Read cisena 2 AKORINTO 11 Bible Online

2 AKORINTO 11 - cisena bible

2 AKORINTO 11

¹Mbandidakomerwa kuti mupirire nane pang'ono na kupupwa kwangaku. Ndaphata miyendo!

²Ndikuchita namwe ntchanje, ninga mumbachitirambo Mulungu; imwe mwakhala ninga mwali okhonda dziwa mamuna, ule adapanga ine kuti anasembwa na mamuna mbodzi yekha basi, mamuna weneyu ndi Khristu.

³Ninga mudachitira Hava kunyengezwa na kuchenjera kwa nyoka, ndikuchita mantha kuti manyerezero anu anasanduka akuipa, pontho kuti munaleka kupipereka kuna Khristu na mtimanu onsene.

⁴Thangwi imwe mumbatambira munthu wakudza kuna imwe dzalalika pya Yesu unangombo, nee Yesu analalika ifeyu tayu, pontho mumbatambira mzimu wakusiyana na Mzimu Wakuchena adatambira imwe ule, pontho mphangwa zakusiyana na Mphangwa Zadidi zidakupangani ife zile.

⁵Ine nkhabe nyerezera tayu kuti ndine okhonda funikaletu kuna ale ambathulwa kuti mbanyakutumwa akufunikaletuwa.

⁶Podi kwene kuti ndine nyakukhonda dziwa kulonga, kwache ndina nzeru; penepi tapionesa mwadidi mwene kuna imwe ndzidzi onsene.

⁷Ine sidakupagalisani pinthu tayu ndzidzi ukhalalika ine Mphangwa Zadidi za Mulungu kuna imwe; ndidapichepesa ndekha ene, towera imwe mukhale anthu akufunika. Ayi ndidadawa pidachita ine penepi?

⁸Pikhaphata ine basa pakati panu, mipingo inango ikhandipagali. Pakuchita tenepo, ine ndikhachita ninga ndikuabera, towera ndiphedze napyo imwepo.

⁹Pontho ndzidzi ukhali ine na imwe, ine nee ndidanensa munthu na mbodzi ene kuti andiphedze na pinthu pikhasowa ine tayu; abale akubulukira ku Makedonia adadza na pyonsene pikhasowa ine. Ndinathimiza kuchita tenepo ninga montho mukhachitira ine kale mule: ine nkhabe dzanensa munthu na mbodzi ene tayu!

¹⁰Podi pyakuonadi pya Khristu pili muna ine, nkhabe munthu na mbodzi ene tayu anafuna dzamalisa kunyada kwangaku m'nthemba yonsene ya Akaya.

¹¹Ayi ndikulonga tenepa thangwi ine nkhabe kukufunani? Mulungu ambapidziwa kuti ndimbakufunani!

¹²Chinchino ndinati ndithimize kuchita pinachita inepi, towera ndileke pasa “anyakutumwa anangowa” mwayi wakunyada, pontho wakulonga kuti iwo ambaphata basa sasawa na ina ifeyi.

¹³Amuna enewa nee mbanyakutumwa chadi-chadi tayu, mbwenye mbanyakutumwa akunama, mfaka-faka, ale ambapisangiza kukhala ninga anyakutumwa chadi-chadi a Khristu.

¹⁴Apo, lekani dodoma napyo! Na Satana enembo ambapisangiza kukhala ninga mngelo wa cheza!

¹⁵Tenepo si pyachilendo tayu kuti anyabasa a Satana apisangize anyabasa a pyakulungama. Pakumalisira pache iwo anati atambire pyakuthemerana na pinthu pidachita iwo.

¹⁶Ndinati ndilonge pontho: paleke khala munthu na mbodzi ene tayu wakundiyesa pupwe. Mbwenye ngakhala munandiyesa pupwe, ndilekeni ndikhale pyanga ninga pupwe, towera inembo ndikwanise kunyadira pang'ono.

¹⁷Kunyada kunachita ine chinchinoku, si kule kunafuna Mbuya tayu, mbwenye ndikulonga kwene pyanga ninga pupwe.

¹⁸Podi pana anthu azinji ale ambanyada ninga anthu apansi pano, inembo ndinachita chibodzi-bodzi.

¹⁹Imwe ene ndimwe anthu anzeru pyakwanga, ndi thangwi yache mumbatawirisa mwakukomerwa mapupwe kuchita pinafuna iwo.

²⁰Imwe mumbatawirisa munthu kukuyesani mabitchu, penu kukudyerani nkope-kope, penu kukuteyerani msampha, penu kutumbama, penu kukugasani mbama.

²¹Ndina manyadzo na kutawira kuti ife tikhachita mantha pyakwanga kuchita pinthu penepi! Mbwenye ngakhala munthu unango anawanga mtima kunyadira chinthu chinango (ine ndikulonga ninga ndine pupwe), inembo ndinawanga mtima kunyadira chinthu chinango.

²²Kadi iwo mba Aheberi? Inembo ndine Mheberi. Kadi iwo mba Aisraele? Inembo ndine Muisraele. Kadi iwo mphidzukulu pya Abrahamu? Inembo ndine chidzukulu cha Abrahamu.

²³Kadi iwo mbanyabasa a Khristu? Ndikulonga ninga ndine nyansala, kwache ndine nyabasa wakufunika kupiringana iwo! Ine ndawangisa kuphata basa kupiringana iwo, kazinji kene ndafungirwa m'perezo, ndakwapulwa pikulu pene, pontho kazinji kene ndikhali chifupi kufa.

²⁴Ndzidzi ushanu Ayuda adandikwapula makumatatu na kafemba;

²⁵katatu ndidamenywa na ndodo, pontho kabodzi ndidaponyerwa miyala. Katatu ndidalobzeka na mwadiya, pontho kabodzi ndidamala nsiku yamumphu m'madzi.

²⁶M'maulendo anga azinji akhaenda ine, ndaona pyakugoswa thangwi ya madzi akutayikira m'mikulo, pyakugoswa kubulukira kuna mapanga, pyakugoswa kubulukira kuna Ayuda anzanga pontho na kuna anthu okhonda khala Ayuda; ndaona pyakugoswa m'mizinda na m'midzi; ndaona pyakugoswa panyanza zikulu-zikulu, pontho kubulukira kuna ashamwali akunama.

²⁷Ine ndaphata mabasa akunensa, ndzidzi uzinji nee ndikhaona chitulo tayu, ndzidzi uzinji ndakhala na njala pontho na nyota; ndzidzi uzinji kudya kukhali kwakupereweza, pontho okhonda khala na mbuto yakukhumba, pontho okhonda nguwo.

²⁸Kuthimiza penepi, nsiku na nsiku ndili pakaliki-liki na basa yakuyang'anira mipingo yonsene.

²⁹Munthu unango angasowa mphamvu, ine ndimbakhala wakusowa mphamvu; ngakhala unango adawiswa, ine pimbandipha mtima pyakwanga.

³⁰Ngakhala ndathema kunyada, ndinati ndinyadire pinthu pimbaonesa kusowa kwanga mphamvu pile.

³¹Mulungu pontho Baba wa Mbuya Yesu, ule kwenda na kwenda athema kukuzwa, ambapidziwa kuti ine ndimbalonga pyakuonadi.

³²Pikhali ine ku Damasiko, mkulu wa boma, ule akhali pansi pa utongi wa Mfumu Areta, adaikha anyakulondali m'misuwo ya mzinda kuti andiphate.

³³Mbwenye ndidatchithisirwa m'chitundu na pabenga yafufu ya mpanda mbandimthawa.