Read cisena 1 AKORINTO 15 Bible Online

1 AKORINTO 15 - cisena bible

1 AKORINTO 15

¹Abale anga, ndinafuna ndikukumbuseni chinchino pya Mphangwa Zadidi zidalalika ine kuna imwe, pontho zidatambira imwe zile, zile ndi maziko padakhazikika chikhulupiro chanu pale.

²Mphangwa zidalalika ine kuna imwe ndi Mphangwa Zadidi. Imwe mwapulumuka ngakhala munaphatisa nganganga mphangwazo, gopesera kukhulupira kwanu kunakhala kwapezi.

³Ndidakupasani pidatambira ine, pile mphyakufunika kupiringana pyonsene: penepi mphyakuti Khristu adafera pyakudawa pyathu ninga munalongera Malemba;

⁴kuti iye adaikhwa m'masiye, pontho kuti adalamuswa kuimfa pidagwanda nsiku zitatu, ninga munalongera Malemba;

⁵kuti iye adaonekera kuna Peturo, pontho kubuluka penepo kuna anyakutumwa khumi na awiri ale.

⁶Kubuluka penepo iye adaonekera kuna anthu azinji ene kupiringana madzana mashanu a anyakumtewerache kabodzi kene, azinji ngale ana moyo na lero, podi kwene kuti anango adagonera mkono.

⁷Tenepo iye adaonekera kuna Yakobo, kubuluka penepo kuna anyakutumwa anango onsene.

⁸Pakumalisira pache iye adaonekerambo kuna ine. Penepi kuna ine pikhali ninga munthu kubalwa nsiku zache zidzati kwana.

⁹Thangwi ndine wakumalisiraletu pakati pa anyakutumwa onsene. Ine nkhabe thema kuchemerwa nyakutumwa tayu, thangwi ndidasanyisa mpingo wa Mulungu.

¹⁰Mbwenye na kukoma mtima kwa Mulungu, chinchino ndili ninga munandionera imwe muno, kukoma kwache mtima nee kukhali kokhonda ganyalisa tayu. Ndidaphatadi basa mwakuwangisa kupiringana anyakutumwa anango onsene, podi kwene kuti si ine ndidaphata tayu, mbwenye kukoma mtima kwa Mulungu ndiye kudaphata basa pabodzi na ine.

¹¹Tenepo zenezi ndi mphangwa zimbalalika ife tonsene, penu ndine ndizilalike, penu ndiwo, pontho zenezi ndi mphangwa zakhulupira imwe zile.

¹²Podi mphangwa zinalalika ifezi nsakuti Khristu alamuswa kuimfa, apo pikukwanisika tani kuti anthu anango alonge kuti anthu akufa hanalamuswa mbakhala na moyo tayu?

¹³Ngakhala mphyakuonadi, nkhulonga kuti Khristu hadalamuswe kuimfa tayu,

¹⁴pontho ngakhala Khristu hadalamuswe kuimfa tayu, pinalalika ifepi mphyapezi, pontho chikhulupiro chanu ntchapezi.

¹⁵Kuthimiza penepa ife taoneka akunama pya Mulungu, thangwi tachitira umboni kuti Mulunguyo adalamusa Khristu kuimfa. Mbwenye ngakhala mphyakuonadi kuti anthu akufa hanalamuswa mbakhala pontho na moyo tayu, ndiye kuti iye hadalamuse Khristu kuimfa tayu.

¹⁶Thangwi ngakhala anthu akufa hanalamuswa kuimfa tayu, ndiye kuti Khristu hadalamuswembo tayu.

¹⁷Ngakhala Khristu hadalamuswe kuimfa tayu, ndiye kuti kukhulupira kwanu nkhwapezi, pontho kudawa kwanu mukuthimiza kukhala nako basi.

¹⁸Penepa mbapidalonga pontho kuti anyakukhulupira Khristu adagonera mkono ale, ngakutayikambo.

¹⁹Ngakhala chidikhiro chathu pana Khristu ntchadidi pamoyo uno ene basi,[15] penepo tathema kuverwa nsisi pyakwanga kupiringana munthu unango onsene padziko yapansi.

