Read cisena 1 AKORINTO 2 Bible Online

1 AKORINTO 2 - cisena bible

1 AKORINTO 2

¹Abale anga, pidadza ine kwanu dzalalika pyakuonadi pyakubisika pya Mulungu,[2] nee sidaphatise basa mafala akunensa kuavesa, pontho na kufunza kukulu tayu.

²Thangwi ndzidzi ukhali ine namwe ndidanyerezera kuduwalira pinthu pyonsene kupambula Yesu Khristu ene basi, maka-maka imfache ya pamtanda.

³Tenepo pidafika ine kwanu ndikhali wakusowa mphamvu, pontho wakutetemera pyakwanga na mantha.

⁴Mphangwa na chifunziso changa nee ndikhapilonga na mafala aluso a nzeru za anthu tayu, mbwenye na chitsikimizo cha mphamvu za Mzimu wa Mulungu,

⁵towera chikhulupiro chanu chileke gona panzeru za anthu, mbwenye pamphamvu za Mulungu.

⁶Kwache ine ndimbalonga mafala anzeru kuna akukola muuzimu. Mbwenye nzeruzo si zapansi pano, penu za atongi a dziko yapansi pano tayu, ale mphamvu zawo zikumala.

⁷Nzeru zimbalonga ine ndi nzeru zakubisika za Mulungu, zabisika kuna anthu zile. Mulungu akhadasankhuliratu nzeru yeneyi dziko yapansi mbidzati lengwa, towera atipase demelero.

⁸Nkhabe mtongi na mbodzi ene wa dziko yapansi pano adadziwa nzeru yeneyi tayu. Thangwi iwo mbadapidziwa, nee mbadakhomera pamtanda Mbuya wa demelero tayu.

⁹Kwache ninga munalongera Malemba kuti, “Chinthu chidakhonda ona penu kuva munthu, chinthu chidakhonda nyerezera munthu kuti chinachitika, ntchonthocho chidasasanyira Mulungu anthu ambamfuna ale.”

¹⁰Mbwenye[3] Mulungu atchulula penepi kuna ife kudzera muna Mzimu wache. Mzimu Wakuchena ambasaka-saka chinthu chonsene podi na pinthu pene pyakubisika pyakuzwika pya Mulungu.

¹¹Ndi mzimu wa munthu okha umbadziwa pyonsene pya munthuyo. Ntchibodzi-bodzi Mzimu wa Mulungu okha umbadziwa pyonsene pya Mulunguyo.

¹²Ife hatidatambire mzimu wa dziko yapansi pano tayu, m'mbuto mwache tidatambira Mzimu Wakuchena wakubulukira kuna Mulungu, towera tidziwe pyonsene pyatipasa Mulungu.

¹³Timbalonga penepi na mafala ambatifunzisa Mzimu Wakuchena, nee na mafala akufunziswa na nzeru za anthu tayu, ndzidzi unafunzisa ife pyakuonadi pyauzimu kuna anthu akukhala na Mzimu Wakuchenayo.[4]

¹⁴Munthu wakusowa Mzimu Wakuchena nkhabe kwanisa kutambira pinthu pyakubulukira kuna Mzimu wa Mulungu tayu. Munthu ninga weneyu nkhabe kupivesa tayu; ipyo mphyakupupwa kuna iye, thangwi munthu anakwanisa kutonga makhaliro a pinthu ninga penepi na chiphedzo cha Mzimu Wakuchena basi.

¹⁵Munthu onsene wakukhala na Mzimuyo anakwanisa kutonga makhaliro a pinthu pyonsene, kwache nkhabe munthu anakwanisa kumtonga tayu.

¹⁶Ninga munalongera Malemba kuti, “Mbani anadziwa manyerezero a Mbuya kuti ampangize?” Mbwenye ife tina manyerezero a Khristu.