Read cisena 1 AKORINTO 13 Bible Online

1 AKORINTO 13 - cisena bible

1 AKORINTO 13

¹Ndingakwanise kulonga na pilongero pya anthu na pya angelo pene, kwache ndingakhonda kumfuna mwanzanga, kulonga kwanga kunakhala ninga kulira kwa utale, penu kusokosa kwa nkhotcho.

²Ndingakwanise kukhala na mtukwa wakulonga mphangwa zakubulukira kuna Mulungu, mbandidziwa pinthu pyonsene na kuvesa pyakubisika pyonsene; ndingakwanise kukhala na chikhulupiro chonsene chakukwanisa kuthukusa nacho mapiri, kwache ndingakhonda kumfuna mwanzanga, ine nkhabe basa.

³Ndingakwanise kupereka pyonsene pina ine kuna anyakutcherenga, pontho ndingakwanise kupereka manungo anga kuti apiswe[14] kwache ndingakhonda kumfuna mwanzanga, penepi nkhabe kundiganyalisa tayu.

⁴Kufunana nkhwakupirira pontho nkhwakukoma mtima; nkhabe bivu, penu kugaya, penu kutumbama tayu.

⁵Kufunana nkhabe tikana, penu kupifuna kokha kwene, penu kuzhangali tayu; kufunana nkhabe koya mangawa a pyakudawa tayu.

⁶Kufunana nkhabe komerwa na pyakuipa tayu, mbwenye kumbakomerwa na pyakuonadi.

⁷Kufunana nkhabe taya mtima; pontho chikhulupiro chache, chidikhiro chache na kupirira kwache nkhabe chimwana tayu.

⁸Kufunana nkhwakukhala na kukhala. Pana mphangwa zakubulukira kuna Mulungu, kwache zinamala. Pana mitukwa yakulonga na pilongero pyachilendo, kwache zinamala. Pana udziwisi, kwache unamala.

⁹Thangwi mtukwa wathu wa udziwisi na wakulonga mphangwa zakubulukira kuna Mulungu nee ngwamumphu tayu,

¹⁰mbwenye ndzidzi ungafika wakuti Mulungu asasanye pinthu pyonsene kukhala pyakuthema monsene mwene, penepo pinthu pyakukhonda khala pyamumphupyo pinamala.

¹¹Pikhali ine mwana, kulonga kwanga, kupiona kwanga kwa pinthu na kunyerezera kwanga konsene kukhali kwauwana. Chinchino na thangwi yakuti ndine mamunamkulu, pya uwana nkhabeve napyo basa tayu.

¹²Pinaona ife chinchino pyakhala ninga nkhope yokhonda oneka mwadidi pa gilazi yakuonera, tenepo tinaona nkhope na nkhope. Chinadziwa ine chinchino ntchokhonda khala chamumphu, tenepo chenecho chinakhala chamumphu ninga udziwisi wa Mulungu pana ine ngwamumphu.

¹³Pana pinthu pitatu pyakukhala na kukhala. Pinthu penepi mphipi: chikhulupiro, chidikhiro, na kufunana; mbwenye kufunana nkhukulu pyakwanga kupiringana pinangopi.