Read cisena 1 AKORINTO 3 Bible Online

1 AKORINTO 3 - cisena bible

1 AKORINTO 3

¹Abale anga, ine sidakwanise kulonga namwe ninga ndikulonga na anthu akukhala na Mzimu Wakuchena tayu, mbwenye ninga anthu a padziko yapansi pano, pontho ninga akachiya pa chikhulupiro chachikhristu.

²Ndidakupasani mkaka, nee pyakudya pyakugwima tayu, thangwi nee mbamudakwanisa kupitafuna tayu. Podi na chinchino ene nee munakwanisa kupitafuna tayu basi,

³thangwi mukuthimiza kukhala na makhaliro ninga anthu a padziko yapansi pano basi. Pakati panu pangakhala bivu na nthonga. Ayi penepi nkhabe tsikimizira tayu kuti imwe ndimwe anthu a padziko yapansi pano, anthu akuteweza makhaliro a anthu a padziko yapansi pano?

⁴Unango pakati panu angalonga mbati, “Ine ndimbatewera Paulo,” unangombo ati, “Ine ndimbatewera Apolo.” Ayi penepa hamukuchita ninga anthu a padziko yapansi pano tayu?

⁵Apo Apolo mbanimbo? Pontho Paulo mbani? Ife ndife anyabasa ene pyathu a Mulungu, ale adakuonesani njira kuti mukhulupire. Munthu onsene wa ife ambaphata kwene basa idampasa Mbuya ile.

⁶Ine ndidabzala mbewu, Apolo adazithilira madzi, mbwenye adazimeresa ndi Mulungu.

⁷Natenepo nyakubzala na nyakuthirira si anyakufunika tayu, mbwenye Mulungu, nyakuzimeresa, ndiye nyakufunika.

⁸Tenepo nkhabe kusiyana pakati pa nyakubzala na nyakuthirira tayu, thangwi Mulungu anaapasa mfupo malingana na basa idaphata iwo.

⁹Thangwi ife ndife anyakuphata basa pabodzi na Mulungu, imwe mwakhala ninga munda wa Mulungu. Pontho imwe mwakhala ninga nyumba ya Mulungu.

¹⁰Ine ndidaphata basa ninga misiri waluso mbandiikha maziko pakuphatisa basa mtukwa udandipasa Mulungu, tenepo munthu unango akumangapo. Mbwenye munthu onsene athema kuchita mphole-mphole na mamangiro ache.

¹¹Thangwi Mulungu adaikha kale Yesu Khristu ninga maziko abodzi ene basi. Tenepo nkhabe munthu anakwanisa kuikha maziko anango tayu.

¹²Ngakhala munthu anamanga na golidi, siliva na miyala yakudula; penu na miti, maudzu na mitete pamaziko enewa,

¹³makhaliro a basache anaoneka pakwecha, thangwi Nsiku ya Khristu inabulusa basayo pakwecha. Pansiku yeneyo pinabuluswa pakwecha na moto, pontho moto unayesa makhaliro a mabasa a munthu onsene.

¹⁴Ngakhala chinamanga munthu chinakhonda kupya na moto, munthuyo anatambira mfupo.

¹⁵Mbwenye chingapya, munthuyo nkhabe dzatambira mfupo tayu; munthuyo anapulumuka, kwache kunakhala ninga munthu wakupulumuka pamoto.

¹⁶Ndimomwene imwe mukupidziwa kuti ndimwe nyumba ya Mulungu, pontho kuti Mzimu wa Mulungu ambakhala muna imwe.

¹⁷Tenepo ngakhala munthu anavunga nyumba ya Mulungu, Mulungu anamvungambo, thangwi nyumba ya Mulungu njakupambulika; nyumba yeneyi ndimwe.

¹⁸Lekani kupinyengeza mwekha ene. Ngakhala unango apiyesa ana nzeru malingana na mumbapionera anthu a padziko yapansi pano, iye athema kusanduka pupwe, towera akhale wanzeru chadi-chadi.

¹⁹Thangwi pinthu pimbayeswa pya nzeru na anthu a padziko yapansi pano mphyakupupwa pamaso pa Mulungu. Ninga munalongera Malemba kuti, “Mulungu ambakwesha anthu anzeru na kuchenjera kwawoko”;

²⁰akulonga pontho kuti, “Mbuya ambadziwa kuti manyerezero a anthu anzeru ngakusowa basa.”

²¹Tenepo paleke khala munthu na mbodzi ene wakunyadira pinthu pinakwanisa anthu kuchita pile. Pyonsene mphyanu:

²²Paulo, Apolo na Kefa; dziko yapansi ino, moyo na imfa, pya ndzidzi uno na pya m'tsogolo, thangwi pyonsenepi mphyanu.

²³Imwembo ndimwe ache a Khristu, pontho Khristu ngwa Mulungu.