Read cisena 1 AKORINTO 5 Bible Online

1 AKORINTO 5 - cisena bible

1 AKORINTO 5

¹Pyavekadi pikulu pene kuti pakati panu pakuchitika pinthu pyakuzuda pyakugoswa mwakuti na anthu okhonda dziwa Mulungu ene nkhabe kupichita tayu. Ndapiva kuti munthu unango akugonana na mkazi babache.

²Apo ninji munatumbama? M'mbuto mwache imwe mwathema kutsukwala pikulu pene, mbamubuluse m'gulu mwanu munthu wakuchita pinthu ninga penepi.

³Podi kwene kuti ine ndikhale pyanga kutali na imwe kumanungo, kwache ndili namwe pabodzi mumzimu. Pontho ndamtonga kale mseru na dzina ya Mbuya munthu adachita pinthu pyakugoswa ninga penepiyu, khala ninga ndili namwe pabodzi.

⁴Ndzidzi unagumanyikana imwe pabodzi mbandigumanyikana namwe mumzimu wanga, pontho na mphamvu za Mbuyathu Yesu mbikhala pakati pathu

⁵mperekeni munthu weneyu m'manja mwa Satana kuti manungo ache avungwe, towera mzimu wache udzapulumuswe pa Nsiku ya Mbuya.

⁶Si pyakuthema tayu kuna imwe kuti mukhale akunyada. Imwe mukudziwa mafala akulonga kuti, “Chakufufumisira mkate pang'ono chimbafufumisa mpambo onsene.”

⁷Imwe mwathema bulusa chakufufumisira mkate chakale cha pyakudawa, towera mukhale akuchena monsene mwene. Natenepo munakhala ninga mpambo wachinchino wakusowa chakufufumisira ninga munadziwira ine kuti muli tenepadi. Thangwi Khristu, mwanabirathu wakuchitira Phwando ya Paska ule, aphiwa kale ninga nsembe.

⁸Tendenitu mphapo tichite Phwando yathu ya Paska mwakukhonda phatisa basa chakufufumisira mkate chakale chakudawa, pontho chakuipa chile, mbwenye na mkate wakusowa chakufufumisira, wakuchena pontho wakuonadi.

⁹Kalata idakulemberani ine ile ndidakupangani kuti muleke phatizana nawo anthu akuzuda.

¹⁰Penepo nee ndikhalonga anthu okhonda dziwa Mulungu tayu, ale mbakuzuda, penu amtima, penu mbava, penu akupembedza mifanikizo. Kuti muthunde anthu enewa, imwe mudathema kubuluka padziko yapansi pano.

¹¹Mbwenye ndikhalonga kuti mwathema kuleka phatizana na munthu onsene ambapilonga yekha ene kuti ndi mkhristu, mwenemo iye ngwakuzuda, penu wamtima, wakupembedza mifanikizo, nyatsweda, dombe, penu mbava. Munthu wakuchita pinthu ninga penepi lekani kudya naye na pang'ono pene.

¹²Kutonga mseru anthu akunja ndili nako basa yanjimbo ine? Mulungu ndiye anafuna dzaatonga. Ayi imwe hamudatheme kutonga mkhristu mwanzanu wa m'gulu mwanu tayu? Ninga munalongera Malemba kuti, “Mbuluseni m'gulu mwanu munthu wakuipayo.”