Read cisena 1 AKORINTO 12 Bible Online

1 AKORINTO 12 - cisena bible

1 AKORINTO 12

¹Abale anga, kulonga pya mitukwa yakubulukira kuna Mzimu Wakuchena, ndinafuna kuti mupivese mwadidi.

²Mukupidziwa kuti mbamudzati sanduka akhristu, mukhadawiswa m'njira zizinji kapembedza mifanikizo yakusowa moyo.

³Na thangwi yeneyi ndapifuna kuti mupivese kuti nkhabe munthu wakutsogolerwa na Mzimu wa Mulungu anakwanisa kulonga mbati, “Yesu ngwadzedze,” pontho ngakhala munthu hanatsogolerwa na Mzimu Wakuchena tayu, iye nkhabe kwanisa kutawira na mulomo wache kuti, “Yesu ndi Mbuya!”

⁴Pana mitukwa ya mtundu na mtundu, mbwenye Mzimu Wakuchena mbodzi ene ndiye nyakuipereka.

⁵Pana njira zakusiyana-siyana zakuphatira basa, mbwenye Mbuya mbodzi ene ndiye nyakuphatirwa basayo.

⁶Pana mphamvu zakusiyana-siyana zakukwanisa kuphatisa basa, mbwenye Mulungu mbodzi ene ndiye nyakupereka mphamvu kuna anthu onsene zakuphatira basa inaphata iwoyo.

⁷Mzimu Wakuchena ambaoneka kuphata basa muna munthu onsene m'njira zinango, towera munthuyo aganyalise anango onsene.

⁸Mzimu Wakuchena ambapasa munthu unango mtukwa wakulonga mafala anzeru. Kuna unango Mzimu Wakuchena onthoyo ambapereka mtukwa wakulonga mafala audziwisi.

⁹Mzimu Wakuchena onthoyo ambapasa munthu unango chikhulupiro, unangombo ambampasa mphamvu zakuwangisa nazo utenda.

¹⁰Mzimu Wakuchena ambapasa munthu unango mphamvu zakuchita nazo pyakudodomesa; unango mtukwa wakulonga mphangwa zakubulukira kuna Mulungu; unangombo nzeru zakusiyanisa nazo pakati pa mitukwa yakubulukira kuna Mzimu Wakuchena na yakubulukira kwinango. Unango ambampasa mtukwa wakulonga pilongero pyachilendo, unangombo mtukwa wakuthumbusula pilongeropyo.

¹¹Mbwenye nyakuchitisa pinthu pyonsenepi ndi Mzimu Wakuchena mbodzi onthoyo. Iye ambapereka kuna munthu onsene na kufuna kwache mitukwa ya mtundu na mtundu.

¹²Khristu akhala ninga manungo abodzi akukhala na mapindi mazinji. Manungo ngabodzi ene basi, podi kwene kuti ana mapindi mazinji.

¹³Podi tikhale Ayuda penu anthu okhonda khala Ayuda, mabitchu penu mtumbe, tabatizwa na Mzimu Wakuchena onthoyo kutisandusa kukhala manungo abodzi, pontho tonsene tapaswa Mzimu mbodziyo kuti timwe.

¹⁴Manungo hana phindi ibodzi yokha tayu, mbwenye ana mapindi mazinji.

¹⁵Ngakhala dzinyalo inalonga kuti, “Na thangwi yakuti si ine dzanja, si ineve phindi ya manungo tayu,” yeneyi si thangwi ya kumulekesa kukhala phindi ya manungo tayu.

¹⁶Ngakhala khutu inalonga kuti, “Na thangwi yakuti si ine diso, si ineve phindi ya manungo tayu,” yeneyi si thangwi ya kumulekesa kukhala phindi ya manungo tayu.

¹⁷Ngakhala manungo onsene akhali diso, mbadakwanisa tani kuva? Ngakhala akhali khutu yokha, mbadakwanisa tani kununkhiza?

¹⁸Kwache Mulungu adaikha phindi yonsene yakusiyana-siyana kumanungo ninga mudapifunira iye.

¹⁹Ngakhala mapindi onsene akhali phindi ibodzi ene basi, nee mbapadakhalave manungobi.

²⁰Ninga muna ipyomu, mapindi alipo mazinji, mbwenye manungo ngabodzi ene basi.

²¹Natenepo diso nkhabe kwanisa kulonga kuna dzanja kuti, “Ine nkhabe kukufuna tayu!” penu msolo kukwanisa kulonga kuna dzinyalo kuti, “Ine nkhabe kukufuna tayu!”

²²Kwache ndimomwene kuti nkhabe chinakwanisa ife kuchita pakusowa mapindi anango a manungo, ale ambaoneka ninga ngakusowa mphamvu,

²³pontho mapindi ale ambayesa ife kuti ngakukhonda thema kulemedzwa ndiye ambatsalakana ife pikulu. Mapindi anango a manungo okhonda thema kuoniwa ndiye ambavazikwa mwadidi mwene,

²⁴pinthu pyakuti mapindi a manungo akuthema kuoniwa nkhabe kupifuna tayu. Mulungu mwenechiroache aphatanizana manungo pabodzi tenepa, towera mapindi akusowa chilemedzo ale, alemedzwe pikulu.

²⁵Natenepo m'manungo paleke khala magawikano, mbwenye mapindi ache onsene akusiyana-siyana atsalakane pya unango na mwanzache.

²⁶Ngakhala phindi ibodzi inava kupha m'manungo, mapindi anango onsenewo ambavambo kupha nayo pabodzi. Ngakhala phindi ibodzi inatambira chilemedzo, mapindi anango onsenewo ambakomerwambo nayo pabodzi.

²⁷Monsene ndimwe manungo a Khristu, pontho munthu onsene wa imwe ndi phindi ya manungowo.

²⁸Mulungu aikha pyonsene mumpingo m'mbuto mwache: pambuto yakutoma aikhapo anyakutumwa, pambuto yachiwiri maprofeti, pambuto yachitatu afunzisi, kubuluka penepo anyakuchita pyakudodomesa, kubuluka penepo anyakukhala na mphamvu zakuwangisa nazo utenda, penu anyakuphedza anango, penu anyakutsogolera, penu anyakulonga pilongero pyachilendo.

²⁹Si onsene mbanyakutumwa, penu maprofeti, penu afunzisi tayu. Si onsene ana mphamvu zakuchita nazo pinthu pyakudodomesa,

³⁰penu kuwangisa utenda, penu kulonga pilongero pyachilendo, penu kuthumbusula pilongeropyo tayu.

³¹Apo ikhani mtimanu pana mitukwa yakufunika pikulu. Kwache chadidiletu cha pyonsenepi chili m'tchindemu.