Read cisena 2 AKORINTO 1 Bible Online

2 AKORINTO 1 - cisena bible

2 AKORINTO 1

¹Kubulukira kuna ine Paulo, nyakutumwa wa Yesu Khristu na kufuna kwa Mulungu, pontho na kuna mbaleathu Timoti. Kwenda kuna mpingo wa Mulungu mu Korinto, pontho kuna anthu onsene a Mulungu m'nthemba yonsene ya Akaya.

²Kukoma mtima na mtendere pyakubulukira kuna Mulungu Babathu pontho Mbuya Yesu Khristu pikhale namwe.

³Tendeni tipereke takhuta kuna Mulungu Baba wa Mbuyathu Yesu Khristu, Baba wa nsisi, Mulungu ambatiphedza monsene mwene ule.

⁴Iye ambatiphedza panyatwa zathu zonsene, towera ifembo tikwanise kuphedza anthu anango ale ana nyatwa za mtundu na mtundu na chiphedzo chonthocho chidatambira ife kubulukira kuna Mulungu.

⁵Ninga munakwatira ife khundu m'nyatwa zizinji za Khristu, montho-monthomo ifembo kudzera muna Khristu takwata khundu pachiphedzo chikulu cha Mulungu.

⁶Ngakhala ife tinaona nyatwa, ndi thangwi ya kufuna kuphedza na kupulumusa imwepo; ngakhala ife tinaphedzwa, na imwe enembo munaphedzwa pontho na kukuchitisani kuti mukhale na mphamvu zakupirira nazo nyatwa sasawa ninga munapirira ifembo.

⁷Tenepo chidikhiro chathu pana imwe nkhabe tekenyeka tayu; ife tikupidziwa kuti ninga munasanyikira imwe pabodzi na ife, munati mutambirembo chiphedzo pabodzi na ife.

⁸Tinafuna mudziwe, abale, pya nyatwa zidaona ife kunthemba ya Asia. Mitolo idathukuliswa ife ikhali ikulu pyakwanga mwakuti tidataya mtima pyakukhala na moyo.

⁹Tikhaona ninga tathema kufa. Mbwenye penepi pidachitika, towera tileke kupinyindira tekha ene, mbwenye tinyindire Mulungu ene basi, nyakulamusa anthu kuimfa ule.

¹⁰Iye adatipulumusa kuna pyakugoswa pya imfa[1] ninga penepi, pontho anati atipulumuse; tenepo ife taikha chidikhiro chathu pana iye towera iye athimize kutipulumusa,

¹¹ndzidzi unatiphedza imwe pakutipempherera. Tenepo kutipempherera kwanu kukulu kunaveka kuna Mulungu, iyembo anatitsanzayisa, natenepo anthu azinji anamkuza, kupereka takhuta kuna iye thangwi ya ife pano.

¹²Chinthu chimbanyadira ife ntchakuti chikumbu mtima chathu chimbachitira umboni pyonsene pyachita ife padziko yapansi pano, maka ubale wa pakati pa imwe na ife tapichita na mtima wakuchena[2] pontho na mtima onsene, pile pikhali pyakubulukira kuna Mulungu kudzera muna kukoma kwache mtima, nee na thangwi ya nzeru za anthu tayu.

¹³Tikukulemberani pinthu pyokha pile pinakwanisa imwe kuwerenga na kupivesa mwadidi. Podi kwene kuti ndzidzi uno mukutivesa mwachigwandira, mbwenye ndikudikhira kuti munati mutivese chadi-chadi, towera pa Nsiku ya Mbuya Yesu mukwanise kutinyadira sasawambo ninga munafuna ife kukunyadirani.

¹⁵Podi ndidakhulupiradi penepi, ndidanyerezera kuti nditome fambira imwepo, towera mutsanzayiswe na kundiona kwanu kachiwiri.

¹⁶Thangwi ndidanyerezera pya kukufambirani paulendo wanga wakwenda ku Makedonia, pontho na pakubwerera panga pene, towera ndikwanise kuphedzwa na imwepo paulendo wanga wa ku Yudea.

¹⁷Pikhasasanya ine penepi, ayi mukhandiona ninga ndikhapichita mwadzenda? Ndingasasanya kuchita pinthu ayi ndimbapisasanya ninga munthu wa padziko yapansi wakusasanyika kulonga mbati, “Ande, ande” pontho “Tayu, tayu” pandzidzi ubodzi?

¹⁸Mulungu athemadi kunyindirwa, natenepo pinthu pimbakupangani ife si “Ande” na “Tayu” tayu.

¹⁹Thangwi Yesu Khristu, Mwana Mulungu, akhalalikwa pakati panu na Sila, Timoti na ine ule, si “Ande” na “Tayu” tayu, mbwenye ndzidzi onsene akhali “Ande” wa Mulungu.

²⁰Thangwi kudzera muna Khristu pinthu pyonsene pidadumbira Mulungu kudzapichita ndi “Ande.” Ndi thangwi yache kudzera muna Yesu Khristu “Ameni” ambalonga ife, ambalongwa kudzesa demelero kuna Mulungu.

²¹Ndi Mulungu mwenechiro, ule ambachitisa ife pabodzi pene na imwe kukhala akukhazikika m'moyo wathu wakuphatanizana na Khristu; ndi Mulungu mwenechiro, ule achitisa kuti tikhale anthu akupambulika,

²²ule aikha chidzindikiro pana ife chakuonesa kuti ndife ache, pontho ule atipasa Mzimu Wakuchena mumtima mwathu kuti akhale chitsikimizo cha pyonsene pinafuna ife dzatambira pile.

²³Ndikupempha Mulungu kukhala mboni yanga; iye ambadziwa mtimanga! Ine sidafune pya kukutsukwalisani tayu, ndi thangwi yache ndidanyerezera kukhonda kudza ku Korintoko.

²⁴Pinachita inepi, si kuyesa kukukhakhamizani kukhulupira pinthu pyathema imwe kukhulupira tayu; tikupidziwa kuti imwe ndimwe anthu akuimira dzololo pachikhulupiro. M'mbuto mwache pinafuna ife mphyakuti tiphate basa pabodzi na imwe towera mukhale akukomerwa.