Read cisena AROMA 7 Bible Online

AROMA 7 - cisena bible

AROMA 7

¹Abale anga, penepa munati muvese mwadidi pinthu pinafuna ine kulonga, thangwi monsenene mukudziwa pya mwambo. Mwambo una utongi pana anthu ndzidzi una iwo na moyo.

²Mkazi wakusembwa ngwakumangika na mwambo kuna mamunache ndzidzi una iye na moyo, mbwenye mamunache angafa, mkazi ule asudzuka kuna mwambo wa kukazhali.

³Tenepo iye angasembwa na mamuna unango, mamunache wakutoma ule mbali m'maso, iye anati alongwe puta. Mbwenye mamunache angafa, mkazi ule asudzuka kuna mwambo, tenepo angasembwa pontho na mamuna unango, penepo hadachite uputa tayu.

⁴Abale anga, penepi pili tenepo kuna imwepo. Podi ndimwe mapindi a manungo ache, pidafa Khristu imwe mudafambo naye pabodzi, kusudzuka kuna mwambo, kuti mukhale anthu a iye, ule adalamuswa kuimfa, towera tikhale anthu akuthema kuphatira basa Mulungu.

⁵Ndzidzi ukhali ife na makhaliro athu akudawika akubalwa nawo ule, pikhumbo pyakuipa pyakudzeswa na mwambo pikhaphata basa m'manungo mwathu, tenepo pidachita ife pile pidadzesa imfa.

⁶Chinchino, tasudzulwa kuna mwambo ukhatimanga unyaperezo ule, thangwi tidafa. Ife nkhabe phatirave basa Mulungu ninga mwakale mule, kudzera muna mwambo wakuchita kulembwa tayu, mbwenye mwachinchino kudzera muna Mzimu Wakuchena.

⁷Apo tinalonga tani? Kadi mwambo wa Mose ngwakuipa? Nkhabe tayu! Ndi mwambo udandichitisa kudziwa kuti kudawa ninji. Mwambo mbudakhonda longa kuti, “Leka sirira pinthu pya munthu unango” ine nee mbandidadziwa tayu kuti kusirira nkhudawa.

⁸Mbwenye thangwi ya mwambowu kudawa kudagumana mwayi wakundichitisa kukhala na pikhumbo pya mtundu onsene pyakupifuna ndekha ene, podi pangasowa mwambo kudawaku nkhwakufa.

⁹Ine ene pano ndikhalidi na moyo ndzidzi udakhonda ine dziwa mwambo, mbwenye pidatoma ine kudziwa mwambo, penepo kudawa kudasisimuka,

¹⁰tenepo ine ndidafa. Mwambo onthowo udathema kudzesa moyo kuna anthu ule, kuna ine udadzesa imfa.

¹¹Kudawa kudagumana mwayi, tenepo kudzera muna mwambowo kudawa kudandinyenga mbakundipha.

¹²Natenepo mwambo makawo ngwakuchena, pontho matongero ache ngakuchenambo, akulungama pontho adidi.

¹³Kadi penepi pikulonga kuti pinthu pyadidi pidandidzesera imfa? Nkhabe tayu! Kudawa ndiye kudachita penepi. Kudawa kudandidzesera imfa pakuphatisa basa pinthu pyadidi, towera makhaliro a pyakudawa aoneswe chadi-chadi. Natenepo kudawa kudaoneka kwakuipa pyakwanga pene kudzera muna mwambowo.

¹⁴Timbapidziwa kuti mwambo ngwauzimu, mbwenye ine ndine munthu ene pyanga ambafa, pontho adaguliswa ninga bitchu kuna pyakudawa ule.

¹⁵Tenepo ine nkhabe vesa pinachita ine tayu. Thangwi ine nkhabe chita pinafuna ine kuchita, m'mbuto mwache ndimbachita pinthu pinazonda ine.

¹⁶Ngakhala ine ndimbachita pimbakhonda ine funa, penepa ndiye kuti ine ndikutawira kuti mwambo ngwadidi.

¹⁷Tenepo, ambachita penepi ule si ine chadi-chadi tayu, mbwenye kumbachita penepi nkhudawa kumbakhala muna ine kule.

¹⁸Ndimbapidziwa kuti muna ine nkhabe udidi tayu, muna ine nkhulonga pya makhaliro anga akudawika akubalwa nawo. Ine ndimbafuna kuchita udidi, kwache ine nkhabe kwanisa kupichita tayu.

¹⁹Ine nkhabe kuchita pinthu pyadidi pimbafuna ine tayu, m'mbuto mwache ndimbachita pinthu pyakuipa pimbakhonda ine funa kupichita.

²⁰Ngakhala ndimbachita pinthu pimbakhonda ine funa, penepa ndiye kuti si ineve ambapichita ule tayu, mbwenye kumbapichita nkhudawa kumbakhala muna ine kule.

²¹Natenepo ndimbagumana kuti pimbachita mwambo mphipi: ndzidzi unafuna ine kuchita pyadidiwo, wenewo ndi ndzidzi umbasankhula ine kuchita pyakuipa.

²²Mtimanga umbakomerwa na mwambo wa Mulungu,

²³mbwenye ndimbaona kuti mwambo unango ukuphata basa m'manungo mwanga, mwambo umbamenyana na mwambo umbadziwa mtimanga mwadidi mwene ule. Mwambo wenewu umbandisandusa bitchu wache, mwambo wa kudawa ukuphata basa m'manungo mwanga ule.

²⁴Chinchino ine nkhabe komerwa na pang'ono pene tayu! Mbani anandiombola kuna manungo anafuna kundiendesa kuimfawa?

²⁵Takhuta kuna Mulungu ule ambachita penepi kudzera muna Yesu Khristu Mbuyathu! Apo, chinchino mwenemu ndiye muna ine: pandekha na manyerezero anga okha ndinakwanisa kuphatira basa mwambo wa Mulungu, mwenemo makhaliro anga akudawika akubalwa nawo akuphatira basa mwambo wa pyakudawa.