Read cisena 1 AKORINTO 7 Bible Online

1 AKORINTO 7 - cisena bible

1 AKORINTO 7

¹Chinchino nditawire kundivunza kudachita imwe pya kusemba m'kalata idandilembera imwe ile. Mphyadidi kuti munthu akhonde semba,[5]

²mbwenye na thangwi yakuti pana kuzuda kukulu, mamuna onsene akhale na mkazache mbodzi, mkazimbo onsene akhale na mamuna mbodzi.

³Mamuna athema kuchita na mkazache pinafuna mkaziyo. Ntchibodzi-bodzi mkazi athema kuchita na mamunache pinafuna mamunacheyo.

⁴Mkazi nkhabe tonga manungo ache yekha ene tayu, mbwenye ambaatonga ndi mamunache. Ntchibodzi-bodzi mamuna nkhabe tonga manungo ache yekha ene tayu, mbwenye ambaatonga ndi mkazache.

⁵Lekani khondesana, kwache ngakhala munafuna kuthunda ndzidzi wakuchepa towera mupemphere, chakutoma mwathema kutawirizana. Mungamala penepo, khalani pontho pabodzi gopesera Satana anakuyesani, thangwi ya kukhonda kwanu kwanisa kuuphata mtima.

⁶Pinalonga ine penepi, si kukukhondesani tayu, mbwenye nkhukutawirisani.

⁷Ine ndikhapifuna kuti anthu onsene akhale ninga ine; mbwenye munthu onsene ana mtukwa udampasa Mulungu, unango ana ufu, unangombo ana uwo wakulekana na wa mwanzache.

⁸Mafalanga kuna okhonda kazhali na kuna amamfelwa ngakuti mphyadidiletu kuti iwo athimize kukhala pyawo okha ene ninga ine.

⁹Mbwenye ngakhala hanakwanisa kuuphata mtima tayu, athema kukazhali, thangwi mphyadidi kukazhali kusiyana na kusanyika na pikhumbo.

¹⁰Kuna anthu a pabanja matongero anga, ale si anga tayu, mbwenye a Mbuya, ngakuti mkazi aleke mwalana na mamunache.

¹¹Ngakhala anamwalana naye aleke sembwave, penu abwerezane na mamunache; mamunambo aleke mwalana na mkazache.

¹²Kuna anthu anango mafalanga, ale si a Mbuya tayu, ngakuti ngakhala mamuna wachikhristu ana mkazi okhonda khala mkhristu, mkaziyo mbafuna pyakukhala naye, mamunayo aleke mwalana naye.

¹³Pontho ngakhala mkazi wachikhristu ana mamuna okhonda khala mkhristu, mamunayo mbafuna pyakukhala naye, mkaziyo aleke mwalana naye.

¹⁴Thangwi mamuna okhonda khala mkhristu ambatawirwa ninga mbodzi wa anthu a Mulungu thangwi ya mkazacheyo. Mkazi wakukhonda khala mkhristu ambatawirwa ninga mbodzi wa anthu a Mulungu thangwi ya mamunache. Mbapidakhonda khala tenepo, anawo nee mbadakhala a Mulungu tayu, mbwenye iwo ndiwodi ana a Mulungu.

¹⁵Mbwenye ngakhala nyakukhonda khala mkhristu anafuna kumwalana na mkhristuyo, mlekeni achite tenepo. Ngakhala pinakhala tenepa, mkhristu wamkazi, penu wamamuna ana utumbe kuchita tenepo. Mulungu adakuchemerani kuti mukhale na moyo wa mtendere.

¹⁶Kadi iwe mkhristu wamkazi nkhabe kupidziwa kuti mwinango unachitisa mamunako kupulumuka?[6] Penumbo iwe mkhristu wamamuna nkhabe kupidziwa kuti mwinango unachitisa mkazako kupulumuka?

¹⁷Munthu onsene mbathimize kukhala na moyo ukhali na iye ndzidzi udamchemera Mulungu, thangwi Mbuya ndiye adamsasanyira penepi. Penepi ndiye pimbatonga ine m'mipingo monsene.

¹⁸Ngakhala unango adachemerwa na Mulungu mbali wakugwandwa nsonga yachimuna, mbaleke kubulusa chidziwiso chakugwandwako. Ngakhala unango adachemerwa na Mulungu mbali okhonda gwandwa nsonga yachimuna, mbaleke gwandwave.

¹⁹Thangwi kugwandwa penu kukhonda gwandwa nsonga yachimuna si pinthu tayu, mbwenye kuteweza matongero a Mulungu ndiye pyakufunika.

²⁰Munthu onsene mbathimize kukhala na moyo ukhali na iye pidamchemera Mulungu.

