Read cisena AROMA 15 Bible Online

AROMA 15 - cisena bible

AROMA 15

¹Ife ale tina chikhulupiro chakuwanga tathema kuphedza anyakusowa mphamvu kuthukula nyatwa zawo. Tileke kupichitisa kukomerwa tekha ene.

²M'mbuto mwache ife tonsene tathemambo kuchitisa anzathu kukomerwa kuti kukhale udidi kuna iwo, towera iwo akule m'chikhulupiro.

³Khristu hadapichitise yekha ene kukomerwa tayu, mbwenye ninga munalongera Malemba kuti, “Kutikana kukhakuchitani iwo kule, kwagwera ine pano.”

⁴Pyonsene pidalembwa m'Malemba kale, pidalembwa kuti pitifunzise, towera tikhale na chidikhiro kudzera muna kupirira pontho kuwanga mtima kumbatifunzisa Malemba kule.

⁵Mulungu, mwenechiro kupirira pontho kuwanga mtima, mbakuchitiseni kukwanisa kuvana mwadidi, kuteweza upangizi wa Yesu Khristu,

⁶towera monsenene pabodzi na mtima ubodzi mukuze Mulungu pontho Baba wa Mbuyathu Yesu Khristu.

⁷Tambiranani unango na mwanzache mwadidi ninga mwakutambirirani Khristu, towera Mulungu alemedzwe.

⁸Thangwi ine ndikukupangani kuti Khristu adakhala mtumiki kuna Ayuda kuonesadi kuti Mulungu ngwakukhulupirika kuchitisa chiverano chidachita iye na makolo athu chile kukwana-kwana,

⁹pontho kuchitisa kuti na anthu okhonda khala Ayuda ene akuze Mulungu thangwi ya nsisi zache. Ninga munalongera Malemba kuti, “Ndinakukuzani pakati pa anthu okhonda khala Ayuda. Ndinaimba nyimbo zakukukuzani nazo.”

¹⁰Pyalembwa pontho kuti, “Komerwani imwe anthu okhonda khala Ayuda pabodzi na anthu a Mulungu.”

¹¹Pyalembwa pontho kuti, “Kuzani Mbuya, imwe anthu okhonda khala Ayuda monsene, Mkuzeni, imwe anthu a madzinza onsene.”

¹²Pontho mprofeti Yesaya apilonga kuti, “Chidzukulu cha Yese chinabwera, iye anabwera dzakhala mfumu wa anthu okhonda khala Ayuda, tenepo iwo anaikha chidikhiro chawo pana iye.”

¹³Mulungu mwenechiro chidikhiro mbadzaze mtimanu na kukomerwa pontho mtendere kudzera muna chikhulupiro chanu pana iye, towera chidikhiro chanu chithimize kukula na mphamvu za Mzimu Wakuchena.

¹⁴Abale anga, ndimomwene kuti ine ene pano ndikupidziwa kuti ndimwedi anthu adidi, pontho kuti mumbadziwa pyonsene mwadidi mwene, pontho mumbakwanisa kufunzisana unango na mwanzache.

¹⁵Mbwenye m'kalata yeneyi ndawanga mtima pyakwanga kulonga pya pinthu pinango pyakukukumbusani napyo. Ndawanga mtima tenepa thangwi ya mwayi wandipasa Mulungu

¹⁶wakukhala nyabasa wa Khristu Yesu kuna anthu okhonda khala Ayuda. Ndingalalika Mphangwa Zadidi zakubulukira kuna Mulungu, ndimbatumikira ninga nyansembe, towera anthu okhonda khala Ayuda aperekwe ninga nsembe yakutawirwa na Mulungu, pontho yakupambulika kuna iye kudzera muna Mzimu Wakuchena.

¹⁷Mukuphatanizana kwanga pabodzi na Yesu Khristu, ndinakwanisa kunyada thangwi ya kutumikira kwanga Mulungu.

¹⁸Ine sinalonga mwakuwanga mtima pya pinthu pinango tayu, kupambula pinthu pyachita Khristu pile, kudzera muna ine pano kuchitisa anthu okhonda khala Ayuda kuvera Mulungu. Mulungu achita penepi kudzera muna mafala na mabasa;

¹⁹kudzera muna mphamvu za pidzindikiro na pyakudodomesa, pontho na mphamvu za Mzimu wa Mulungu. Tenepo panjiranga yonsene kubulukira ku Yerusalemu kufikirana ku Iliriko, ine ndalalika monsene mwene Mphangwa Zadidi za Khristu.

²⁰Ndzidzi onsene ndimbakhumba chinthu chibodzi chene basi chakuti ndilalike Mphangwa Zadidi kumbuto zile zidakhonda veka Khristu, towera ndileke manga pamaziko adamanga anthu anango ale.

²¹Ninga munalongera Malemba kuti, “Ale adakhonda kupangwa pya iye, anati amuone; ale adakhonda kuva pya iye, anati apivese.”

²²Tenepo ndzidzi uzinji sidakwanisa tayu kudza kwanuko.

²³Mbwenye chinchino, podi ndamalisa basanga kunthemba za kunozi, pontho kuti pyaka pizinji ndikhapifuna kuti ndifike kwanuko,

²⁴ndikudikhira kuchita tenepo chinchino pano. Ndapinyerezera kukuonani pakwenda kwanga ku Spanya, kuti imwe mundiphedze kwenda kweneko, mwenemo ndamala komerwa na kuchedza namwe ndzidzi pang'ono.

²⁵Kwache chinchino pano ndikwenda ku Yerusalemu kapereka pinthu pyakuphedza napyo anthu a Mulungu kweneko.

²⁶Thangwi mipingo ya mu Makedonia na Akaya pidaakomera kupereka pinthu pyakuphedza napyo anthu akutcherenga pakati pa anthu a Mulungu a ku Yerusalemu.

²⁷Pidaakomera kuchita tenepo, kwache kulonga pyakuonadi, iwo ana mangawa akuti aaphedze, podi Ayuda adagawana na anthu okhonda khala Ayuda mtsanzayiso wawo wauzimu, tenepo anthu okhonda khala Ayudawo athema kuphatisa basa pinthu pyawo kuphedza napyo Ayuda.

²⁸Ine ndingamalisa basayi, pontho kutula pinthu pyonsene pidaperekwa kuna iwo, ndinati ndibuluke kweneko kwenda ku Spanya mbandifambirambo imwepo pakwenda kwanga kweneko.

²⁹Ndikupidziwa kuti ndingadza kuna imweko, ndinati ndidze na mtsanzayiso wakuinjipa wakubulukira kuna Khristu.

³⁰Abale, thangwi ya Mbuyathu Yesu Khristu, pontho na kufunana kumbapasa Mzimu Wakuchena kule, ndikukudembeterani kuti pabodzi na ine tipemphere kuna Mulungu na mtima onsene thangwi ya ine.

³¹Pempherani kuti Mulungu andiyang'anire mwadidi gopesera Ayuda okhonda khulupira a mu Yudea. Pempherani pontho kuti anthu a Mulungu a mu Yerusalemu atambire mwakukomerwa pinthu pyakuaphedza napyo pina inepi.

³²Tenepo ndinabwera kwanuko na kukomerwa kukulu, ngakhala Mulungu anapifuna kuti pikhale tenepo, mbanditsanzaya na kupuma thangwi ya kuchedza namwe kwanga.

³³Mulungu, mwenechiro mtendere, mbakhale namwe monsene. Ameni.