Read cisena 1 AKORINTO 1 Bible Online

1 AKORINTO 1 - cisena bible

1 AKORINTO 1

¹Kubulukira kuna ine Paulo, nyakuchemerwa na kufuna kwa Mulungu kukhala nyakutumwa wa Khristu Yesu, pontho kubulukira kuna mbaleathu Sostene.

²Kwenda kuna mpingo wa Mulungu wa mu Korinto, kuna ale achemerwa kukhala anthu akuchena a Mulungu. Ale ngache thangwi ya kuphatanizana na Khristu Yesu, pabodzi pene na onsene konsene kwene, ale ambapembedza Mbuyathu Yesu Khristu, ule ndi Mbuyawo pontho Mbuyathu.

³Kukoma mtima na mtendere pyakubulukira kuna Mulungu Babathu pontho Mbuya Yesu Khristu pikhale namwe.

⁴Na thangwi ya imwe ndzidzi onsene ndimbapereka takhuta kuna Mulungu wanga thangwi ya kukoma mtima kwakuchitirani iye kudzera muna Khristu Yesu.

⁵Thangwi mukuphatanizana na Khristu mwasanduka anthu akufuma mupyonsene, kuthimiza malongero anu onsene na udziwisi wanu onsene.

⁶Mphangwa zakulonga pya Khristu zakhazikika muna imwe

⁷mwakuti imwe nee mwachimwana tayu kutambira mtsanzayiso wa mtundu onsene ndzidzi unadikhira imwe kuti Mbuyathu Yesu Khristu atchululwe.

⁸Iye anakuchitisani kuimira dzololo kufikirana kumamalisiro, towera mukhale akusowa chinthu chakukupokanyisani pa Nsiku ya Mbuyathu Yesu Khristu.

⁹Mulungu nyakukuchemerani kuti mukhale akuphatanizana na mwanache Yesu Khristu Mbuyathu, ngwakunyindirika.

¹⁰Abale anga, ndikukupemphani imwe monsene na utongi wa Mbuyathu Yesu Khristu kuti mutawirizane pa pinalonga imwe, towera paleke khala magawikano pakati panu. Khalani abodzi monsene mwene m'manyerezero anu, pontho na chakufuna chibodzi.

¹¹Abale anga, anango a pabanja ya Koloe andipanga mwakuveka kuti pakati panu pana nthonga.

¹²Chinalonga ine ntchakuti munthu onsene pakati panu akulonga pyakusiyana na mwanzache. Unango akulonga mbati, “Ine ndimbatewera Paulo”; unangombo ati, “Ine ndimbatewera Apolo”; unango ati, “Ine ndimbatewera Kefa”; unangombo ati, “Ine ndimbatewera Khristu.”

¹³Kani Khristuyu agawika?[1] Kani ndi Paulo ule adakuferani pamtanda? Kani mudabatizwa na dzina ya Paulo?

¹⁴Ndimbapereka takhuta kuna Mulungu thangwi pakati panu sidabatizepo munthu na mbodzi ene tayu, kupambula kwene Khrisipo na Gayo basi.

¹⁵Natenepo nkhabe munthu anakwanisa kulonga kuti imwe mudabatizwa kukhala anyakufunzanga tayu.

¹⁶Ande ndakumbuka kuti ndidabatiza pontho Stefanasi pabodzi na banjache. Kwache ine nkhabe kwanisa kumbuka pontho tayu ngakhala pana unango adabatiza ine.

¹⁷Khristu hadanditume dzabatiza tayu, mbwenye kuti ndilalike Mphangwa Zadidi, kuzilalika mwakukhonda phatisa basa mafala anzeru za anthu, gopesera kufa kwa Khristu pamtanda kunamala mphamvu zache.

¹⁸Thangwi mphangwa zakulonga pya imfa ya Khristu pamtanda nsakusowa basa kuna anthu akutayika ale, mbwenye kuna ife anyakupulumuswa ndi mphamvu za Mulungu.

¹⁹Malemba akulonga kuti, “Ndinavunga nzeru za anthu anzeru mbandimalisa kuchenjera kwa anthu akuchenjera.”

²⁰Apo munthu wanzeru ali kupi? Ali kupi munthu wakufunza? Ali kupi nyakupidziwisa wa mfendu uno? Mulungu apionesa pakwecha kuti nzeru za anthu a pansi pano nsakupupwa.

²¹Thangwi Mulungu na nzeru zache adapisasanyiratu kukhala pyakuchimwanika kuti anthu amdziwe na nzeru zawo. M'mbuto mwache Mulungu adanyerezera kupulumusa anthu ambakhulupira ale kudzera muna mphangwa zimbalongwa kuti nsakupupwa zimbalalika ife zile.

²²Ayuda ambafuna kuona pyakudodomesa, Agriki ambafuna nzeru,

²³mbwenye ife timbalalika Khristu adakhomerwa pamtanda ule. Kuna Ayuda, mphangwa zenezi nsakuzhangalisa, pontho kuna anthu okhonda khala Ayuda nsakupupwa.

²⁴Mbwenye kuna onsene ale adachemerwa na Mulungu, Ayuda na anthu okhonda khala Ayuda ene, mphangwazi ndi Khristu, ule ndi mphamvu za Mulungu, pontho nzeru za Mulungu.

²⁵Thangwi pinthu pyakuoneka ninga pyakupupwa pya Mulungu, mphyanzeru kupiringana nzeru za anthu, pontho pinthu pyakuoneka ninga mphyakusowa mphamvu pya Mulungu, mphyamphamvu kupiringana mphamvu za anthu.

²⁶Abale anga, chinchino kumbukani kale mukhali animbo imwe, ndzidzi udakuchemerani Mulungu. Na kupiona kwa anthu, pakati panu nkhabepo azinji ale akhayeswa anzeru penu amphamvu, penu akubalwa m'mabanja akuveka tayu.

²⁷Mbwenye Mulungu adasankhula pile pimbayeswa pyakupupwa na anthu a padziko yapansi, towera achitise manyadzo anthu anzeru. Pontho iye adasankhula pile pimbayeswa pyakusowa mphamvu na anthu a padziko yapansi, towera achitise manyadzo anthu amphamvu.

²⁸Iye adasankhula pinthu pimbayeswa na anthu a padziko yapansi kuti mphyakululupa, pyakukhondwa, pontho pyakusowa basa, towera iye avunge pikhanyerezera iwo kuti mphyakufunika pile.

²⁹Mulungu adachita penepi towera paleke khala munthu na mbodzi ene wakunyada pamaso pache.

³⁰Mbwenye Mulungu ndiye akuphatanizani na Khristu Yesu, pontho iye achitisa Khristu kukhala nzeru yathu. Kudzera muna iye ife tayeswa akulungama pamaso pa Mulungu; ife tasanduka anthu akupambulika a Mulungu, pontho tasudzulwa kubuluka pansi pa utongi wa pyakudawa.

³¹Natenepo ninga munalongera Malemba kuti, “Nyakufuna kunyada, athema nyadira pinthu pyachita Mbuya.”