Read cisena AROMA 3 Bible Online

AROMA 3 - cisena bible

AROMA 3

¹Apo kukhala Myuda pana kuganyali kwanji? Penu pana kuganyali kwanji pontho munthu ungagwandwa?

²Pana kuganyali kukulu kukhala Myuda! Chakutoma Mulungu adapasa Ayuda mphangwa zache kuti azikoye.

³Apo ngakhala anango pakati pawo hanakhulupirika tayu, kadi ndiye kuti Mulungu hanakhulupirika tayu, thangwi yakukhonda kwawo khulupirika?

⁴Nkhabe na pang'ono pene! Mbwenye anthu apidziwe kuti Mulungu ngwakuonadi podi kwene kuti munthu onsene ngwakunama. Ninga munalongera Malemba kuti, “Imwe mwathema kuoneka wakulungama mungalonga, pontho mungatongwa mseru, mseruwo mbukukomereni.”

⁵Mbwenye ngakhala kukhonda lungama kwathu kukuonesa pakwecha kuti Mulungu ngwakulungama tinalonga tani? Kadi tinakwanisa kulonga kuti Mulungu ngokhonda lungama thangwi akutitchunyusa? (Ndikulonga penepi ninga mumbalongerambo anthu).

⁶Nkhabe tayu! Ngakhala Mulungu si wakulungama tayu, anakwanisa tani kutonga mseru anthu a padziko yapansi?

⁷Apo ngakhala kunama kwanga kukuchitisa kuti demelero ya Mulungu na pyakuonadi pioneke mwadidi mwene kupiringana pakutoma, thangwi yache ninji ndikutongwa kuti ndine wakudawa.

⁸Apo mwatani mumbakhonda longa kuti, “Tendeni tidawe pyathu towera udidi udze.” Ndimomwene kuti anthu anango akunditikana thangwi iwo akulonga kuti ndimbalonga penepi! Anthu enewa athema dzakonwa.

⁹Tinalonga tani? Kadi ife Ayuda tili pyadidi kupiringana anthu okhonda khala Ayuda? Nkhabe na pang'ono pene![3] Ndapilonga kale kuti Ayuda na anthu okhonda khala Ayuda ntchibodzi-bodzi, tonsene tili pansi pa mphamvu za pyakudawa

¹⁰ninga munalongera Malemba kuti, “Nkhabe na mbodzi ene wakulungama,

¹¹nkhabe na mbodzi ene wanzeru penu wakusaka-saka Mulungu.

¹²Anthu onsene abauka kubuluka kuna Mulungu onsene mbasanduka anthu apezi. Nkhabe na mbodzi ene ambachita pyakulungama tayu.

¹³Mafala ambalonga iwo ngakupha; lulume yawo imbalonga pyakunama pyakuipa, pontho pyakuthuswa pyakugoswa ninga ukali wa nyoka pimbabuluka pamulomo pawo.

¹⁴M'kanwa mwawo mumbadzala na mafala akutemberera pontho akuipa.

¹⁵Iwo ambachimbiza kupha na kukuwaza anthu;

¹⁶konsene kwene kunaenda iwo ambasakaziratu na kusiya anthu panyatwa.

¹⁷Iwo nkhabe funa pya mtendere tayu,

¹⁸pontho iwo nkhabe gopa Mulungu tayu.”

¹⁹Mbwenye chinchino tikupidziwa kuti pyonsene pili m'mwambomu pikulonga kuna ale ali pansi pa utongi wa mwambowo, towera anthu onsene asowe chakulonga, pontho kuti anthu a padziko yapansi yonsene adze kuna Mulungu dzatongwa mseru.

²⁰Nkhabe munthu anakwanisa kulongwa tayu kuti ngwakulungama pamaso pa Mulungu, na thangwi yakuti iye ateweza mwambo. Mwambo umbachitisa kuti munthu adziwe kuti iye adawa.

²¹Mbwenye chinchino njira ya Mulungu yakulungamisira nayo anthu pamaso pache yaoneswa pakwecha, pontho nkhabeve pinthu na mwambo tayu, podi kwene kuti mwambo wa Mose na maprofeti adapichitira umboni.

²²Mulungu ambalungamisa anthu pamaso pache kudzera muna chikhulupiro chawo pana Khristu. Iye ambachita sasawa kuna anthu onsene ambakhulupira Yesu Khristu, thangwi nkhabe kusiyana pakati pawo tayu,

²³thangwi anthu onsene adadawa, mbachimwana kufika pamaso pa Mulungu, Nyankhombo.

²⁴Mbwenye na thangwi ya kukoma mtima kwa Mulungu iye adaalungamisa pamaso pache mwakukhonda pagali kudzera muna Yesu Khristu, ambaaombola ule.

²⁵Mulungu adampereka, towera kudzera muna imfache ninga nsembe, iye akhale njira yakulekerera pyakudawa pyawo kudzera muna chikhulupiro chawo pana iye. Mulungu adachita tenepo towera aonese kuti iye ngwakulungama. Yesu mbadzati perekwa Mulungu adapirira nawo pontho hadaikhe konta pyakudawa pyawo tayu,

²⁶mbwenye chinchino Mulungu ampereka kuonesa kulungama kwache. Pakuchita tenepa Mulungu akuonesa kuti iye ngwakulungama, pontho kuti ambalungamisa anthu onsene pamaso pache ambakhulupira Yesu ale.

²⁷Apo chinchino ninji chinakwanisa ife kunyadira? Nkhabe! Thangwi yache njanji? Ayi ndi thangwi yakuti timbavera mwambo? Nkhabe, mbwenye kuti timbakhulupira.

²⁸Penepa tinakwanisa kulonga kuti chimbalungamisa munthu pamaso pa Mulungu ntchikhulupiro chene basi, nee kuti kuvera mwambo tayu.

²⁹Kadi Mulungu ndi Mulungu wa Ayuda okha? Kadi iye pontho si Mulungu wa anthu okhonda khala Ayuda tayu? Ndimomwene iye ndiyedi.

³⁰Mulungu ndi mbodzi ene basi, iye analungamisa Ayuda pamaso pache kudzera muna chikhulupiro chawo, pontho analungamisa anthu okhonda khala Ayuda pamaso pache kudzera muna chikhulupiro chawo.

³¹Kadi penepi pikulonga kuti pinaphatisa ife basa pya chikhulupiro tikutaya mwambo? Nkhabe tayu, mbwenye tikuuchitisa kuti ukhale wakufunika.