Read cisena 2 AKORINTO 10 Bible Online

2 AKORINTO 10 - cisena bible

2 AKORINTO 10

¹Ndine, Paulo, ule anthu anango ambandilonga kuti ndine wamantha ndzidzi unakhala ine namwe pabodzi, mbwenye wakuwanga mtima ndzidzi unakhala ine namwe kutali. Kwache na kufulika, pontho na kukoma mtima kwa Khristu ndikukupemphani

²kuti muleke kundikhakhamiza kukhala munthu wavinga ndingadza kwanuko, thangwi ndikupidziwa kuti ndinakwanisa kuchitira vinga anthu ale ambalonga kuti ife tina makhaliro ninga a anthu apansi pano.

³Ndimomwene kuti timbakhala padziko yapansi, kwache ife nkhabe menya nkhondo ninga anthu apansi pano tayu.

⁴Pida pinaphatisa ife basa kumenya napyo nkhondo si pyapansi pano tayu, mbwenye mphida pyamphamvu pya Mulungu kuvunga napyo mipanda ya anyamalwa.

⁵Timbavunga napyo mphoka zakunama za anthu, timbavunga kupikuza konsene, kule kumbatchinga anthu kuti aleke kudziwa Mulungu; timbavunga manyerezero onsene kuti avere Khristu.

⁶Tenepo ndzidzi unaonesa imwe kuvera monsene mwene, penepo pene ife tinasasanyika kutchunyusa munthu onsene okhonda vera.

⁷Imwe mukuona kwene makhaliro akunja a chinthu. Ngakhala pana munthu unango akupinyerezeradi kuti iye ngwa Khristu, mphyadidi kuti apinyerezere pontho thangwi ifembo ndife ache a Khristu ninga iye.

⁸Thangwi ine nkhabe chita manyadzo tayu, podi kwene kuti ine ndanyadira mwakusudzuka utongi watipasa Mbuyawu, utongi wakuti tiwangise nawo chikhulupiro chanu, nee wakufudza nawo tayu.

⁹Ine nkhabe funa kuti ndioneke ninga ndikuyesa kukuthuswani na makalatangawa tayu.

¹⁰Unango anati alonge mbati, “Makalata analemba Paulo ngaukali pontho amphamvu, mbwenye mwenechiro angakhala nafe, ngwakusowa mphamvu, pontho mafala ambalonga iye ngapezi!”

¹¹Munthu ninga weneyu athema kuvesa kuti nkhabe siyana tayu pakati pa pinthu pimbalemba ife m'makalata tingakhala kutali namwe na pinthu pinafuna ife chita tingabwera kwanuko.

¹²Ife nkhabe wanga mtima kupiikha penu kupiyesa tekha ene sasawa na anthu anango ambapichitira okha ene umboni ale tayu. Ngakupupwa pyakwanga! Iwo ambapisasanyira okha ene mdida kupiyeseka nawo, pontho ambapitonga okha ene pakuteweza makhaliro awo!

¹³Kwache ifembo, kukunyadirani kwathu nkhabe piringana mdida wakuthema tayu; kunakhala pamdida onthowo wa basa idatipasa Mulungu ile, tenepo penepi pikuthimiza basathu pakati panu.

¹⁴Podi imwe muli m'bwalo mwa mdidawu, ife hatidapichita mwakupiringana mdidawo tayu ndzidzi udadza ife kwanuko kulalika Mphangwa Zadidi zakulonga pya Khristu.

¹⁵Tenepo ife nkhabe nyadira basa idaphata anthu anango mwakupiringana mdida tayu. Mbwenye tikudikhira kuti chikhulupiro chanu chinakula, pontho kuti tikwanise kuphata basa pakati panu kupiringana penepa ndzidzi onsene, mwakuteweza mdida udatipasa Mulungu ule.

¹⁶Tenepo tinakwanisa kulalika Mphangwa Zadidi m'madziko anango kupiringana dziko yanuyo, okhonda nyadira basa idaphatwa kale m'nthemba za munthu unango ile.

¹⁷Mbwenye ninga munalongera Malemba, “Munthu anafuna kunyada athema kunyadira pinthu pyachita Mbuya.”

¹⁸Thangwi munthu wakuthema si ule ambapichitira yekha ene umboni tayu, mbwenye ngule ambachitirwa umboni na Mbuya.