²⁰Mbwenye pyakuonadi mphyakuti Khristu alamuswa kuimfa kutsikimiza kuti anango adagonera mkono ale, analamuswambo.

²¹Na thangwi yakuti imfa idadza kudzera muna munthu mbodzi, sasawambo kulamuswa kuimfa kumbadza kudzera muna munthu mbodzi.

²²Na thangwi yakuti anthu onsene ambafa thangwi yakuphatanizana kwawo na Adamu, sasawambo anthu onsene analamuswa kuimfa, thangwi ya kuphatanizana kwawo na Khristu.

²³Mbwenye munthu onsene anati alamuswe pandzidzi wache wakuthema: adatoma pa onsene ndi, Khristu; kubuluka penepo pandzidzi unafuna dzabwera pontho Khristu, anthu ale ngache analamuswambo.

²⁴Tenepo kumala kwa pinthu pyonsene kunafika. Khristu anakunda mizimu yonsene yakukhala na utongi, ufumu na mphamvu, pontho anapereka ufumu kuna Mulungu, ule ndi Baba.

²⁵Thangwi Khristu athema kutonga ninga mfumu kufikirana Mulungu akunde anyamalwa onsene mbaaikha pansi pa manyalo ache.

²⁶Nyamalwa wakumalisiraletu dzakundwa anakhala imfa.

²⁷Thangwi Malemba akulonga kuti, “Mulungu adaikha pinthu pyonsene pansi pa manyalo ache.” Mphyakuveka kuti mafala akuti, “pinthu pyonsene” nkhabe thimizapo tayu Mulungu mwenechiro, nyakuikha pinthu pyonsene pansi pa utongi wa Khristu ule.

²⁸Mbwenye pinthu pyonsene pingamala ikhwa pansi pa utongi wa Khristu, penepo iye, Mwanayo, anapiikha yekha ene pansi pa utongi wa Mulungu, adaikha pinthu pyonsene pansi pa utongi wa Khristu ule, tenepo Mulungu anakhala na utongi monsene mwene pa pyonsene.

²⁹Ngakhala nkhabe kulamuka kuimfa, apo anthu ale ambabatizwa m'mbuto mwa anthu akufa akuchitanji? Ngakhala anyakufa hanalamuswave kuimfa tayu, apo ninji anthu ambabatizwa m'mbuto mwa anyakufa?

³⁰Apo ifembo, ninji tikupipereka kuna pyakugoswa ndzidzi onsene?

³¹Abale anga, nsiku na nsiku imfa ndimbaiona! Ndikulonga penepi thangwi ya kukunyadirani kwanga m'moyo wathu wakuphatanizana na Khristu Yesu.

³²Ngakhala ndidamenyana na anthu a ku Efeso akhakhala ninga pirombo pyam'tsanga ale, pakuteweza kwene manyerezero aumunthu, penepo ndaganyalinji? Ngakhala anyakufa hanalamuswa tayu, tenepo tichite ninga munalongerwa ipyo kuti, “Tendeni tidye na kumwa pyathu, podi mangwana tinafa.”

³³Lekani kupinyengeza. “Kuphatizana na anthu akuipa kumbaipisa makhaliro adidi.”

³⁴Kungunukani, pontho lekani makhaliro anu akudawa. Mwathema kuchita manyadzo na pinakupangani inepi kuti anango pakati panupa ngokhonda dziwa Mulungu.

³⁵Unango anati avunze mbati, “Pingakwanisike tani kuti anthu akufa alamuswe kuimfa? Iwo angalamuswa anakhala na manungo amtundu wanji?”

³⁶Pupwewe! Ungabzala mbewu m'mataka, iyo nkhabe mera tayu ingakhonda kufa.

³⁷Tenepo chinabzala iwecho ndi mbewu ene pyayo, penu ya tirigu, penu inango ene, nee si mmera unafuna dzamera ule tayu.

³⁸Mbwenye Mulungu ambaisandusa mbewuyi kukhala na manungo anango ninga montho munapifunira iye; iye ambapasa mbewu yonsene manungo ache ene akuthemerana na iyo.

³⁹Mnofu wa pinthu pyamoyo nkhabe khala sasawa tayu; mnofu wa munthu ngwamtundu unango, wa nyama ngwamtundu unango, wa mbalame ngwamtundu unango, pontho wa nsomba ngwamtundu unangombo.

