Read cisena 1 AKORINTO 4 Bible Online

1 AKORINTO 4 - cisena bible

1 AKORINTO 4

¹Imwe mwathema kutiyesa ninga anyabasa a Khristu, ale apaswa utongi kulonga pyakuonadi pyakubisika pya Mulungu.

²Tenepo chinthu chinafunika anthu akupaswa basa yeneyi ntchakuti akhale akukhulupirika kuna Mbuyawo.

³Chinchino ine nkhabe ikha konta tayu ngakhala ndinatongwa mseru na imwe penu na thando inango ya miseru ya anthu; ndimomwene kuti ine nkhabe kupitonga ndekha ene tayu.

⁴Chikumbu mtima changa ntchakusowa chinthu chakupokanyisa, kwache penepi nkhabe tsikimizira tayu kuti ndine okhonda dawa. Mbuya yekha ndiye nyakunditonga mseru.

⁵Natenepo lekani tonga mseru munthu na mbodzi ene ndzidzi wakuthema mbudzati kwana. Dikhirani kufikirana Mbuya adze; iye anabulusa pakwecha pinthu pyakubisika pya mumdima, pontho na pyakufuna pya mtima wa anthu. Tenepo munthu onsene anatambira chilemedzo chathema iye kutambira kubulukira kuna Mulungu.

⁶Thangwi ya imwe, abale anga, ine ndalonga pyonsenepi khala ninga pikulonga Apolo na ine pakuphatisa basa uwiriathu kukuonesani upangizi, towera pikufunziseni kuti mafala ale akuti, “Tewezani mwadidi pinalonga Malembapi” akulonga kuti tani? Tenepo paleke khala munthu na mbodzi ene wakunyadira munthu unango mbaselusa munthu unango.

⁷Mbani adakuchitisani kukhala akufunika kupiringana anthu anango onsene? Kadi Mulungu hadakupaseni pinthu pyonsene pina imwepyo tayu? Apo ngakhala mudapitambira ninga mtukwa munanyadiranji?

⁸Pinthu pimbakhumba imwe muli napyo kale! Kani mwafuma kale, pontho mwasanduka kale mafumu, podi kwene kuti ife si ife mafumu tayu? Imwe mbamudakhala mafumu, mbandidakomerwa pyakwanga, towera na ife enembo tikhale mafumu pabodzi na imwe.

⁹Thangwi ndikupiona kuti ife anyakutumwa, Mulungu adatipasa mbuto zakumalisiraletu ninga anthu akutongwa kuphiwa pakwecha ale, khala ninga ndife chinthu chakuoniwa na pyakulengwa pyonsene, anthu na angelo ene, ninga masenzeka.

¹⁰Na thangwi ya Khristu ife ndife mapupwe, mbwenye imwe ndimwe akuchenjera mukuphatanizana kwanu na Khristu! Ife ndife akusowa mphamvu, mbwenye imwe ndimwe amphamvu! Ife taseluswa, mbwenye imwe mwalemedzwa!

¹¹Na lero ife tina njala na nyota, tikuvala masakala, tikumenywa, pontho ife nkhabe msuwo wakukhazikika tayu,

¹²timbatopa na kuphata basa mwakuwangisa na manjathu. Podi kwene kuti tina dzedze, ife timbatsanzayisa. Podi kwene kuti timbabonereswa, ife timbapirira.

¹³Podi kwene kuti timbatikanwa, ife nkhabe tawira na mafala a mkaka uwawi tayu. Na lero pano ife tikuyeswa ninga shuzhu ya dziko yapansi, pontho ninga pyakunyansa pya dziko yapansi.

¹⁴Ine ndikukulemberani penepi nee kufuna kukuchitisani manyadzo tayu, mbwenye kuti ndikupangizeni ninga ananga apamtima.

¹⁵Podi kwene kuti muna amakayaya pikwi khumi pa moyo wanu wachikhristu, muna baba mbodzi yekha basi. Thangwi mukuphatanizana na Khristu Yesu, ine ndasanduka babanu pidakulalikirani ine Mphangwa Zadidi.

¹⁶Ndikukupemphani mphapo kuti mutsanzire ine pano.

¹⁷Na thangwi yeneyi ndikukutumizirani Timoti, mwananga wapamtima, pontho wakukhulupirika m'moyo wachikhristu. Iye anakukumbusani matongero ambateweza ine m'moyo wanga wachinchino wakuphatanizana na Khristu Yesu, pontho ambafunzisa ine m'mipingo yonsene konsene kwene ale.

¹⁸Anango pakati panupo atoma kutumbama khala ninga kwanuko sinadzako tayu.

¹⁹Mbwenye ngakhala Mbuya anapifuna ndinati ndidze kwanuko chinchino pano, mbandidziwa ndekha ene mphamvu zinanyadira anthu akutumbamawa, nee pinthu pimbalila iwo longa kwenepi tayu.

²⁰Thangwi mu Ufumu wa Mulungu chinthu chakufunika si mafala tayu, mbwenye mphamvu.

²¹Apo chinafuna imwe ninji? Ayi munafuna ndibwere kwanuko na mtswamu penu na mtima wakukufunani na wakufulika?