Read cisena AROMA 16 Bible Online

AROMA 16 - cisena bible

AROMA 16

¹Ndikumpereka nyamaingathu Febe kuna imwe, nyakutumikira mpingo wa ku Kenkerea ule.

²Mtambireni mwadidi na dzina ya Mbuya, ninga mwathema anthu a Mulungu kuchita, pontho mphedzeni na pinthu pinasowa iye, thangwi iye achita udidi kuphedza nawo anthu azinji pontho na ine ene.

³Ndinapereka mwenyikiro kuna Prisila na Akila, anzanga akuphata nawo basa pabodzi yakutumikira Yesu Khristu;

⁴iwo adasasanyika kufa, thangwi ya ine pano. Ndinapereka takhuta kuna iwo, kwache si ine ndekha ndinapereka takhuta tayu, mbwenye na mipingo ene ya anthu okhonda khala Ayuda.

⁵Ndikupereka pontho mwenyikiro kuna mpingo umbagumanyikana m'nyumba mwawo kupemphera ule. Ndikupereka mwenyikiro kuna shamwalianga wapamtima, Epeneto, ule akhali munthu wakutoma kukhulupira Khristu m'nthemba ya Asia.

⁶Mwenyikiro kuna Maria, akuphatirani basa mwakuwangisa ule.

⁷Mwenyikiro pontho kuna Androniko na Yunia,[18] Ayuda anzanga akhali na ine pabodzi m'perezo ale; iwo akhali akudziwika pakati pa anyakutumwa, pontho iwo akhali akutoma kusanduka akhristu ine mbandidzati.

⁸Mwenyikiro kuna Ampiliato, shamwalianga wapamtima mukuphatanizana kwathu na Mbuya.

⁹Mwenyikiro kuna Urubano, nyabasa mwanzanga pabasa ya Khristu, na Staku, shamwalianga wapamtima ule.

¹⁰Mwenyikiro kuna Apele, ule kukhulupirika kwache kuna Khristu kwatsikimizwa. Mwenyikiro kuna onsene a m'banja ya Aristobulo.

¹¹Mwenyikiro kuna Herodiono, Myuda mwanzanga, pontho kuna abale onsene m'banja ya Narikiso.

¹²Mwenyikiro kuna Trifena na Trifosa, akazi ale ambaphatira basa Mbuya, pontho na shamwalianga wapamtima Perisi, ule achita pizinji kuphatira basa Mbuya.

¹³Ndikupereka mwenyikiro kuna Rufu, nyabasa adasankhulwa kutumikira Mbuya ule, pabodzi na mache ene, ule ambakhala ninga mamanga ene.

¹⁴Mwenyikiro kuna Asinkrito, Felego, Hereme, Patiroba, Herima na akhristu anango onsene ali kweneko pabodzi nawo.

¹⁵Mwenyikiro kuna Filologo na Zhulia, kuna Nerea na nyamaingache ene, kuna Olimpa, pontho kuna anthu onsene a Mulungu ali kweneko pabodzi nawo.

¹⁶Pasanani mwenyikiro wachikhristu kuonesa kufunana unango na mwanzache. Mipingo yonsene ya Khristu kuno ikupereka mwenyikiro kuna imwe.

¹⁷Abale anga, ndikukupemphani kuti mukhale m'maso na ale ambagawanisa anyakukhulupira na kudzudzumisa chikhulupiro chawo pakupokanya pinthu pidafunziswa imwe pile. Tenepo khalani kutali nawo.

¹⁸Anthu ambachita pinthu ninga penepi ale nkhabe kutumikira Khristu Mbuyathu tayu, mbwenye ambatumikira pikhumbo pyawo. Na kudziwa kwawo kulonga, pontho na mafalawo akutapira, iwo ambanyengeza anthu anango okhonda dziwa pinthu.

¹⁹Anthu onsene ava pya kuvera kwanu Mphangwa Zadidi, tenepo na thangwi yeneyi ndakomerwa namwe pyakwanga. Ine ndikupifuna kuti imwe mukhale anthu anzeru zakudziwa pinthu pyadidi, kwache okhonda dziwa pinthu pyakuipa.

²⁰Tenepo Mulungu, mwenechiro mtendere, anapeya chinchino pano Satana pansi pa manyalo anu. Kukoma mtima kwa Mbuyathu mbakukhale namwe.[19]

²¹Timoti, mwanzanga wakuphata naye basa pabodzi, akupereka mwenyikiro kuna imwe. Lukio, Yasoni na Sosipatro, Ayuda anzanga akuchitambo chibodzi-bodzi.

²²Ine, Teritio, nyakulemba kalata ya Pauloyi, ndikuperekambo mwenyikiro wachikhristu kuna imwe.

²³Gayo, nyakundikoya m'nyumba mwache, pontho ule mpingo umbagumanyikana m'nyumba mwache akupereka mwenyikiro kuna imwe. Erasito, nyakukoya kobiri za mzinda na mbaleathu Kwarto ene, akupereka mwenyikiro kuna imwe.[20]

²⁵Tendeni tipereke demelero kuna Mulungu. Iye anakwanisa kukuchitisani kukhala na chikhulupiro chakuwanga, malingana na Mphangwa Zadidi zakulonga pya Khristu zimbalalika ine, pontho na udziwisi wa pyakubisika pyakuonadi pidabiswa kuna mifendu izinji ene m'nduli pile.

²⁶Kwache chinchino, pyakuonadi penepi pyaoneswa pakwecha kudzera muna pidalembwa na maprofeti, pontho kudzera muna matongero a Mulungu wakukhala na kukhala ule, lero pyadziwika kuna anthu a madzinza onsene, towera apive na kupikhulupira.

²⁷Kuna Mulungu yekha, Mulungu wanzeru zonsene, kukhale demelero kudzera muna Yesu Khristu kwenda na kwenda! Ameni.[21]