⁴⁰Pana pinthu pya kudzulu na pya pansi pano; kubalika kwa pinthu pya kudzulu nkhwakusiyana na kubalika kwa pinthu pya pansi pano.

⁴¹Dzuwa ina kubalika kwache, mwezi una kubalika kwawo, nyenyezimbo zina kubalika kwazo, pontho na pakati pa nyenyezi pene pana kubalika kwakusiyana-siyana.

⁴²Pinakhalambo sasawa anthu akufa angalamuswa. Tingaikha manungo m'masiye, ambakhala akuvunda; mbwenye angalamuswa, anakhala okhonda vunda.

⁴³Manungo angaikhwa m'masiye ambakhala okhonda balika pontho akusowa mphamvu, mbwenye angalamuswa, anakhala akubalika pontho amphamvu.

⁴⁴Manungo ambaikhwa m'masiye ngakubalwa nawo, mbwenye anafuna dzalamuswa, anakhala manungo auzimu. Tenepo ngakhala pana manungo akubalwa nawo, pathema pontho kukhala manungo auzimu.

⁴⁵Thangwi Malemba akulonga kuti, “Adamu, munthu wakutoma ule, adalengwa wamoyo.” Mbwenye Adamu, wakumalisa ule, ndi Mzimu wakupasa moyo.

⁴⁶Chimbatoma kudza si manungo auzimu tayu, mbwenye manungo akubalwa nawo, kubuluka penepo manungo auzimu.

⁴⁷Adamu, munthu wakutoma ule, adabulukira pansi pano, pontho adasasanywa na mataka. Mbwenye Adamu wachiwiri ule, adabulukira kudzulu.

⁴⁸Ale ngapansi pano akhala ninga munthu adasasanywa na mataka ule, mbwenye ale ngakudzulu akhala ninga munthu adabulukira kudzulu ule.

⁴⁹Chinchino ninga montho mwalandana ife na munthu wakusasanywa na mataka, sasawambo tinalandana na munthu wakubulukira kudzulu ule.

⁵⁰Abale anga, chinalonga ine ntchakuti manungo na chiropa nkhabe kwanisa kukwata khundu mu Ufumu wa Mulungu tayu, pontho pinthu pimbavunda pile nkhabe kwanisa kukwata khundu pa pyokhonda vunda pile tayu.

⁵¹Ngavani, ndikupangeni pinthu pyakubisika pyakuonadipi. Si tonsene tinagonera mkono tayu, mbwenye tonsene tinasanduswa kukhala na manungo anango kabodzi na kabodzi ninga kuphoyira kwa diso, ndzidzi unafuna dzalira ngoma yakumalisa. Thangwi ngomayo ingalira, anthu akufa analamuswa na manungo okhonda vunda, pontho ife tinati tisanduswe.

⁵²

⁵³Thangwi pinthu pyakuvunda pyathema kusanduswa pyokhonda vunda, pinthu pyakufa pyathema sanduswa pyokhonda kufa.

⁵⁴Tenepo manungo ambavundawa angasanduswa okhonda vunda, pontho manungo ambafa ale, angasanduswa okhonda kufa, penepo pinakwana-kwanadi pinalonga Malemba pile kuti, “Imfa yafudzwa pontho yakundwa monsene mwene!”

⁵⁵“Iwe, Imfa, kukunda kwako kuli kupi? Iwe, Imfa, mphamvu zako zakukuwaza nazo zili kupi?”

⁵⁶Mphamvu za imfa zakukuwaza nazo anthu zimbabulukira kuna pyakudawa, pyakudawambo pimbakhala na mphamvu thangwi ya mwambo.

⁵⁷Mbwenye tipereke takhuta kuna Mulungu, ule ambatichitisa kukunda kudzera muna Mbuyathu Yesu Khristu!

⁵⁸Natenepo, abale anga apamtima, imirani dzololo, pontho lekani tekenyeka. Ndzidzi onsene phatani basa ya Mbuya na chipapu, thangwi imwe mukupidziwa kuti basa imbaphatira imwe Mbuyayi, si yakusowa basa tayu.