Read cisena 1 AKORINTO 14 Bible Online

1 AKORINTO 14 - cisena bible

1 AKORINTO 14

¹Imwe mwathema kuchita chipapu kuti mukhale nako kufunana, pontho muikhe mtima pamitukwa imbapasa Mzimu Wakuchena ile, maka-maka mitukwa yakulonga mphangwa zakubulukira kuna Mulungu.

²Munthu wakulonga na pilongero pyachilendo nkhabe longa kuna anthu tayu, mbwenye kuna Mulungu, thangwi nkhabe munthu ambavesa mwadidi pinthu pinalonga iyepyo tayu. Iye ambalonga na mphamvu za Mzimu Wakuchena pinthu pyakuonadi pyakubisika.

³Mbwenye munthu wakulonga mphangwa zakubulukira kuna Mulungu, ambalonga kuna anthu towera aaphedze, kuawangisa mtima, pontho kuathondoza mtima na mphangwazo.

⁴Munthu wakulonga na pilongero pyachilendo ambapiphedza yekha ene, mbwenye nyakulonga mphangwa zakubulukira kuna Mulungu ambaphedza mpingo onsene.

⁵Ndikhafunadi kuti monsenene mulonge na pilongero pyachilendo, kwache ndikhapifuna pyakwanga pene kuti mukhale na mtukwa wakulonga mphangwa zakubulukira kuna Mulungu. Thangwi munthu wakulonga mphangwa zakubulukira kuna Mulungu ngwakufunika pikulu kupiringana nyakulonga na pilongero pyachilendo pangakhonda khala munthu unango wakukwanisa kuthumbusula pinalonga iyepyo, towera mpingo onsene uphedzeke.

⁶Tenepo abale anga, ndingadza kuna imwe mbandilonga na pilongero pyachilendo munaganyalinji? Nkhabe na pang'ono pene tayu, ndingakhonda kudza na chidziwiso chakubulukira kuna Mulungu, penu udziwisi, penu mphangwa zakubulukira kuna Mulungu, penu chifunziso.

⁷Kwatani pinthu pyakuimbira pyakusowa moyo pyakukhala ninga chitoliro penu nyakatangale mbamuimba, apo anthu anadziwa tani kulira kwapyo, ngakhala pyakuimbirapyo pyadyerana?

⁸Ngakhala nyakuimba ngoma hanaiimba mwakuveka pyadidi tayu, anafuna dzasasanyika kuti aende kunkhondo mbani?

⁹Ntchibodzi-bodzi, apo anthu anavesa tani pinalonga imwepyo, ngakhala mphangwa zinalonga imwe na pilongero pyachilendo nkhabe veka mwadidi tayu? Mafalanu anambuluka na mphepo.

¹⁰Pilongero pilipo pizinji padziko yapansi pano, kwache nee chibodzi chimbakhonda longa pyakuveka tayu.

¹¹Mbwenye ine ndingakhonda dziwa chilongero chakulongwa na munthu unango, nyakulongayo anakhala mlendo kuna ine, inembo ndinakhala mlendo kuna iye.

¹²Na thangwi yakuti mumbaikha mtima pakukhala na mitukwa yakubulukira kuna Mzimu Wakuchena, imwe mwathema kukhala na chipapu kuphatisa basa pikulu pene mitukwa imbaphedza kuwangisa mpingo ile.

¹³Munthu wakulonga na pilongero pyachilendo athema kupemphera kuti akhale na mtukwa wakuthumbusula pinalonga iyepyo.

¹⁴Thangwi ngakhala ndinapemphera na pilongero pyachilendo, mzimu wanga ndiye umbapemphera, mbwenye manyerezero anga nkhabe kwatapo khundu tayu.

¹⁵Ndichitenji mphapo? Ndinapemphera na mzimu wanga mbandipemphera na manyerezero anga. Ndinaimba na mzimu wanga mbandiimba na manyerezero anga.

¹⁶Ngakhala unapereka takhuta kuna Mulungu na mzimu wako okha, apo munthumbo wakukhala nawo penepo, okhonda dziwa pya penepi, anakwanisa tani kulonga kuti, “Ameni” kutawira kupemphera kwako kwakupereka nako takhutako?

¹⁷Podi kwene kuti kupereka kwako takhuta kuna Mulungu kukome tani, munthu unangoyo nkhabe phedzeka nako na pang'ono pene tayu.

¹⁸Ndinapereka takhuta kuna Mulungu thangwi ndimbalonga na pilongero pyachilendo kupiringana monsene.

¹⁹Mbwenye ndikhapifuna pyakwanga pene kulonga mafala mashanu basi mumpingo, ale anakwanisa kuviwa, towera ndifunzise nawo anthu anango, kusiyana nakuti ndilonge mafala pikwi-pikwi na pilongero pyachilendo.