²¹Kadi pidakuchemera Mulungu ukhali bitchu? Leka dungunya napyo. Mbwenye ngakhala unagumana mwayi wakusanduka mtumbe, phatisa basa mwayi wenewo.[7]

²²Thangwi ule akhali bitchu pidamchemera Mbuya, ndi mtumbe wa Mbuya. Ntchibodzi-bodzimbo ule akhali mtumbe pidamchemera Khristu, ndi bitchu wache.

²³Mulungu adakugulani na konta ikulu, tenepo lekani khala mabitchu a anthu.

²⁴Abale anga, munthu onsene mbathimize kukhala pamaso pa Mulungu na moyo ukhali na iye, pidamchemera Mulungu.

²⁵Kulonga pya anyakukhonda kazhali na amamfelwa, ine nkhabe matongero akubulukira kuna Mbuya tayu. Mbwenye ninga munthu wakuchitirwa nsisi na Mulungu ndathema kukhulupirwa, tenepo ndinakupangani manyerezero anga.

²⁶Na thangwi ya nyatwa ya ndzidzi uno, ndikunyerezera kuti mphyadidi munthu kukhala pyache ninga muna iyemo.

²⁷Ayi ndiwe nyakukazhali? Leka mwalana na mkazako. Ayi ndiwe nyakukhonda semba? Leka sembave.

²⁸Kwache ngakhala unasemba hudadawe tayu, pontho ngakhala mkazi anasembwa hadadawe tayu. Mbwenye ndikhafuna kwene kukupulumusani kuna nyatwa zansiku na nsiku zimbagumanikana na anyakukazhali pamoyo wawo.

²⁹Mbwenye, abale anga, chinafuna ine kulonga ntchakuti ndzidzi wachepa, tenepo kubulukira chinchino kwenda m'tsogolo anyakusemba mbakhale ninga hadasembe tayu;

³⁰anyakulira mbakhale ninga hakhalira tayu, anyakutsanzaya mbakhale ninga hakhatsanzaya tayu; anyakugula pinthu mbakhale ninga pidagula iwopyo si pyawo tayu;

³¹anyakuphatisa basa mfuma ya dziko yapansi pano, mbakhale ninga hakhaiphatisa basa chadi-chadi tayu. Thangwi dziko yapansi pano ninga muna iyo chinchinomu ikwenda.

³²Ndinafuna kuti paleke khala chinango chakukuswipisani mtima. Mamuna okhonda semba ambatsalakana pya kuphatira basa Mbuya, thangwi iye ambayesa kuchitisa Mbuya kukomerwa.

³³Mbwenye mamuna wakusemba ambatsalakana kuchita pinthu pya dziko yapansi pano, thangwi iye ambafuna kuti mkazache akomerwe,

³⁴natenepo ambaphatwa uku na uku. Mkazi okhonda sembwa penu mwali ambatsalakana pya kuphatira basa Mbuya, thangwi ambafuna kuti manungo ache na mzimu wache ene pikhale pyakupambulika kuna Mbuya. Mbwenye mkazi wakusembwa ambatsalakana pinthu pya dziko yapansi pano, thangwi iye ambafuna kuti mamunache akomerwe.

³⁵Ndikulonga penepi kuti ndikuphedzeni, si kuti nkhukukhondesani utumbe wanu tayu. M'mbuto mwache ndikufuna kuti muchite pyonsene mwakulungama na mwakuthema, pontho mupipereke monsene mwene kuphatira basa Mbuya.

³⁶Ngakhala mamuna anyerezera kuti akuchita pyakukhonda thema kuna mwali avunzira iye ule, pontho ngakhala pikhumbo pyache pikunyanya kukula mbanyerezera kuti iwo athema kukazhali, penepo iwo akazhali pyawo.[8] Tenepo kweneku si kudawa tayu.

³⁷Mbwenye ngakhala mamuna, okhonda khakhamizwa na munthu, anyerezera na mtimache onsene kuti aleke semba mkaziyo,[9] pontho ngakhala iye anakwanisa kuuphata mtimache mbanyerezeradi mumtima mwache chinthu chakuti achite, tenepo iye achita pyadidi kukhonda semba mkaziyo.[10]

³⁸Natenepo nyakusemba[11] ambachita pyadidi, mbwenye nyakukhonda semba[12] ambachita pyadidiletu kupiringana nyakusembayo.

³⁹Mkazi ambamangika na matongero a pabanja mwenemo mamunache ana moyo. Mbwenye mamunache angagonera mkono, mkaziyo ngwakusudzuka kasembwa na mamuna unango anafuna iye, kwache mamunayo athema kukhala mkhristu.

⁴⁰Na kupiona kwanga iye anakhala wakukomerwa pyakwanga angakhonda sembwa, pontho ndikunyerezera kuti na ine enembo ndina Mzimu wa Mulungu.