Read cisena 1 AKORINTO 16 Bible Online

1 AKORINTO 16 - cisena bible

1 AKORINTO 16

¹Kulonga pya chakupereka chidalemba imwe kuti chiperekwe kuphedza nacho anthu a Mulungu mu Yudea, imwe mwathema kuchita pinthu pidalonga ine kuna mipingo ya m'nthemba ya Galatia.

²Pansiku ya Dimingu yonsene munthu onsene wa imwe athema kupambula kobiri zidaganyali iye, mbizikoyiwe, towera ine ndingabwera palekeve khala kusonkhesa tayu.

³Tenepo ndingafika ndinapereka makalata a umboni kuna anthu asankhula imwe ale, inembo ndinaatuma kuti akapereke mitukwanuyo ku Yerusalemu.

⁴Mbwenye ngakhala mphyakufunika kuti ine ndiendembo, penepo iwo anakwanisa kwenda nane pabodzi pene.

⁵Ndinafika kwanuko, ndingamala fambira m'nthemba ya Makedonia, thangwi ndathema kugwanda na m'nthemba ya Makedonia.

⁶Mwinango ndinakhala namwe kwanuko ndzidzi ene, penu mainja onsene, towera imwe mukwanise kundiphedza kuthimiza ulendo wanga konsene kunafuna ine dzaenda.

⁷Thangwi ine nkhabe funa kukuonani mwachigwandira kwene tayu paulendo wanga unaenda inewu, mbwenye Mbuya angapifuna, ndikudikhira kukhala namwe ndzidzi ene.

⁸Ndinati ndikhale mumzinda wa Efeso muno kufikirana nsiku ya Pentekosti ikwane,

⁹thangwi njira zafungulwa zakuti ndinakwanisa kuphata basa mwadidi, podi kwene kuti anyakundipokanya ainjipa.

¹⁰Ngakhala Timoti anadza kwanuko muonesese kuti mwamtambira mwadidi pakati panu, thangwi iye akuphatira basa Mbuya ninga munachitira inembo.

¹¹Paleke khala munthu na mbodzi ene wakumuyang'ana na diso ibodzi, mbwenye mumphedze kuthimiza ulendo wache mwamtendere, towera abwerere kuna ine kuno; thangwi ndikumdikhira kudza kuno pabodzi na abale anango.

¹²Kulonga pya mbale Apolo. Ndidamdembetera kazinji kene kuti akufambireni pabodzi pene na abale anango, kwache iye hakhafuna tayu kuti aende ndzidzi wenewu. Mbwenye angagumana ndzidzi wadidi, anati adze.

¹³Khalani m'maso, khalani dzololo m'chikhulupiro chanu, pontho khalani anthu akuwanga mtima na amphamvu.

¹⁴Pyonsene pinachita imwe mupichite mwakufunana.

¹⁵Imwe mukupidziwa kuti Stefanasi na banjache mbanthu akutoma kusanduka akhristu m'nthemba ya Akaya, pontho kuti apipereka okha ene kutumikira anthu a Mulungu. Ndikukupemphani imwe abale anga kuti

¹⁶imwe muvere anthu ninga enewa, pontho na ale onsene ambaphata basa na kutumikira nawo pabodzi.

¹⁷Ndakomerwa pyakwanga na kudza kwachita Stefanasi, Fotunato na Akaiko, thangwi iwo achita pinthu kuna ine ninga ndimwe mukupichita, podi kwene kuti imwe pakhali nkhabepo.

¹⁸Iwo adandisisimusa pyakwanga, ninga pidachita iwo kuna imwe. Anthu ninga enewa athema kulemedzwa.

¹⁹Mipingo ya m'nthemba ya Asia ikupereka mwenyikiro kuna imwe; Akila na Prisila, pontho mpingo onsene umbagumanyikana m'nyumba mwawo kupemphera ule ukupereka kuna imwe mwenyikiro wachikhristu mwakukomerwa.

²⁰Abale onsene kuno akupereka mwenyikiro. Pasanani mwenyikiro wachikhristu kuonesa kufunana kwanu unango na mwanzache.

²¹Na dzanja yanga ene ndikulemba mafalawa awa: Mwenyikiro wakubulukira kuna ine, Paulo.

²²Munthu anakhonda funa Mbuyayo, dzedze kuna iye. Mbuyathu, bwerani![16]

²³Kukoma mtima kwa Mbuya Yesu kukhale namwe.

²⁴Kukufunani kwanga kukhale namwe monsenene kudzera muna Khristu Yesu.