²⁰Abale anga, lekani nyerezera ninga ana ang'ono; papinthu pyakuipa khalani ninga ana, mbwenye akulu m'manyerezero.

²¹M'Malemba pyalembwa kuti, “Mbuya alonga mbati, ‘ndinalonga kuna anthu anga pakuphatisa basa amuna akulonga na pilongero pyachilendo. Ndinalonga kudzera muna milomo ya anthu achilendo, kwache anthu anga nkhabe dzandivera tayu basi.’ ”

²²Natenepo mkhristu angalonga na pilongero pyachilendo, ntchidzindikiro kuna anthu okhonda khala akhristu, nee kuna akhristu tayu, mbwenye mtukwa wakulonga mphangwa zakubulukira kuna Mulungu ntchidzindikiro kuna akhristu, nee kuna anthu okhonda khala akhristu tayu.

²³Ngakhala mpingo onsene wagumanyikana, onsene mbatoma kulonga na pilongero pyachilendo, ayi anthu okhonda dziwa pya penepi, penu anthu okhonda khala akhristu angapita muna iwomo, nkhabe dzalonga tayu kuti monsene mwayaluka?

²⁴Mbwenye ngakhala onsene analonga mphangwa zakubulukira kuna Mulungu, munthu okhonda dziwa pya penepi, penu okhonda khala mkhristu angapita muna iwomo, anadzindikira kudawa kwache kubulukira pa pinava iyepyo. Analaswa mtima na pyonsene pyava iye.

²⁵Manyerezero ache akubisika anabuluswa pakwecha, natenepo analamba mbapembedza Mulungu, mbatawira mbati, “Andedi, Mulungu ali pakati panu!”

²⁶Abale anga, penepa ndikufuna kulonga kuti, ndzidzi unagumanyikana imwe kupembedza Mulungu, munthu mbodzi ana nyimbo, unango ana chifunziso, unango ana chidziwiso chakubulukira kuna Mulungu, unango ana mphangwa zakuti alonge na pilongero pyachilendo, pontho unango wakukwanisa kuthumbusula pilongero pyachilendopyo. Pyonsenepi pyathema kuchitwa kuphedza napyo mpingo.

²⁷Ngakhala anango anafuna kulonga na pilongero pyachilendo, athema kulonga mbawiri penu atatu basi, kwache achite kupitisirana, pontho pakhale munthu unango wakukwanisa kuthumbusula pinalongwapyo.

²⁸Mbwenye ngakhala nkhabepo munthu wakukwanisa kupithumbusula, penepo nyakupilongayo athema kumatama mbalonge kuna yekha ene, pontho kuna Mulungu.

²⁹Anthu awiri penu atatu athema kulonga mphangwa zakubulukira kuna Mulungu, anango onsene apione mwadidi pinalongwapyo.

³⁰Mbwenye ngakhala munthu unango wakukhala pansi penepo atambira mphangwa zakubulukira kuna Mulungu, adatoma kulongayo athema kumatama.

³¹Monsene munakwanisa kulonga mphangwa zakubulukira kuna Mulungu mwakupitisirana, towera munthu onsene afunze pontho awangiswe mtima.

³²Mtukwa wakulonga mphangwa zakubulukira kuna Mulungu uli pansi pa utongi wa nyakulongayo,

³³thangwi Mulungu nkhabe funa kuti tikhale mwakuvunganyikana tayu, mbwenye mwamtendere. Ninga muna ipyo kuna anthu m'mipingo yonsene ya Mulungu,

³⁴akazi athema kumatama pamigumano; iwo nkhabe tawiriswa kulonga tayu. Iwo athema kukhala akuvera ninga mumbapilongera mwambo wa Chiyuda.

³⁵Ngakhala iwo anafuna kudziwa pinthu pinango, akavunze amunawo kumusa kwawo. Ntchinthu chakuchitisa manyadzo kuti mkazi alonge mumpingo.

³⁶Kani mafala a Mulungu adabulukira kuna imwe? Penu adadza kuna imwe mwekha?

³⁷Ngakhala unango anapinyerezera kuti ndi nyakulonga mphangwa zakubulukira kuna Mulungu, penu ana mtukwa wauzimu, athema kudzindikira kuti pinakulemberani inepi ndi matongero a Mbuya.

³⁸Mbwenye ngakhala iye anakhonda kuvesera penepi, imwembo lekani kumvesera.

³⁹Tenepo, abale anga, ikhani mtimanu pakulonga mphangwa zakubulukira kuna Mulungu, pontho lekani khondesa anthu kulonga na pilongero pyachilendo.

⁴⁰Pinthu pyonsene pichitwe mwakuthema pontho mwakundendemera.