Read cisena AROMA 9 Bible Online

AROMA 9 - cisena bible

AROMA 9

¹Ndikulonga pyakuonadi: ine ndine wache wa Khristu, pontho nkhabe longa pyakunama tayu. Chikumbu mtima changa chimbatongwa na Mzimu Wakuchena chile, chimbatsikimizira kuti ine nkhabe nama tayu,

²ndingalonga kuti ndina nsisi zikulu, pontho ndikuva kupha kokhonda mala mumtima mwanga

³thangwi ya abale anga, ale mbanthu a dzinzanga. Na thangwi ya kufuna kuaphedza, ine ndikhapifuna kuti ndikhale pyanga nyadzedze pamaso pa Mulungu, pontho wakulekaniswa kuna Khristu.

⁴Iwo mbanthu a Israele, Mulungu adaasankhulambo kukhala anache mbaaonesa demelero yache; iye adachita nawo piverano[11] mbaapasa mwambo; iwo akupembedza mwakuonadi pontho atambira pinthu pidadumbira Mulungu kuna iwo pile.

⁵Iwo mphidzukulu pya makolo athu akuveka a Chiheberi, pontho kulonga pya umunthu wa Khristu, iye ngwadzinzawo. Mulungu ule ana utongi papinthu pyonsene mbalemedzwe kwenda na kwenda![12] Ameni.

⁶Kadi ndikulonga kuti pidadumbira Mulungu pyachimwanika? Nkhabe tayu, thangwi si onsene anthu a ku Israele mbanthu a Mulungu tayu.

⁷Si pidzukulu pyonsene pya Abrahamu mbana a Mulungu tayu. Mulungu adalonga kuna Abrahamu mbati, “Kudzera muna Isake iwe unakhala na pidzukulu ninga mudadumbira ine kuna iwe.”

⁸Penepi pikulonga kuti si ana onsene adabalwa na Abrahamu mbana a Mulungu tayu.[13] Pidzukulu pyache chadi-chadi mphyokha pile pidadumbira Mulungu kuti anampasa.

⁹Thangwi pinthu pidadumbira Mulungu pidalongwa tenepa: “Ndinati ndidze pontho pandzidzi wache wakuthema,[14] tenepo Sara anakhala na mwana wamamuna.”

¹⁰Apo si pyokhapyo tayu, ana awiri amuna a Rebeka akhali na baba mbodzi, ule ndi kholo wathu Isake.

¹¹Kwache anawo mbadzati balwa, pontho mbadzati chita nee chadidi penu chakuipa tayu, Mulungu adalonga kuna Rebeka mbati, “Mkulu anatumikira mwana.” Pidakhala tenepo kuti kusankhulwa kwa mbodzi kule kukhale ninga mudapisasanyira Mulungu. Tenepo kusankhula kwa Mulungu kudagona pa kuchemera kwache, nee pachinthu chonsene chikhadachita iwo tayu.

¹³Ninga munalongera Malemba kuti, “Ndidamfuna Yakobo, mbwenye ndidazonda Esau.”

¹⁴Kadi penepa tilonge kuti Mulungu ngokhonda lungama? Nkhabe na pang'ono pene tayu.

¹⁵Iye adalonga kuna Mose mbati, “Ndinavera nsisi anthu onsene anafuna ine kuvera nsisi, pontho ndinakomera mtima anthu onsene anafuna ine komera mtima.”

¹⁶Tenepo pyonsene pyagona pansisi za Mulungu, nee pana pimbafuna munthu, penu pimbachita iye tayu.

¹⁷Malemba akulonga kuna Mfumu wa ku Iguputo kuti, “Ndakupitisa ufumu towera ndikuphatise basa kuonesa mphamvu zanga, pontho kuti undivekese padziko yonsene yapansi.”

¹⁸Tenepo Mulungu ambavera nsisi munthu onsene ninga mumbapifunira iye, pontho ambaumisa mtima wa munthu onsene ninga mumbapifunira iye.

¹⁹Mbodzi pakati panu anati alonge kuna ine mbati, “Pinakwanisika tani Mulungu kulonga kuti munthu adawa? Mbani angakhonde kufuna kwa Mulungu?”

²⁰Mwanzanga, ndiwe animbo iwe, kuti utawire Mulungu? Chikalango nkhabe vunza adachiumba ule kuti, “Udandiumbiranji ninga tenepa?”

²¹Angamala penepo nyakuumba pikalango ule ana utongi kuphatisa basa dongo ninga munapifunira iye mbaumba pikalango piwiri na dongo ibodzi-bodziyo, chibodzi mbachikhala chakuphatisirwa basa yakufunika pyakwanga, chinangombocho mbachikhala chikalango chene pyacho chakuphatisa basa nsiku na nsiku.

²²Penepi ndi sasawa na pinthu pyachita Mulungu pile. Iye akhafuna kuonesa ukali wache, pontho kudziwisa mphamvu zache. Mbwenye iye adapirira pyakwanga na anthu adazhangalira iye ale, anthu adathemadi kuvungika ale.

²³Iye akhafuna pontho kuonesa demelero yache yakuinjipa, ile idakhuthulwa pana ife, anthu akhadavera iye nsisi ale, pontho asasanya iye kuti titambire demelero yeneyi ale.

²⁴Ife ndife anthu adachemera iye ale, nee pakati pa Ayuda okha tayu, mbwenye pontho pa anthu okhonda khala Ayuda ene.

²⁵Penepi ndiye pinalonga iye m'bukhu ya mprofeti Hosea kuti, “Anthu okhonda khala anga, ndinati ndiachemere kuti, ‘Anthu anga.’ Anthu ale si apamtima panga tayu, ndinati ndiachemera kuti, ‘Anthu a pamtima panga.’

²⁶Pontho pambuto padapanga iwo kuti, ‘Si imwe anthu anga tayu,’ penepo pene iwo anachemerwa ana a Mulungu wamoyo.”

²⁷Tenepo mprofeti Yesaya adalonga mwakugaluza fala pya Israele mbati, “Podi anthu a ku Israele ainjipe pyawo tani ninga tchetcha ya m'nyanza, mbwenye akuchepa okha ndiye anapulumuka,

²⁸thangwi Mbuya anatonga mseru anthu onsene padziko yapansi pano mwakuchimbiza pontho mwakupimalisiratu.”

²⁹Penepi ndiye pikhadalonga mprofeti Yesaya kale ene mbati, “Mbuya wamphamvu zonsene mbadakhonda kutisiyirambo pidzukulu pinango, ife mbatidakhala ninga mizinda ya Sodomu na Gomora.”

³⁰Apo penepa tinalonga tani? Tinalonga kuti anthu okhonda khala Ayuda, ale adakhonda kupilungamisa pamaso pa Mulungu, chinchino alungamiswa na Mulungu kudzera muna chikhulupiro chawo;

³¹mbwenye Aisraele ale akhasaka-saka mwambo udanyerezera iwo kuti unaalungamisa pamaso pa Mulungu ule hadaugumane tayu.

³²Apo thangwi yache ninji? Thangwi yache njakuti iwo hadanyindire pa chikhulupiro tayu, mbwenye adanyindira pinthu pidachita iwo. Natenepo iwo adagwegweduka na mwala wakugwegwedusa anthu

³³ule unalonga Malemba kuti, “Yang'anani, ndaikha m'Zioni mwala, ule unafuna dzagwegwedusa anthu, chimwala chinafuna dzaagwisa chile. Mbwenye munthu onsene anamkhulupirayo hanachita manyadzo tayu.”