Read cisena AROMA 5 Bible Online

AROMA 5 - cisena bible

AROMA 5

¹Podi chinchino talungamiswa pamaso pa Mulungu thangwi ya chikhulupiro, tina[4] mtendere kuna Mulungu kudzera muna Yesu Khristu Mbuyathu.

²Kudzera muna chikhulupiro chathu iye achitisa kuti tidziwe kukoma mtima kumbachita Mulungu, kule kuna ife chinchino. Tenepo timbasekera[5] thangwi ya chidikhiro china ife kudzatambira nawo demelero ya Mulungu!

³Si pyokhapyo tayu, mbwenye timbasekera pontho[6] thangwi ya nyatwa zina ifezi, podi tikupidziwa kuti nyatwa zimbachitisa munthu kupirira,

⁴kupirira kumbachitisa munthu kutawirwa na Mulungu, kutawirwa na Mulungu kumbachitisa munthu kukhala na chidikhiro.

⁵Chidikhiro chenechi nkhabe kutichitisa kutaya mtima tayu, thangwi Mulungu akhuthula kutifuna kwache mumtima mwathu kudzera muna Mzimu Wakuchena, mtukwa udatipasa iye ule.

⁶Pikhali ife akusowa chiphedzo, Khristu adafera anthu akudawa pandzidzi wakuthema udasankhula Mulungu.

⁷Mphyakunensa kuti munthu unango afere munthu wakulungama, podi kwene kuti pikhale pyakukwanisika munthu kuwanga mtima kuti afere munthu wadidi.

⁸Mbwenye Mulungu ationesa kutifuna kwache kukulu kumbachita iye; Khristu adatifera pandzidzi ukhali ife anthu akudawa!

⁹Podi kudzera muna imfache ninga nsembe, chinchino talungamiswa pamaso pa Mulungu, ndimomwene ife tinapulumuswadi na iye kubulukira kuna ukali wa Mulungu.

¹⁰Ife tikhali anyamalwa a Mulungu, mbwenye iye adapichita kuti tikhale pontho ashamwali ache kudzera muna imfa ya Mwanache. Podi chinchino tikhale pontho ashamwali a Mulungu, ndimomwene ife tinapulumuswadi kudzera muna moyo wa Khristu.

¹¹Kwache si pyokhapyo tayu, timbasekera, thangwi ya pyachita Mulungu kudzera muna Mbuyathu Yesu Khristu, ule chinchino achitisa kuti tikhale pontho ashamwali a Mulungu.

¹²Kudawa kudadza padziko yapansi pano kudzera muna munthu mbodzi, tenepo kudawako kudadzesa imfa. Natenepo imfa yafalikira kuna anthu onsene, thangwi anthu onsene adawa.

¹³Mwambo mbudzati perekwa pansi pano kudawa kukhalipo kale. Pakusowa mwambo, Mulungu nkhabe ikha konta pyakudawa tayu.

¹⁴Mbwenye kutomera ndzidzi wa Adamu kufikirana ndzidzi wa Mose imfa ikhali na utongi pa anthu onsene, podi na pana ale ene hadadawe sasawa ninga mudadawira Adamu pakukhonda vera matongero a Mulungu kudachita iye kule. Adamu makayo akhali chithunzi-thunzi cha munthu akhafuna kudzayo.

¹⁵Kwache awiriwa hadalandane tayu, thangwi mtukwa wa Mulungu hudakhale ninga kudawa kwa Adamu tayu. Mphyakuonadi kuti anthu azinji adafa thangwi ya kudawa kwa munthu mbodzi. Mbwenye kukoma mtima kwa Mulungu nkhukulu pyakwanga, sasawambo mtukwache ngukulu pyakwanga kuna anthu azinji kudzera muna kukoma mtima kwa munthu mbodzi, Yesu Khristu.

¹⁶Tenepo pana kusiyana pakati pa mtukwa wa Mulungu na kudawa kwa munthu mbodzi. Pidadawa munthu kabodzi adatongwa kuti iye athema kutchunyuswa, mbwenye pidanyanya kuinjipa pyakudawa, mtukwa wa kukoma mtima kwa Mulungu udachitisa anthu kukhala akulungama.

¹⁷Mphyakuonadi kuti kudzera muna kudawa kwa munthu mbodzi kule, imfa idatoma kukhala na utongi thangwi ya munthu mbodzi ule. Mbwenye mbodzi, Yesu Khristu adachita pinthu pikulu pyakwanga mwakuti onsene ale adatambira kukoma mtima kwa Mulungu mbalungamiswa pamaso pache na mtukwa wa Mulungu, anakhala na moyo pontho utongi kudzera muna munthu mbodzi Khristu.

¹⁸Tenepo kudawa kabodzi kudachitisa kuti anthu onsene atongwe kutchunyuswa, sasawambo basa ibodzi yakulungama imbalungamisa anthu onsene na kuapasa moyo.

¹⁹Anthu azinji adakhala akudawa thangwi ya kukhonda vera kwa munthu mbodzi. Ntchibodzi-bodzi anthu azinji analungamiswa na Mulungu thangwi ya kuvera kwa munthu mbodzi.

²⁰Mwambo udaperekwa towera umambala uinjipe, kwache pimbainjipa kudawa, kukoma mtima kwa Mulungu kumbainjipambo pyakwanga pene.

²¹Podi kudawa kukhali na utongi kudzera muna imfa pakati pa anthu, sasawambo kukoma mtima kwa Mulungu kuna utongi kudzera muna kulungama kutidzesa kumoyo okhonda mala kudzera muna Yesu Khristu Mbuyathu.