Read cisena 1 AKORINTO 9 Bible Online

1 AKORINTO 9 - cisena bible

1 AKORINTO 9

¹Kadi ine si ine mtumbe tayu? Kadi ine si ine nyakutumwa tayu? Kadi Yesu Mbuyathu sidamuone tayu? Kadi imwe si imwe nsapo za basa idaphatira ine Mbuya tayu?

²Podi kwene kuti anango akhonde kundiyesa nyakutumwa, kwache kuna imwe ndinedi nyakutumwa, thangwi moyo wanu wakuphatanizana na Mbuya umbatsikimizadi kuti ndine nyakutumwa.

³Anthu angandipokanya, ndimbaatawira tenepa kupitchinjiriza:

⁴Kadi ine sidatheme tayu kupaswa kudya na chakumwa thangwi ya basa inaphata ineyi?

⁵Kadi sidatheme tayu kuchitambo ninga pidachita anyakutumwa anango na abale ache a Mbuya pabodzi na Peturo pakukwata mkazi wachikhristu mbandifamba naye pa ulendo wanga?

⁶Kadi ndi Barnaba na ine ene basi tathema kuphata basa towera tipigumanire tekha ene pyakusowa pyathu?

⁷Mbani nyankhondo adathema kupipagalira yekha ene pimbavunga iye pabasa ya nkhondo? Mbani nyakulima munda wamfesa ambakhonda kudya mfesazo? Mbani makabuswa ambakhonda kumwa mkaka wa pifuyo pimbadyesa iye?

⁸Pinthu penepi ine ndikupilonga nee na nzeru za anthu zokha tayu, thangwi mwambo wa Mose ukulonga chibodzi-bodzi.

⁹Timbawerenga mwambo wa Mose kuti, “Lekani manga ng'ombe mlomo mwenemo ikububuda tirigu.” Pinalonga Mulungu penepi, ayi iye akutsalakana pya ng'ombe pene basi?

¹⁰Kadi penepi akupilonga thangwi ya ife tayu? Ande, pidalemberwadi ife, thangwi nyakulima na nyakuvuna ambaphata basa na chidikhiro chakuti atambire khundu yawo ya pyakuvunapyo.

¹¹Ngakhala ife tidabzala mbewu za pinthu pya uzimu pakati panu, apo mphyakunensa kuti titambire pyakusowa pyathu kubulukira kuna imwe?

¹²Ngakhala anango athema kutambira penepi kubulukira kuna imwe, apo ife nkhabe thema kupitambira kupiringana iwo tayu? Kwache kuthema kweneku ife hatidakuphatise basa tayu. M'mbuto mwache tidapirira papinthu pyonsene, towera tileke kutchinga anthu kutambira Mphangwa Zadidi zakulonga pya Khristu.

¹³Kadi imwe nkhabe dziwa tayu kuti anyakuphata basa m'Nyumba ya Mulungu ambadya pya m'nyumbamo, pontho kuti anyakupereka nsembe ambatambira kubulukira pa pinapereka iwopyo?

¹⁴Ntchibodzi-bodzi, Mbuya adatonga kuti anyakulalika Mphangwa Zadidi atambire pyakuakoya kubulukira pa kulalika kwawo mphangwazo.

¹⁵Mbwenye ine sidaphatise basa kuthema kweneku na pang'ono pene tayu, penu ine ndikulemba kalata yeneyi nee na thangwi yakuti mundichitire pinthu penepi tayu. Mbandidakomerwa kufa pyanga kusiyana nakuti munthu unango andibulusire chinthu chimbanyadira inechi.

¹⁶Ine nkhabe kwanisa kunyada tayu thangwi yakuti ndimbalalika Mphangwa Zadidi, thangwi adandipanga kuchita tenepo ndi Mbuya. Tenepo mbandidakhonda kulalika Mphangwa Zadidi mbandidakhala nyadzedze.

¹⁷Mbandidasankhula ndekha kuphata basa yeneyi, ine mbandidadikhira kupagalwi, mbwenye ndikuiphata kwene pyanga na thangwi yakuti basayi adandipasa ndi Mulungu.

¹⁸Apo penepa chinapagalwi ine ninji? Wenewu ndi mwayi wakuti ndingalalika Mphangwa Zadidi, ndizilalike mwakukhonda pagalwi, okhonda phatisa basa kuthema kwanga kulalika Mphangwa Zadidi kuti ndipagalwi nako.

¹⁹Ine ndine mtumbe nee bitchu wa munthu na mbodzi ene tayu, kwache ndidapisandusa bitchu wa munthu onsene, towera ndinyengerere anthu azinji ene kuti asanduke anyakukhulupira.

²⁰Kuna Ayuda, ndidakhala ninga Myuda, towera ndianyengerere kuti asanduke anyakukhulupira. Kuna anyakuteweza mwambo wa Mose, ndidakhalambo ninga nyakuteweza mwambo wa Mose, podi kwene kuti ine nee ndili pansi pa utongi wa mwambo wa Mose tayu, towera ndianyengerere kuti asanduke anyakukhulupira.

²¹Kuna anthu okhonda khala Ayuda, okhonda dziwa mwambo ale, ndidakhala ninga nyakukhonda khala Myuda, towera ndianyengerere kuti asanduke anyakukhulupira. Penepi nee pikulonga kuti ine nkhabe vera matongero a Mulungu, kwache ndimbaveradi matongero a Khristu.

²²Kuna anthu akuchepa chikhulupiro, ine ndidakhalambo ninga nyakuchepa chikhulupiro, towera ndianyengerere kuti asanduke anyakukhulupira. Ine ndidakhala ninga chinthu chonsene kuna anthu onsene, towera na njira zonsene zakukwanisika, ndichitise anango a iwo kupulumuka.

²³Pyonsenepi ndimbapichita thangwi ya Mphangwa Zadidi, towera na ine enembo ndikatambire mtsanzayiso wa mphangwazo.

²⁴Kadi mumbapidziwa tayu kuti pabitcha-bitcha wakuthamanga azinji ambathamanga, kwache nyakufupirwa mbakhala mbodzi? Tenepo kuthamanga kwanu kukhale kwakuti munatambira nako mfupo.

²⁵Anyakuchita bitcha-bitcha, onsene ambasasanyikiratu mwadidi mwene, towera akatambire mfupo okhonda khala ndzidzi ukulu ene. Mbwenye ife timbapichita kuti tidzatambire mfupo wakukhala na kukhala.

²⁶Ndi thangwi yache ndimbathamanga kuti ndikafikeletu pamadolomero. Ndi thangwi yache ndakhala ninga nyakumenya okhonda khwitcha.

²⁷Ndimbachitisa manungo anga kukhala na mphamvu pakupimenya ndekha ene mbandiachitisa kukhala ninga bitchu, towera pidamala ine lalika kuna anthu anango ninga nyakuachemera kubitcha-bitcha, ndileke khondeswa kupita nawo bitcha-bitcha.