikhulupiro chache chimbamtawirisa kudya pyakudya pya mtundu onsene, mbwenye unango, ule ana chikhulupiro chakuchepa ambakhonda kudya nyama ya mtundu onsene.

³Munthu ambadya pinthu pyonsene ule aleke selusa mwanzache wakukhonda kudya pyonsene ule. Tenepo ule nkhabe kudya nyama aleke longa kuti mwanzache wakudya nyama ule adawa, thangwi Mulungu amtawirisa kuchita tenepo.

⁴Ndiwe animbo iwe ulonge kuti nyabasache wa munthu unango adawa? Ndi mbuyache ene basi anafuna dzapitonga ngakhala iye akupikwanisa penu akupichimwana. Iye anati apikwanise m'tsogolo, thangwi Mbuya ndiye anafuna dzachitisa kuti iye apikwanise.

⁵Munthu unango ambanyerezera kuti nsiku inango njakufunika pyakwanga kupiringana nsiku zinango zonsene, mwenemo munthu unango ambayesa kuti nsiku zonsene ndi sasawa. Munthu onsene mbapichite ninga munanyerezera iye kuti mphyakuthema.

⁶Munthu ambanyerezera kuti nsiku inango njakufunika pyakwanga kupiringana nsiku zonsene, ambachita tenepo kulemedza Mbuya. Tenepo munthu anadya pyonseneyo, ambachita tenepo kulemedza Mbuya thangwi ambapereka takhuta kuna Mulungu iye angadya pyakudyapyo. Munthu onsene anakhonda kudya pyonsene ule, ambachita tenepo kulemedza Mbuya, kupereka takhuta kuna Mulungu.

⁷Nkhabe mbodzi pakati pathu ambakhala na moyo iye yekha ene tayu; nkhabe mbodzi pakati pathu ambafa iye yekha ene tayu.

⁸Ngakhala tinakhala na moyo, tinakhala na moyo thangwi ya Mbuya; ngakhala tinafa, tinafa thangwi ya Mbuya. Natenepo penu tikhale na moyo, penu tife, ndife ache a Mbuya.

⁹Ndi thangwi yache Khristu adafa mbalamuka kuimfa towera akhale Mbuya wa anthu a moyo na akufa ene.

¹⁰Tenepo, mwatani mumbalonga kuti akhristu anzanu adawa, pontho mumbaseluseranji akhristu anzanu? Tonsenefe tinaimira pamaso pa Mulungu kutongwa mseru.

¹¹Thangwi Malemba akulonga kuti, “Mbuya alonga mbati, ‘Ine ndine Mulungu wamoyo; natenepo munthu onsene anati andigodamire, pontho munthu onsene anati atawire na mulomo wache kuti ndine Mulungu.’ ”

¹²Tenepo tonsenefe tinati tilonge kuna Mulungu pinthu pyonsene pikhachita ife.

¹³Natenepo tileke longa kuti unango adawa. M'mbuto mwache tinyerezere kuleka chita pinthu pyakuchitisa abale anu kugwegweduka penu kuchita pyakudawa.

¹⁴Mukuphatanizana kwanga na Mbuya Yesu ndikupidziwadi kuti nkhabe chakudya pachokha ntchakuswipa tayu pamaso pa Mulungu. Mbwenye ngakhala munthu anakhulupira kuti chakudya ntchakuswipa, kuna iye chakudyacho ntchakuswipadi.

¹⁵Ngakhala munatsukwalisa mbaleanu thangwi ya pinthu pimbadya imwe, penepo imwe nkhabe kumfuna mbaleanuyo tayu. Lekani kumvunga mwanzanu, ule Khristu adamfera, thangwi ya pinthu pimbadya imwe.

¹⁶Lekani tawirisa kuti pinthu pimbayesa imwe mphyadidi pilongwe kuti mpyakuipa.

¹⁷Thangwi Ufumu wa Mulungu nkhabe pinthu na pya kudya penu na pya kumwa tayu, mbwenye chilungamo, mtendere na kukomerwa kumbapasa Mzimu Wakuchena kule.

¹⁸Tenepo munthu angatumikira Khristu ninga tenepa, iye ambachitisa Mulungu kukomerwa, pontho anthu anango ambamsimba.

¹⁹Tenepo ndzidzi onsene tathema kuyesa-yesa kuchita[17] pinthu pyakudzesa mtendere, towera pitiphedze kuwangisana mtima.

²⁰Lekani kuvunga pinthu pyachita Mulungu thangwi ya pyakudya. Imwe munakwanisa kudya pyakudya pyonsene, kupambula pile pinakwanisa kudawisa munthu unango.

²¹Mphyadidi kuthunda nyama penu vinyu, penu pile pinaona imwe kuti pinakwanisa kudawisa mbaleanu.

²²Koyani pinthu pinakhulupira imwe papinthu penepi, kwache pikhale pakati pa imwe na Mulungu. Ngwakutsanzaya munthu ule ambakhonda kupilonga yekha ene kuti adawa angachita pinthu pinaona iye kuti mphyakuthema!

²³Ngakhala iye ambapenuka na pinadya iye, Mulungu ambalonga kuti iye akonwa angapidya, thangwi iye nkhabe khulupira kuti pinachita iyepyo mphyakuthema tayu. Chinthu chonsene chingachitwa okhonda chikhulupiro, kweneko nkhudawa.