Read cisena 1 AKORINTO 8 Bible Online

1 AKORINTO 8 - cisena bible

1 AKORINTO 8

¹Kulonga pya pyakudya pyakuperekwa nsembe kuna mifanikizo, ande, ndimomwene kuti “tonsenefe tina udziwisi,” ninga mumbalongera anthu, kwache “udziwisi” wenewu umbachitisa munthu kukhala wakugaya, mbwenye kufunana ndiye kumbapasa munthu mphamvu.

²Munthu onsene anapiyesa kuti ana udziwisi wa pinthuyo ndimomwene kuti iye nkhabe kupidziwisisa ninga mudathema iye kupidziwa tayu.

³Mbwenye munthu anafuna Mulungu, Mulungu ambamdziwa.

⁴Apo, kulonga pya pyakudya pyakuperekwa nsembe kuna mifanikizo, timbapidziwa kuti mifanikizo yeneyi si pinthu chadi-chadi tayu, thangwi nkhabe Mulungu unango, mbwenye mbodzi ene basi.

⁵Podi kwene kuti pana pinthu pinango pile anthu ambapithula “milungu,” penu nkhudzulu penu pansi pano, pontho podi kwene kuti pana pinthudi pizinji pyakuthulwa “milungu,” penu “ambuya,”

⁶kwache kuna ife, Mulungu ndi mbodzi basi, weneyu ndi Baba, nyakulenga pinthu pyonsene, pontho ife tina moyo kuti timchitise kukomerwa. Mbuyathu ndi mbodzi basi, Yesu Khristu; kudzera muna iye Mulungu adalenga pyonsene, pontho ife tina moyo kudzera muna iye.

⁷Kwache ana udziwisi wa penepi si anthu onsene tayu. Kalene anango akhali na chisimo kupembedza mifanikizo mwakuti na lero iwo angadya pyakudya pyakuperekwa nsembe kuna mifanikizo ambakumbuka basi kuti pyakudyapyo pyaperekwa nsembe kuna mifanikizo; chikumbu mtima chawo ntchakusowa mphamvu, tenepo iwo ambanyerezera kuti pyakudyapyo pimbaaswipisa.

⁸Kwache pyakudya nkhabe kutikonwesa pamaso pa Mulungu tayu. Tingakhonda kupidya nkhabe chinataya ife; tingapidya nkhabe chinafuna ganyali ife.

⁹Kwache onesesani kuti utumbe wanu wakuchita nawo pinthu pinafuna imwewo uleke kudawisa anthu anango akuchepa chikhulupiro.

¹⁰Tisangize tenepa: Iwe ule wati una “udziwisi,” ukudya m'nyumba yakupembedzeramo mfanikizo, apo munthumbo wachikumbu mtima chakusowa mphamvu angakuona ukuchita tenepo; kadi iye hangawange mtima tayu kadyambo pyakudya pyakuperekwa nsembe kuna mifanikizo?

¹¹Natenepo nyachikhulupiro chache chakuchepayu, mbaleako adafelwa na Khristu ule, anatayika thangwi ya “udziwisi” wako.

¹²Mungadawira akhristu anzanu tenepo, mbamukuwaza chikumbu mtima chawo chakusowa mphamvu, penepo mukudawira pontho na Khristu ene.

¹³Natenepo ngakhala pyakudyapyo pikudawisa mbaleanga, ine nkhabe dzadyave pontho nyama tayu, gopesera kudawisa mbaleangayo.