Read cisena AROMA 6 Bible Online

AROMA 6 - cisena bible

AROMA 6

¹Apo tinalonga tani? Ayi tithimize pyathu kudawa kuti kukoma mtima kwa Mulungu kuinjipe?

²Nkhabe tayu! Kulonga pya utongi wa pyakudawa pana ife, ife takhala ninga anthu akufa, apo pinakwanisika tani kuti tithimize kuchita pyakudawika?

³Kadi imwe mwaduwalira kuti ndzidzi udabatizwa ife mukuphatanizana kwathu na Yesu Khristu tidabatizwa pontho na mukuphatanizana na imfache?

⁴Tenepo na ubatizo wathuwo, tidafa mbatiikhwa naye pabodzi m'masiye, towera ifembo tikhale na moyo wachinchino, sasawambo ninga mudalamusirwa Khristu kuimfa na demelero ya mphamvu za Baba.

⁵Podi chinchino ife taphatanizana naye pakufa kwache, sasawambo tinaphatanizana naye pakulamuka kwache kukhala na moyo.

⁶Tenepo timbapidziwa kuti makhaliro athu akale akhomerwa pabodzi na Khristu pamtanda, kuti makhaliro athu akudawika avungike, towera ife tileke khalave mabitchu a pyakudawa.

⁷Thangwi munthu angafa, ambasudzulwa pa utongi wa kudawa.

⁸Podi ife tafa pabodzi na Khristu, tikukhulupira kuti tinakhala na moyo pabodzi naye.

⁹Thangwi timbapidziwa kuti Khristu alamuswa kuimfa, tenepo hanafave tayu; imfa nkhabe dzakhalave na utongi pana iye tayu.

¹⁰Tenepo, na thangwi yakuti iye adapichita nyamphera-phera kufa kabodzi kene basi thangwi ya pyakudawa, pyakudawa nkhabe utongi pana iye tayu, pontho chinchino moyo una iye ngwakuphatanizana na Mulungu.

¹¹Ntchibodzi-bodzi imwe mwathema kupiyesa mwekha ene anthu akufa, kulonga pya utongi wa pyakudawa pana imwe, mbwenye kukhala amoyo kuna Mulungu pakuphatanizana na Yesu Khristu.

¹²Lekani tawira kuti kudawa kukhale na utongi pana manungo anu, ambafa ale, towera muteweze pikhumbo pyakuipa pya manungo anu.

¹³Lekani pereka phindi na ibodzi ene ya manungo anu kuna pyakudawa, kukhala ninga chinthu chakuchitira pyakudawa. Mbwenye piperekeni kuna Mulungu, ninga anthu akulamuswa kuimfa kukhala amoyo ale, pontho perekani manungo anu kuna Mulungu kukhala ninga chinthu chakuchitira mabasa akulungama.

¹⁴Kudawa kuleke khala na utongi pana imwe, thangwi imwe nee muli pansi pa utongi wa mwambo tayu, mbwenye pansi pa utongi wa kukoma mtima kwa Mulungu.

¹⁵Ninji pontho! Tidawe pyathu, thangwi ife nee tili pansi pa utongi wa mwambo tayu, mbwenye tili pansi pa utongi wa kukoma mtima kwa Mulungu? Nkhabe tayu!

¹⁶Ndimomwene imwe mukupidziwa kuti mungapipereka mwekha ene kuti muvere munthu unango ninga mabitchu, penepo ndimwe mabitchu a mbuyanu anavera imweyo; penu mbuyanu nkhudawa, kule kumbadzesa imfa, penu mbuyanu nkhuvera, kule kumbalungamisa munthu pamaso pa Mulungu.

¹⁷Tipereke takhuta kuna Mulungu! Podi kwene kuti kale mukhali mabitchu a pyakudawa, mwavera na mtimanu onsene pyakuonadi pidagumana imwe m'chifunziso chidatambira imwe chile, pontho

¹⁸mwasudzulwa pa utongi wa pyakudawa mbamukhala mabitchu a pyakulungama.

¹⁹Ndikulonga ninga mumbalongera anthu nsiku zonsene kuthemerana na kuvesa kwanu kwakubalwa nako. Kale mudapipereka mwekha ene ninga mabitchu kuti muphatiswe basa na pinthu pyokhonda chena pontho pyakudawika. Ntchibodzi-bodzi chinchino mwathema kupipereka ninga mabitchu a pyakulungama, towera muphatiswe mabasa akuchena.

²⁰Pikhali imwe mabitchu a pyakudawa, nee mukhalive pansi pa utongi wa pyakulungama tayu.

²¹Pidachita imwe pinthu pyakuchitisa manyadzo ninga penepi, mudaganyalinji? Mamalisiro ache ndi imfa basi!

²²Mbwenye chinchino mwasudzulwa pansi pa utongi wa pyakudawa, tenepo ndimwe mabitchu a Mulungu. Penepa mwaganyali moyo wakupambulika monsene mwene kuna Mulungu, tenepo mamalisiro ache ndi moyo okhonda mala.

²³Thangwi kudawa kumbapagali imfa, mbwenye mtukwa wa Mulungu ndi moyo okhonda mala mukuphatanizana na Yesu Khristu Mbuyathu.