Read cisena AROMA 4 Bible Online

AROMA 4 - cisena bible

AROMA 4

¹Apo tinalonga tani pya Abrahamu, kholo wa dzinzathu? Ninji pidagumanikana na iye pa yekha?

²Ngakhala iye adalungamiswa na Mulungu thangwi ya mabasa adaphata iye, mbadakhala na chinango chakunyadira, kwache si pamaso pa Mulungu tayu.

³Malemba akulonga kuti, “Abrahamu adakhulupira Mulungu, tenepo na thangwi ya kukhulupira kwache, Mulungu adamuyesa wakulungama.”

⁴Munthu angaphata basa ambapagalwi thangwi ya basa yaphata iyeyo, kwache pimbakhala ninga mtukwa tayu, mbwenye mphyakuthema kuti iye atambire.

⁵Munthu ananyindira chikhulupiro ule, nee nyindira mabasache tayu, pontho ule ambakhulupira Mulungu, ambachitisa munthu wakudawika kukhala wakulungama ule, ndi chikhulupiro chache chimbaikha Mulungu konta towera munthu akhale wakulungama pamaso pache.

⁶Penepi ndiye pikhalonga Davite mudalonga iye pya kutsanzaya kwa munthu ule Mulungu ambamuyesa wakulungama pamaso pache, nee na thangwi ya mabasa ambaphata iye ale tayu. Iye adalonga mbati,

⁷“Ngakutsanzaya anthu ale umambalawo walekererwa, ale pyakudawa pyawo pyafudziwa.

⁸Ngwakutsanzaya munthu ule pyakudawa pyache Mbuya nkhabe dzapiikha konta tayu!”

⁹Kadi kutsanzaya kudalonga Davite nkhwa anthu ale adagwandwa nsonga yachimuna okha ene basi? Nkhabe tayu! Nkhabe na ale ene adakhonda gwandwa! Thangwi tawerenga m'Malemba akuti, “Abrahamu adakhulupira Mulungu, tenepo Mulungu adamuyesa wakulungama pamaso pache thangwi ya chikhulupiro chache.”

¹⁰Penepi pidachitika lini? Kadi pidachitika Abrahamu mbadzati gwandwa tayu, penu agwandwa kale? Ipyo pidachitika mwenemo mbadzati gwandwa, nee pidamala iye gwandwa tayu.

¹¹Iye adagwandwa m'nduli mwache, tenepo kugwandwa kwacheko kukhali chidziwiso chakuonesa kuti na thangwi ya chikhulupiro chache Mulungu adamuyesa wakulungama pamaso pache, iye mbadzati gwandwa. Tenepo Abrahamu ndi baba wa anthu onsene ambakhulupira Mulungu pontho ambayeswa akulungama pamaso pache ale, podi kwene kuti iwo hadagwandwe tayu.

¹²Pontho iye ndi baba wa anthu akugwandwa, nee adagwandwa kokha tayu, mbwenye ana moyo wa chikhulupiro sasawa ninga moyo ukhali na kholo wathu Abrahamu mbadzati gwandwa.

¹³Pidadumbira Mulungu kuna Abrahamu pontho na pidzukulu pyache kuti dziko yonsene yapansi inakhala yache, iye adapichitadi tenepo, nee na thangwi yakuti Abrahamu hadavere mwambo tayu, mbwenye na thangwi yakuti iye adakhulupira mbakhala wakulungama pamaso pa Mulungu.

¹⁴Ngakhala pidadumbira Mulungu kuna anthu pimbachitika thangwi ya kuvera mwambo, penepo kukhulupira kwa munthu nkhwapezi, pontho pidalonga Mulungupyo mphyakusowa basa.

¹⁵Mwambo umbadzesa ukali wa Mulungu, mbwenye panasowa mwambo, penepo nkhabe kuswa mwambo tayu.

¹⁶Tenepo pidadumbira Mulungu pidagona pa chikhulupiro chene basi, towera pidadumbira Mulungu pichitwe ninga mtukwa wa Mulungu, pontho kuti pikhale pyakukhazikika kuna pidzukulu pyonsene pya Abrahamu, nee kuna ale okha ambavera mwambo wa Mose tayu, mbwenye na kuna ale ene ambakhulupirambo ninga mudachitira Abrahamu. Thangwi Abrahamu ndi kholo wa tonsenefe

¹⁷ninga munalongera Malemba kuti, “Ine ndakuikha kukhala kholo wa madzinza azinji.” Abrahamu akhali na chikhulupiro pamaso pa Mulungu, Mulungu ambalamusa anthu kuimfa ule, pontho matongero ache ambachitisa pinthu kukhalapo, pinthu pile na kale ene pakhali nkhabe.

¹⁸Abrahamu adakhulupira mbadikhira, podi kwene kuti pakhali nkhabe thangwi ya kudikhira tayu, tenepo iye adasandukadi kholo wa madzinza azinji. Ninga munalongera Malemba kuti, “Pidzukulu pyako pinainjipa.”

¹⁹Ndzidzi wenewo iye akhali kale na pyaka dzana ibodzi, mbwenye chikhulupiro chache hadachitaye na pang'ono pene tayu pidanyerezera iye pya manungo ache. Iye adapidziwa kale kuti manungo ache akhali ninga akufa kale, pontho kuti mkazache Sara akhali wakuuma nthumbo.

²⁰Iye hadataye chikhulupiro chache tayu, pontho hadapenuke na pidadumbira Mulungu pile tayu, chikhulupiro chache chidampasa mphamvu mbakuza Mulungu.

²¹Iye adakhulupiradi kuti Mulungu anakwanisa kuchita pidadumbira iye pile.

²²Na thangwi ya chikhulupiro chache Mulungu “adamuyesa wakulungama pamaso pache.”

²³Mafala akuti, “Iye adayeswa wakulungama” hadalemberwe iye yekha tayu.

²⁴Mafalawo adalemberwa pontho ife ale anafuna yeswa akulungama, ife ale ambakhulupira iye, ule adalamusa Yesu Mbuyathu kuimfa.

²⁵Iye adaperekwa kuti aphiwe thangwi ya pyakudawa pyathu mbalamuswa kuimfa towera atichitise kukhala anthu akulungama pamaso pa Mulungu.