Read cisena 1 AKORINTO 6 Bible Online

1 AKORINTO 6 - cisena bible

1 AKORINTO 6

¹Ngakhala unango pakati panu ana mseru na mkhristu mwanzache, anawanga tani mtima kamtongesa mseru na anthu okhonda dziwa Mulungu, m'mbuto mwa kwenda naye kuna akhristu anzache.

²Kadi imwe nkhabe kupidziwa tayu kuti akhristu anatonga mseru anthu onsene a padziko yapansi pano? Apo ngakhala munatonga anthu onsene a padziko yapansi pano, kadi imwe nkhabe kwanisa kutonga pimiseru ping'ono-ping'onopi tayu?

³Kadi imwe nkhabe dziwa tayu kuti tinatonga mseru angelo? Apo ndi tani pya moyo uno?

⁴Ngakhala muna miseru ninga yeneyi, ayi munakaitongesa na munthu wakunja, ule nkhabe pinthu na mpingo?

⁵Penepi ndikupilonga kuti ndikuchitiseni manyadzo. Ndimomwene kuti alipo mbodzi wanzeru m'gulu mwanu wakuti anakwanisa kutonga miseru ya pakati pa akhristu anzache.

⁶M'mbuto mwache mkhristu ambakasumira mkhristu mwanzache—kutawira kuti mseru wache utongwe na anyakukhonda khala akhristu.

⁷Chenechi chakukhala na miseru pakati panu chikuoneseratu kuti mwapichimwana. Kadi si pyadidiletu tayu kuti anthu anango akudawireni? Kadi si pyadidiletu tayu kuti munthu unango akupokosereni pinthu pyanu?

⁸M'mbuto mwache imwe maka ndiye mumbadawirana unango na mwanzache mbamupokoserana pinthu unango na mwanzache, pontho penepi mumbapichita kuna akhristu anzanu ene.

⁹Ndimomwene mukudziwa kuti anthu akudawika nkhabe dzatambira khundu mu Ufumu wa Mulungu tayu. Lekani kupinyengeza mwekha ene, thangwi anthu akuzuda, akupembedza mifanikizo, maputa, penu amuna penu akazi okhokha kugonana,

¹⁰mbava, anyamtima, madombe, anyatsweda penu pimbalangondo, nkhabe dzatambira khundu mu Ufumu wa Mulungu tayu.

¹¹Anango a imwe kale ene mukhali ninga tenepo, kwache mwacheneswa kuna pyakudawa pyanu, mwapambulwa kukhala anthu a Mulungu, mwalungamiswa na Mulungu kudzera muna Mbuya Yesu Khristu, pontho muna Mzimu wa Mulungu wathu.

¹²Munthu unango anati alonge mbati, “Ine ndina utumbe kuchita pinthu pyonsene.” Ande, kwache si pyonsene mphyakuganyalisa tayu. Ndinakwanisa kulonga kuti ndina utumbe kuchita pinthu pyonsene, kwache ine nkhabe tawirisa chinthu na chibodzi chene kundichitisa kukhala bitchu wache tayu.

¹³Unangombo anati alonge mbati, “Pyakudya pidasasanyirwa chifu, chifumbo chidasasanyirwa pyakudya.” Ande, mbwenye Mulungu anavunga pyonsene piwiripyo. Manungo si akuchitira pyakuzuda tayu, mbwenye kutumikira nawo Mbuya, Mbuyambo ambapasa manungo pyakusowa pyache.

¹⁴Mulungu adalamusa Mbuya kuimfa, tenepo na mphamvu zache anatilamusambo ife pano.

¹⁵Kadi imwe nkhabe dziwa tayu kuti manungo anu ndi mapindi a manungo a Khristu? Apo ndikwate phindi ya Khristu mbandiphatanizana kumanungo a puta? Nkhabe na pang'ono pene tayu.

¹⁶Penu imwe nkhabe dziwa pontho tayu kuti munthu wakugonana na puta, iwo uwiriawo ambasanduka manungo abodzi? Thangwi Malemba akulonga kuti, “Uwiriawo anasanduka manungo abodzi.”

¹⁷Mbwenye nyakuphatanizana yekha ene kuna Mbuya, ambasanduka abodzi na Mbuya mumzimu.

¹⁸Thundani pyakuzudapyo. Pyakudawa pinango pyonsene pimbachita munthu, nkhabe pinthu na manungo ache tayu, mbwenye munthu wakuchita pyakuzuda ambadawira manungo ache.

¹⁹Kadi imwe nkhabe dziwa tayu kuti manungo anu ndi nyumba ya Mzimu Wakuchena, ambakhala muna imwe, pontho adakupasani Mulungu ule? Moyo una imwewo si wanuve tayu, mbwenye ngwa Mulungu,

²⁰thangwi iye adakugulani na konta ikulu. Tenepo phatisani basa manungo anu kudzesa demelero kuna Mulungu.