Read cisena 1 AKORINTO 10 Bible Online

1 AKORINTO 10 - cisena bible

1 AKORINTO 10

¹Abale anga, ndinafuna kuti ndikukumbuseni pidachitikira makolo athu akale ale. Onsene adafamba pansi pa mthunzi wa makole mbawambuka pa Nyanza yakufira.

²Onsene adabatizwa pidapita iwo m'makole na m'nyanza mule na kuphatanizana kwawo na Mose.

³Onsene adadya sasawa mkate wauzimu,

⁴mbamwa sasawa kumwa kwauzimu. Iwo adamwa kubulukira kumwala wauzimu, ukhaenda na iwo pabodzi ule; mwala wenewu akhali Khristu.

⁵Kwache Mulungu hadakomerwe na azinji a iwo tayu, natenepo mitembo yawo idamala mwazikana m'thando yatchetcha.

⁶Chinchino pyonsene pidachitika pile mphyakuticheuza kuti tileke kusirira pinthu pyakuipa ninga pikhachita iwo.

⁷Tileke kupembedza mifanikizo ninga pikhachita anango a iwo. Ninga munalongera Malemba kuti, “Anthu adakhala pansi kuti adye na kumwa, mbipisanduka kuchita pyakuzuda.”

⁸Tileke chita pyakuzuda ninga pidachita anango a iwo, anthu pikwi makumawiri na pitatu mbafa nsiku ibodzi.

⁹Tileke kuyesa Mbuya[13] ninga kumuyesa kudachita anango a iwo, tenepo adaphiwa na nyoka.

¹⁰Tileke dungunya ninga kudungunya kudachita anango a iwo, tenepo iwo adavungwa na Mngelo wakudzesa imfa.

¹¹Pyonsenepyo pidachitika kuna makolo athu, towera pikhale upangizi kuna ife. Pidalembwa, towera pikhale pyakuticheuza. Thangwi tikukhala pandzidzi, ule mamalisiro ali chifupi.

¹²Natenepo munthu ananyerezera kuti aimira dzololoyo, achite mphole-mphole kuti aleke kugwa.

¹³Mayesero agumanikana na imwe ndi sasawa na mayesero ambagumanikana na anthu anango onsene. Mbwenye Mulungu ngwakukhulupirika mwakuti iye nkhabe dzatawira kuti muyeswe kupiringana mphamvu zanu tayu; kwache ndzidzi unayeswa imwe, iye mwenechiroache anakusasanyirani njira yakupulumuka nayo pakukupasani mphamvu zakupirira nazo.

¹⁴Tenepo, abale anga apamtima, lekani pembedza mifanikizo.

¹⁵Ndikulonga kuna imwe ninga anthu anzeru; pitongeni mwekha ene pyalonga inepi.

¹⁶Khomitcho imbaphatisa ife basa pimbamenya ife mkate kukumbuka Mbuya, pontho imbaperekera ife takhuta kuna Mulungu tingaimwera, tonsene tikugawana m'chiropa cha Khristu. Pontho mkate umbamenya ifewu tingaudya, tikugawana m'manungo a Khristu.

¹⁷Na thangwi yakuti pana mkate ubodzi basi, podi kwene kuti ndife azinji, ifembo ndife manungo abodzi, thangwi tonsene timbagawana mkate ubodzi onthowo.

¹⁸Nyerezerani pya Aisraele: Pimbadya iwo nsembe zakuperekwa kuna Mulungu paguwa, ambaphatizana pabodzi na nsembe zimbapereka iwo kuna Mulungu.

¹⁹Kadi penepa ndikulonga kuti mfanikizo, penu nsembe yakuperekwa kuna mfanikizowo ndi pinthu?

²⁰Si tenepo tayu. Mbwenye ndikulonga kuti nsembe zimbapereka anthu okhonda khala akhristu, ambazipereka kuna mizimu yakuipa, nee kuna Mulungu tayu. Tenepo ine nkhabe funa kuti muphatizane na mizimu yakuipa tayu.

²¹Imwe nkhabe kwanisa kumwera khomitcho ya Mbuya, na ndzidzi onthowo khomitcho ya mizimu yakuipa tayu; imwe nkhabe kwanisa kudyera pathebulu ya Mbuya, na ndzidzi onthowo pathebulu ya mizimu yakuipa tayu.

²²Penu tinafuna kuchitisa Mbuya kukhala wantchanje? Ayi tikunyerezera kuti ife ndife amphamvu kupiringana iye?

²³Anango alonga mbati, “Tatawiriswa kuchita pyonsene.” Mwenemo ndimomwene, kwache si pinthu pyonsene mphyakuganyalisa tayu. “Tatawiriswa kuchita pyonsene,” kwache si pinthu pyonsene mphyakuphedza tayu.

²⁴Munthu aleke kupisakira udidi wa yekha ene, mbwenye asakirembo anango udidi.

²⁵Muna utumbe kudya pyonsene pyakuguliswa pamsika wanyama mbamukhonda vunza, gopesera chikumbu mtima chanu.

²⁶Thangwi Malemba akulonga kuti, “Dziko yapansi pano na pyonsene pyakukhala mwenemo mphya Mbuya.”

²⁷Ngakhala munthu okhonda khala mkhristu anakuchemera kuti ukadye kumsuwo kwache mbunyerezera pyakwendako, kadye pinakakupasa iye mbukhonda vunza, gopesera chikumbu mtima chako.

²⁸Mbwenye ngakhala munthu unango anakupanga kuti, “Pyakudya penepi pyaperekwa kuna milungu,” leka kudya, thangwi ya nyakukupangayo, pontho thangwi ya chikumbu mtima,

²⁹chenechi si chikumbu mtima chako tayu, mbwenye chikumbu mtima cha munthu unangoyo. Penepo munthu unango anavunza kuti, “Kadi utumbe wanga wakuchita pinthu utongwe na chikumbu mtima cha munthu unango?”

³⁰Ngakhala ine ndimbapereka takhuta kuna Mulungu thangwi ya pimbadya ine, apo munthu unangombo anandisumululiranji thangwi ya pyakudya pimbaperekera ine nako takhuta kuna Mulungu?

³¹Natenepo pyonsene pinachita imwe, penu kudya na kumwa, pichiteni pyonsene kuti mudzese demelero kuna Mulungu.

³²Khalani na makhaliro okhonda dzesa nyatwa kuna Ayuda, penu kuna anthu okhonda khala Ayuda, penu kuna mpingo wa Mulungu ene.

³³Chitani ninga pimbachita ine; ine ndimbayesa-yesa kuti anthu onsene akomerwe na pyonsene pimbachita ine. Ine nkhabe kupisakira udidi wa ine ndekha tayu, mbwenye udidi wa anthu onsene, towera iwo apulumuswe.